Kā ka luna hoʻoponopono nota: Unuhi ʻia na Ākea Kahikina. Click here to read this article in English. 

ʻO ka maʻi mimikō a me ka pūhalalū, ʻaʻole kēlā mau mea e noʻonoʻo mua ʻia ke nūnēnūnē ʻia nā hopena a ka hoʻohuli aniau.

Ka Ulana Pilina Badge Olelo Hawaii

Akā nō naʻe, ʻo ua mau maʻi nei kekahi o nā maʻi i mahuʻi ʻia, e māhuahua ʻino aʻe ana nō ia ke pumehana aʻe ka honua.

Mahuʻi ʻo The World Health Organization i ka hala ʻana o nā kānaka he 250,000 i kēlā me kēia makahiki ma waena o nā makahiki 2030 a i 2050 ma muli o ka hoʻomāhuahua ʻana o ka maʻi malaria, ka ʻai pono ʻole, nā maʻi pili i ka wela a me ka palahī, a kuhi ʻia ka hoʻohuli aniau ma ke ʻano he kumu.

A ʻaʻole kēlā ka palena o nā hopena i pili i ke olakino ma muli o ka hoʻohuli aniau.

Exposed roots along the beach at Kualoa Beach Park. Eventually these trees will die due to salt water inundation.
He hōʻailona maikaʻi ʻole kēia mau aʻa i huʻe ʻia ma ka pāka kahakai ʻo Kualoa, ʻoiai e mahuʻi ʻia ka hala ʻana o nā kumu lāʻau ma muli o ka piʻi ʻana aʻe o ke kai. Akā, ʻaʻole nō i kau palena ʻia ka hopena ʻino a ka hoʻohuli aniau ma ka ʻāina. Cory Lum/Civil Beat/2021

ʻO kekahi a ka ʻoi o ka ʻino, ʻo ia ka hoʻopilikia ʻana i ke olakino noʻonoʻo. E māhuahua ʻē aʻe ana ka hopohopo aniau, a ke hoʻohihia aku nei nā hanana anilā nui ʻino i ka nui o nā maʻi post-traumatic stress a me nā kūlana olakino noʻonoʻo ʻē aʻe.

ʻO kekahi hopena i kuhi pinepine ʻole ʻia, ʻo ia ka māhuahua ʻana aʻe o ka pumehana honua i nā maʻi i hiki ʻole ke lele i kahi kanaka ʻē aʻe, e laʻa me ka pūhalalū, ka mimikō, a me ka hānō.

He hopohopo nui ko ka Pakipika, ʻo ia kahi e hoʻopilikia ʻē ʻia nei nā Kānaka Maoli a me nā poʻe Pakipika ʻē aʻe e ka nui pakeneka o kēlā mau mea hoʻomaʻi.

Papa huaʻōlelo hou

E hōʻike aʻe ana nā mea noiʻi i nā hopena ʻino a ka hoʻohuli aniau ma ke olakino puʻuwai, a wahi a USA Today, e hoʻohihia ʻia ana nā poʻe ʻiliʻula nāna ka mea e hana ana ma waho a e noho ana ma nā kūlanakauhale wela loa ke hoʻohālikelike ʻia me ko nā kānaka ʻilikea.

“ʻO nā hopena olakino a ka hoʻohuli aniau, ʻo ia kahi hōʻailoha no kahi hihia olakino nui o kēia kenekulia ʻānō,” wahi a Lachlan McIver, ʻo ia ka mea kākau alakaʻi ma kahi noiʻi a ka 2016 World Health Organization no nā hopena a ka hoʻohuli aniau ma ke olakino lehulehu ma ka Pakipika.

“Pā maʻi loa nā lāhui Pakipika i nā hopena olakino a ka hoʻohuli aniau,” wahi a kēlā noiʻi me ke kuhi ʻana i ka huʻe ʻia ʻana o nā mokupuni Pakipika i ka hoʻohuli aniau a me ka hiki ʻole ʻana ke hoʻoponopono i kēia mau pilikia.

He hopohopo nui kēia mau manaʻo iā Kealoha Fox, ʻo ia kahi noiʻi olakino lehulehu Kanaka Maoli ma ke kōmike aʻo no Institute for Climate and Peace ma Honolulu.

I ka makahiki 2018, he pālua ka hiki ʻana i nā Kānaka Maoli a me nā poʻe Pakipika ke loaʻa ka mimikō a i ʻole e hoʻomake ʻia lākou e ua maʻi nei, ke hoʻohālikelike ʻia me ko nā kānaka ʻilikea Hepanika ʻole ma ka pae aupuni.

Ua hōʻike leʻa maila ka wā maʻi ahulau i nā ʻokoʻa olakino e pilikia ana ke kaiāulu ma o ka hala ʻana a me ka hoʻohaukapila ʻia ʻana o nā Pakipika he nui. Ma kēia wā ʻānō, ua hoʻopilikia ʻokoʻa ʻia nā Kānaka Maoli e ka mana delta o ka maʻi.

“ʻAʻohe kaulike pono o ka hoʻohuli aniau, a pēia pū ma ko kākou kahua olakino lehulehu,” wahi a Fox. “ʻO ka holo pono ʻole pū ʻana o nā ʻōnaehana ʻelua, ʻo ia ka mea e hiaʻā ai kēia.”

Ka Mehana ʻAna O Ke Anu

ʻŌlelo ʻo Diana Felton, ʻo ia ko Hawaiʻi kauka noiʻi lāʻau ʻino, ʻo ka mōakāka o nā hopena olakino a ka hoʻohuhi aniau, ʻo ia nā make a me nā palapū a nā hanana anilā ʻino i hōʻeu ʻia e ka hoʻomehana ʻana. Akā naʻe, i loko nō o ka mōakāka o ka pilina o ka mehana honua a me ka mimikō, he pilina nō ko laila.

“ʻAʻole like ia me kahi laina pololei, akā he laina nō ia e hoʻopili aku,” wahi āna.

ʻO kekahi mea e pili ai ua mau mea nei, ʻo ia ke ʻano e mahuʻi ʻia ai ka hoʻohuli aniau i ka hoʻokahuli ʻana i nā ʻōnaehana meaʻai. E hoʻohihia ana nō paha ka hōʻino ʻia ʻana o nā papaioa i nā poʻe Pakipika ma ka lawaiʻa kuʻuna ʻana, wahi a Bob Richmond, ʻo ia kahi polopeka ma ke Kulanui o Hawaiʻi e noiʻi ana i ke kālaimeaola o nā mālama holoholona kai.

“ʻO nā hopena olakino a ka hoʻohuli aniau, ʻo ia kahi hōʻailona no kahi hihia olakino nui o kēia kenekulia ʻānō.” — Lachlan McIver

Ua make ihola ka papaiao he 14% ma o ka honua ma waena o nā makahiki 2008 a hiki i 2019, wahi a kahi noiʻi honua, a ua make ihola ko Hawaiʻi hāpapa he 7% ma kēlā mau makahiki 10-15 aku nei.

ʻO ka hiki ʻana ke lawaiʻa a mahiʻai, ʻaʻole pili wale nō i ka ʻai pono ʻana. ʻO kēlā mau hana, “he māhele koʻikoʻi nō ia no ke olakino o ka noʻonoʻo, ka moʻomeheu, a me ka nohona kanaka,” wahi a Richmond.

Paipai ʻole nō paha ka wela o waho i ka hana ʻana ma waho, a he alahele nō paha kēlā i ka pūhalalū ʻana. ʻO ka piʻi kai ʻana aʻe a me nā hanana anilā ʻino, a me nā hoʻololi ʻē aʻe, hiki i kēlā mau mea ke alakaʻi i ka make ʻana o nā mea kanu.

ʻO Nā Haʻina

ʻŌlelo ʻo Fox, ua hihia ʻē nā Kānaka Maoli e like me ia i ka nui helu o ka mimikō a me nā maʻi lele ʻole.

“Ke pā mai nei kēlā mau hopena ʻino iā mākou ma o ko mākou lāhui ma mua loa o ko haʻi,” wahi āna. “E hoʻēmi ana kēlā kūlana maikaʻi o ke ola no mākou ma mua loa o ko haʻi.”

He ʻeha moʻomeheu a he ʻeha naʻau nui ko laila kekahi ke hala ke kupuna i kēia mau maʻi.

Hawaii 2040 special project badge

Nānā ʻo Fox i nā hana moʻomeheu no ke kūpale ʻana aku i kēia mau hopena a ka hoʻohuli aniau e mahuʻi ʻia. ʻO ke kūkulu hou ʻana i nā loko iʻa kamaʻāina a me ke kanu ʻana i nā kumu lāʻau ʻōiwi me nā hua, ʻo ia nā mea i hiki ke hoʻomau ʻia kēia mau hana kuʻuna a me ka ʻai pono, wahi āna.

Wahi a McIver, ma luna aʻe o ka paipai ʻana i nā kānaka ʻŌiwi, he pono ka hoʻonui ʻana i ke kākoʻo ʻana i nā ʻōnaehana olakino ma ka Pakipika. Nele nā mokupuni Pakipika he nui i ke kahua pono ʻole a me nā waiwai pekelala ʻole, a ʻo ia nō naʻe ka mea i loaʻa iā Hawaiʻi ma muli o kona kū ʻana ma ke ʻano he mokuʻāina ʻAmelika, wahi āna.

Akā, ua pilikia pū hoʻi ʻo Hawaiʻi kekahi i ka ʻuʻuku o nā limahana olakino a me nā waiwai ma kēia wā maʻi ahulau me ka nele ʻana i ka ʻokikene a me ka lawe ʻana mai i nā limahana olakino he mau haneli mai ʻAmelika mai ma loko o ka hōʻale maʻi a ka mana delta.

Ua hoʻomau akula ʻo McIver, he pono ka hoʻonui ʻana i ka noiʻi i nā hopena olakino a ka hoʻohuli aniau ma loko o ka Pakipika, ʻoiai ʻaʻole e noiʻi pinepine ʻia kēia ma nā noiʻi aniau.

Wahi a Felton mai ka Department of Health, he kōkua nō paha ka mālama ʻana i polokalamu no ka hoʻohuli aniau a me ke olakino ma loko o ke keʻena no Hawaiʻi e maopopo leʻa ai ka pilikia.

“Manaʻo kēia, he alahele kūpono nō ia no ka mokuʻāina e hehi mua ai no ka hoʻoponopono ʻana aku i kēlā mau hopena olakino,” wahi āna.

Ke hana nei ʻo ia me nā luna mai ka Hawaiʻi Health Department i ka haku ʻana i hōʻike olakino aniau e hōʻike leʻa ʻia ai nā pilikia olakino e kēwā ʻia, akā paʻa kona manaʻo, e makepono ana ka mokuʻāina i kahi kūlana ʻoihana e mālama nui ʻia.

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

Not a subscription

Civil Beat is a small nonprofit newsroom, and we’re committed to a paywall-free website and subscription-free content because we believe in journalism as a public service.
 
That’s why donations from readers like you are essential to our continued existence.
 
Help keep our journalism free for all readers by becoming a monthly member of Civil Beat today.

About the Author