Click here to read this article in English. Ei pworaus article a fen akkomwen mmak non fosun merika fan ewe Jan. 22 me a awewenong non fosun fonuwach Chuukese seni Dearly Ona me Rosalinda Gaopo’a.

Iei Hawaii a pwan etiwa taropwen ammasou ngeni ei Medicaid seni aramas seni Palau, ekkewe fonuen Marshall, me Federated States of Micronesia.

Ei ekkesiwin a pwonueta pwokiten ewe annuk a sain fan ewe Dec. 27 seni President Donald Trump a eniwinisefani ewe aninnis seni mwuun merika ren Medicaid ngeni aramasen ekkewe fonu mi eriri fan ewe Compact of Free Association. Medicaid iei ewe aninnisin health insurance seni mwuun merika ngeni ese nifinifin aramas akkaewin ngeni ekkewe mei kukkun aar mwoni tonong.

Meredith Nichols seni ewe ofesin Medicaid a era pwe mwuun Hawaii a pesei ika apochokuna ngeni aramas seni COFA mi nomw non Hawaii aar repwe ammasou ngeni Medicaid ika pwe iir mei mochen nounou ei health insurance. Chommong iir rese chiwen angang pwokiten ei kesipeno ren ei semwen COVID-19 iwe ese fen pwan suk ngeniir ekkoch pwan peekin aninnis epwe usun chon ekkoch fonu pwokiten a anongonong won aar citizenship ika iir chon ia.

Me nomw, aan ekkei COFA citizen re nomw Hawaii ammasou ngeni ei federal marketplace insurance a men weires me memmong napseni aar ammasou ngeni Medicaid. Ekkewe ra nounou a tufich pokiten ekkoch anninnis mi tour ngeniir. Federal marketplace mi chok affatetiw fansoun suuk me kesip ren ammasou, nge Medicaid ese pwan nifinifin fansoun non ew ier.

Nichols a pwan apasa pwe ei mwuu mei chiwen anapanapa ika nennengeni ika epwe tufichin amwokutu ngeroun aramas aar resapw chiwen nounou ewe marketplace nge repwene nounou Medicaid.

Nichols a fen pwan apasa pwe a men apochokkuna ngeni aramas mei mochen nounou health insurance aar repwe ammasou nour, akkaewin pwokiten ei semwen mei chok cheuno.

Ei fefin a pwan sopwei ne apasa “ a mochen fatefateoch ika aramas mei tour ngeni ne ammasou nour health insurance faniten aar repwe kan churi nour doctor iteitan fansoun nge esapw wor aar noninen ren momon aar repwe churi doctor.”

Ukukkun chon Pacific esapw iir chon winipos ra forata 4% ren unusunapen chochon non Hawaii. Iwe nge a watte seni 25% chon uriir ei semwen COVID-19. Fen pwan napengeniir ese wor nour health insurance ese usun ekkan ekkoch mei pwan nonnomw non Hawaii.

Iwe ei Medicaid a awenewen ngeni ekkewe chon tonong non Merika (U.S ) fan ewe eriri Compact of Free Association. Chon tonong meinisin ese wor nour taropween mwumwuta (green card) aar repwe nomwono me angang. Ekkewe meinisin raakan tomwaanninong non fonuen Hawaii iir ese pwan suuk ngeniir ei Medicaid me nukun chok ekkewe ra chinnap, chuun meser me tter, mwuun Hawaii a sopwosopono ne anisiir ren ei insurance.

Tiki ikei omw kopwe anneani pworausen ei insurance Civil Beat a makkei. Tiki ikei om kopwe ammasou ngeni insurance seni Medicaid.