Trisha Kehaulani Watson: ʻO Ka Wā Kākoʻo Kaiāulu Kēia, Pēlā Lākou E Kākoʻo Ai Iā Lākou Iho - Honolulu Civil Beat


About the Author

Trisha Kehaulani Watson

Trisha Kehaulani Watson is a Kaimuki resident, small business owner, and bibliophile. She holds a Ph.D. in American Studies from the University of Hawaii and J.D. from the William S. Richardson School of Law. She writes about environmental issues, cultural resource management, and the intersection between culture and politics. Opinions are the author's own and do not necessarily reflect Civil Beat's views. You can follow or contact her on Twitter at @hehawaiiau.


Kā ka luna hoʻoponopono noka: Unuhi ʻia na N. Haʻalilio Solomon. Click here to read this article in English. 

ʻOiai ke kiaʻāina e hoʻopau aʻela i nā lula komo pale nuku, ʻo ia hoʻi ka mea e ʻae ʻia ai ʻo kānaka e kaʻi hele me ka pale nuku ʻole ma kahi kaupoku ʻole, me he mea lā ke hiki pono nei nō paha kākou i kahi e holomua ai i loko o kēia wā pupule.

He mea maoli ka ʻīnea, a ʻo ka ʻoiaʻiʻo hoʻopunipuni ʻole: ʻaʻole nō i kaulike ʻia mai ia ʻīnea ma luna o nā kaiāulu a pau. He keu kēia a ka ʻoiaʻiʻo ke nānā aku i ka ʻoihana hoʻonaʻauao.

I nā luna hoʻonaʻauao i pupuāhulu aʻela i ka hoʻomākaukau i ka hoʻonaʻauao ʻana ma ke ʻano kū kaʻawale mamao i loko o ka wā o ka maʻi ahulau i hōlapu hele ai i ka makahiki nei me ke ʻano kūoʻo, ʻo ka ʻoiaʻiʻo, he hana nui kaumaha aʻe ka lawelawe ʻana i ia ʻano nohona hou no kekahi mau ʻohana.

ʻAʻole nō loaʻa i nā kamaliʻi a pau he lolo uila i noa iā ia ka hoʻohana ʻana i ka lā a pō ke ao. ʻO kekahi o lākou, ua nele i kahi ʻole e noho ai e kia ka manaʻo ma luna o ke kula pūnaewele. He lehulehu kohu ʻole hoʻi ka nui o nā kaiāulu kuaʻāina i nele i ka ʻole o ka pūnaewele hoʻouka wikiwiki i paʻa kona pili ʻana.

ʻAʻole hoʻi i hiki i nā mākua a pau ke lawelawe i ka ʻoihana ma ka hale nō, ka noho ʻana ma kauhale, a hoʻoluhi aku i kekahi mea nāna e mālama i nā keiki i ka wā e pani ana nā kula.

ʻO ka maʻū nō hoʻi, ʻo ia ka hōʻike ʻana mai ma kēia makahiki i hala no ka nui o ka ʻokoʻa ma waena o nā ʻano hoʻonaʻauao ma muli o ke kaulike ʻole o nā pono pili kanaka. ʻO kekahi papahana hou a ko ka mokuʻāina kuhina hoʻoponopono, he mea nō hoʻi paha ia e lana ai ka manaʻo i kona hoʻoponopono ʻana i ia pilikia.

I kēia malama, ua hoʻolaha mai ʻo Kiaʻāina David Ige i kona “Governor’s Emergency Education Relief Fund”, ʻo ia ka mea i manaʻo ʻia nāna e “hoʻolako mai i mau kumu hoʻolalelale a pūʻulu kālā hoʻi i nā ʻahahui a kula e hana nei me ka maʻalea e pane pololei ai i ka maʻi ahulau a me ka waele ʻana hoʻi, ma ke ʻano nui, i ala e hoʻololi a kūkulu hou ʻia ai ka hoʻonaʻauao.”

ʻO nā mea e loaʻa iā lākou ka pūʻulu kālā, ʻo ia nā ʻahahui kūloko hoʻonaʻauao, nā kulanui aʻo kiʻekiʻe, a me nā hui hoʻonaʻauao ʻē aʻe (e like me nā kula aupuni, charter, a kūʻokoʻa hoʻi) a e loaʻa ana nō iā lākou ma waena o ka $100,000 a me $500,000 e hoʻokaʻa ai i nā papahana maʻalea e hoʻoponopono ʻia ai nā hopena i loaʻa aʻe mai ke COVID-19 mai ma luna o nā haumāna, ʻohana, a kumu hoʻi ma Hawaiʻi. Ua hiki ke lilo aku kēia mau kālā i mea hoʻowaiwai no ka poʻe i pono i nā waiwai ʻōnaepuni i mea e kaulike ai ka loaʻa o ka hoʻonaʻauao i nā ʻāuna haumāna like ʻole.

(left) Raven Svenson and other volunteers from the Revolution Hawaii group with the Salvation Army, prepare packages for a food drive at the Hawaii Food Bank in Honolulu in order to help families impacted by the COVID-19 pandemic, Monday, September 29, 2020. (Photo: Ronen Zilberman/Civil Beat)
He ʻike nō hoʻi nā kaiāulu i nā kumu o ko lākou pilikia, a e pono ke hoʻolako ʻia lākou i nā pono e hoʻoponopono ai. Na ka maʻi ahulau i hōʻike mai i mau kumu alakaʻi he nui, e like me nā panakō mea ʻai i ka hoʻolako ʻai ʻana i nā ʻohana i nele i ka lawa ʻole. Ronen Zilberman/Civil Beat/2020

Ka Hana Maʻalea Kaiāulu

Ma ka ʻaoʻao o ka hana maʻalea, aia nō he mau ʻahahui kaiāulu e lawe nei i nā papahana kupaianaha. ʻO kekahi o ia mau ʻahahui, ʻo Purple Maiʻa, he ʻahahui kālepa ʻole i hoʻokumu ʻia i ka makahiki 2013, ʻo kona pahuhopu nui ke aʻo ʻana i nā keiki i ka haku ʻōlelo lolo uila.

Ua ulu a mōhāhā aʻela hoʻi ia ʻahahui mai ia manawa mai, nāna e hoʻolako mai i nā ʻano polokalamu lolo uila like ʻole he nui e hui pū ʻia ai ka ʻenehana a me ka moʻomeheu, pēlā e hoʻoulu ʻia ai nā ʻōpio e lilo aku i “mau kānaka haku ʻenehana a wehe pilikia, me ko lākou ʻike kū i ka moʻomeheu, lawelawe hana no ke kaiāulu hoʻi.”

ʻO nā ʻahahui kaiāulu e like me ia, ʻo lākou nō paha ke kī e wehe ai nā pilikia ʻo ke kaulike ʻole o nā pono. He akamai nō nā kaiāulu. He ʻike nō hoʻi lākou i nā kumu o ko lākou pilikia, ʻike pū nō hoʻi i nā mea e wehe ai. Maopopo nō iā lākou ke ʻano e huliāmahi lōkahi ai ʻo lākou iho.

Ua ʻike nō kākou i ia ʻano he mau manawa hoʻi i kēlā makahiki nei i hala. ʻO ka huliāmahi koke ʻana aʻe o nā kaiāulu e hānai a kākoʻo aku ai kekahi i kekahi, ʻoiai ke aupuni e noho ʻoni ʻole ana.

Ma ke ʻano pinepine kūpono ʻole, ʻo nā ālaina e puka ʻole ai, ʻo ia ka pākulekele, ʻaʻole ia ʻo ka nele i ka ʻike maʻalea ʻole a puaʻi manaʻo paha. Ma ke ʻano pinepine i like akula, ʻo ka pilikia ka lawa ʻole o ka pūʻulu kālā e kākoʻo ai i nā papahana a mea wehe pilikia e alakaʻi ʻia ana e ke kaiāulu.

Kōkua Ma Ka Wā COVID-19 Me Nā Loli ʻAna Ma Loko Lilo O Ka ʻŌnaehana

Ua hoʻokumu mai hoʻi paha ka maʻi ahulau COVID-19 he mau ālaina i ʻike ʻole ʻia ma mua aʻe, he minamina maoli naʻe ke loaʻa ʻole pū mai he mau manawa e makepono ai auaneʻi. E pono loa ana hoʻi ke hoʻoneʻe pololei aku ʻo Ige i nā pūʻulu kālā ma loko o nā kula a me nā kaiāulu no ka puaʻi manaʻo ʻano maʻalea.

E pono hoʻi ke ʻae ʻo ia iā House Bill 613, nāna e hoʻomāhelehele i nā kālā he $29.7 miliona ma ke ʻano he kālā hōʻeuʻeu, ʻo ia hoʻi he $2,200 no nā kānaka pākahi ma loko o ka ʻoihana hoʻonauaʻao. Ma hope o hoʻokahi makahiki o ka hōʻeleu ʻana i ka manaʻo o nā haumāna ma luna o ka Zoom, ʻo nā kālā he $2,200 ka ʻuʻuku loa e mahalo ai kākou i nā kumu hoʻonaʻauao.

ʻO ka ʻoiaʻiʻo, he hilahila maoli ka paio ʻana ma luna o kēia heluna kālā. Aia nō ko kākou mau kumu hoʻonaʻauao, he emi ʻino ke kālā e uku ʻia ai lākou, he emi pū hoʻi ko lākou mahalo ʻia ʻana. I ko kākou kamaʻilio ʻana i ke kākoʻo ʻana i nā kumu hoʻolalelale kaiāulu, e pono ke komo pū mai no ka nui o kona waiwai, ʻo ka hoʻolako ʻana i nā waiwai a kumu waiwai no ko kākou poʻe kumu hoʻonaʻauao.

I loko naʻe o kona nui waiwai i ʻaneʻane lawa ʻole, ʻo ka $2,200 ka mea e lohe ʻia ai ka manaʻo nui, he māhele waiwai ko kākou mau kumu hoʻonaʻauao no kēia kaiāulu. E pono kākou ke hōʻoia aku, ua ʻike nō nā kumu, he mahalo ʻia a aloha ʻia nō lākou.

He pono hoʻi ke ʻike nā kaiāulu, he mahalo ʻia a aloha ʻia nō lākou.

Nui nō ka hauwalaʻau ʻana no ke “kūkulu hou ʻana i mea e maikaʻi aʻe ai.” ʻO kahi e hoʻomaka ai kākou no ia ʻano, ʻo ka hoʻopukapuka ʻana i nā kaiāulu, nā papahana, a me nā kānaka, ʻo lākou hoʻi nā hōʻailona no ka ʻaoʻao ʻoi aku o ka maikaʻi o kākou.

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.


Read this next:

Peter Apo: How A Violent Battle In 1819 Still Impacts Hawaii Today


Before you go

Civil Beat is a small nonprofit newsroom that provides free content with no paywall. That means readership growth alone can’t sustain our journalism. The truth is that less than 1% of our monthly readers are financial supporters. To remain a viable business model for local news, we need a higher percentage of readers-turned-donors.

Will you consider becoming a new donor today?

Contribute

About the Author

Trisha Kehaulani Watson

Trisha Kehaulani Watson is a Kaimuki resident, small business owner, and bibliophile. She holds a Ph.D. in American Studies from the University of Hawaii and J.D. from the William S. Richardson School of Law. She writes about environmental issues, cultural resource management, and the intersection between culture and politics. Opinions are the author's own and do not necessarily reflect Civil Beat's views. You can follow or contact her on Twitter at @hehawaiiau.


About IDEAS

IDEAS is the place you'll find essays, analysis and opinion on every aspect of life and public affairs in Hawaii. We want to showcase smart ideas about the future of Hawaii, from the state's sharpest thinkers, to stretch our collective thinking about a problem or an issue. Email news@civilbeat.org to submit an idea.

Mahalo!

You're officially signed up for our daily newsletter, the Morning Beat. A confirmation email will arrive shortly.

In the meantime, we have other newsletters that you might enjoy. Check the boxes for emails you'd like to receive.

  • What's this? Be the first to hear about important news stories with these occasional emails.
  • What's this? You'll hear from us whenever Civil Beat publishes a major project or investigation.
  • What's this? Get our latest environmental news on a monthly basis, including updates on Nathan Eagle's 'Hawaii 2040' series.
  • What's this? Get occasional emails highlighting essays, analysis and opinion from IDEAS, Civil Beat's commentary section.

Inbox overcrowded? Don't worry, you can unsubscribe
or update your preferences at any time.