Kā ka luna hoʻoponopono nota: Unuhi ʻia na Ākea Kahikina. Click here to read this article in English. 

Ua aʻo maila ʻo Skye Razon-Olds i ka piʻi mauna ʻana mai kona ʻohana mai. Ke nīele ʻia ʻo ia, kau mai ka haliʻa o kona wā ʻōpio ma ka Moku o Keawe a me kona ʻoliʻoli ma ka noho ʻana ma ko kona ʻohana ʻāina. 

Ka Ulana Pilina Badge Olelo Hawaii

ʻAʻole like ke kuhi pinepine ʻia ʻana o ka piʻi pōhaku me ko ka hula a i ʻole ka mele, akā he mea nui nō ia ma ke ʻano he hana moʻomeheu koʻikoʻi. ʻO ka piʻi pōhaku, a i ʻole ka piʻi kuahiwi, ʻo ia kahi noʻeau e pono ai ka nohona Hawaiʻi. ʻO nā ana kahi no nā Kānaka Maoli e hūnā ai i nā iwi a me nā mea koʻikoʻi.

Ma hope o kona ʻike ʻana i ka hulikua ʻana o ka piʻi pōhaku hoʻoleʻaleʻa i nā mea moʻomeheu, ua hoʻokumu ʻo Skye iā Kanaka Climbers, ʻo ia hoʻi kahi hui kumuloaʻa ʻole “e paipai i kahi kaiāulu hoʻoleʻaleʻa ma waho e hōʻihi i nā kuleana a me nā kaʻina hana kūpono ma Hawaiʻi. Kālele mākou i ka hoʻonaʻauao ʻana i ka ʻike moʻomeheu koʻikoʻi e pili ana i ka hekehi a me ka piʻi pōhaku ʻana.”

Wahi a ka maka, he kūʻokoʻa kēia hui i kona pahuhopu e kālele ʻia ai ka moʻomeheu ma ka hekehi a me ka piʻi ʻana. He mea nui nō ia e koi ʻia, ʻoiai e māhuahua ana ka pilikia ma nā hana hoʻoleʻaleʻa ma waho ma kēlā mau makahiki aku nei. 

Ua pilikia ʻo “Stairway to Heaven” i kona kaulana ponoʻī, ʻo ia hoʻi ʻo Haʻikū Stairs, a ua pani ʻia i ka lehulehu. Mai ke ʻalo ʻana o nā kamaʻāina i nā hekehi kū ʻole i ke kānāwai a i ko ke kūlanakauhale hoʻoponopono ʻana a me ka uku ʻana no nā kānaka i kūkulu i kahi lele koali a me kahi keʻelelena ma laila, ua mōakāka ka makehewa o ka uku a me ke kaumaha kuleana no ka mālama ʻana i ke alahele. 

ʻO ka hana ʻino a nā hekehi e hoʻoponopono ʻole ʻia, ʻo ia ke hoʻokālele i ka hahai ʻole ʻana i nā kānaka he nui i kēia ʻōlelo: waiho aku i nā kapuaʻi wāwae. A inā ʻaʻole kūpaʻa pū nā kamaʻāina a me nā malihini i ka hoʻololi ʻokoʻa ʻana i ka hana e hōʻihi pono ʻia ai nā kaiāulu a e mālama ʻia ai kēia mau wahi kūikawā, e mau aku ana nō ka pilikia, a ʻo ka pani ʻia akula nō ia o nā wahi hoʻoleʻaleʻa ʻē aʻe. 

Ua pilikia ʻo “Stairway to Heaven” i kona kaulana ponoʻī, ʻo ia hoʻi ʻo Haʻikū Stairs. Nick Grube/Civil Beat/2013

E aho ʻo Hawaiʻi Tourism Authority e hana nui ma ka mālama ʻana i ka hopena a nā malihini kipa. Waiho wale pū ʻia akula ka Department of Land and Natural Resources a me nā kalana me nā kuleana o ka mālama moʻohelu kālā a me ka hoʻokō ʻana. Ma luna o ka hōʻauamo ʻia ʻana o kēia mau keʻena, e hōʻauamo pū ʻia nā kānaka uku ʻauhau e uku i kēia mau ukuna. 

ʻO ke kumu o koʻu kākoʻo ʻana i ke kāki ʻana i nā mea kipa ma kēia wahi ʻāina. ʻAʻole mahuʻi ʻo haʻi e ʻai ma ʻaneʻi me ka manuahi. No ke aha kākou e hana like ʻole ai pēlā ma ka ʻai ʻana i nā waiwai o ka ʻāina a me ka moʻomeheu? A ʻo ke kālā e loaʻa mai, hiki i ua kālā nei ke kākoʻo i nā hui kumuloaʻa ʻole, e laʻa ʻo Kanaka Climbers, a me ka hana e kiaʻi ʻia ai nā wahi koʻikoʻi a e hoʻonaʻauao ʻia ai ke kaiāulu. 

He Moʻomeheu Ka Piʻi Mauna

Kau mai ka haliʻa o koʻu kipa ʻana i kahi mokupuni ma ka makahiki 2019 a me ka hoʻomākaʻikaʻi ʻia ʻana o nā ana e piʻi ʻole ʻia nō paha me ka ʻole o nā mea pono mai kēia wā ʻānō. Akā, ma o ka noho pū ʻana me Skye ma kekahi lā, ua mōakāka ka hiki ʻana o ke komo ana ʻana i ka Hawaiʻi, a he mea pinepine nō ia. 

He mea nō ia e hoʻohanohano ʻia. Ua huakaʻi kaulana ka Mōʻīwahine ʻo Emma i ke kuahiwi o Kauaʻi ma Kōkeʻe ma ka makahiki 1871. Ua hoʻomanaʻo mau ʻia ka hanana e ka poʻe ma o nā mele; a mau aku nō ka hoʻohanohano ʻia ʻana o ka hanana e Hui o Laka, ʻo ia ke mālama i kahi hoʻokūkū hula ma Kōkeʻe e hoʻohanohano ʻia ai ka hanana kaulana a e hoʻonaʻauao ʻia ai ka poʻe i ua hanana nei. 

He māhele koʻikoʻi ka hele a me ka mālama mauna ʻana ma ka moʻomeheu kuʻuna Hawaiʻi. Ua ʻike ka Hawaiʻi i ko lākou uka ma ke ʻano he waiwai no ka wai a me nā waiwai nahelehele. No kēia mau kumu, ʻaʻole i manaʻo liʻiliʻi ʻia ka huakaʻi ʻana; ua nui nō naʻe ka hōʻihi a me ke kuleana. 

Ua kuhi pinepine ʻia kēia, he nele ko uka i nā hōʻailona ʻole o ka nohona kanaka a i ʻole ko lākou hopena ma laila, no laila, ʻaʻole hiki i nā Hawaiʻi ke hele ma ua mau wahi nei. ʻAʻole pēlā ka ʻoiaʻiʻo. Nui ka ʻike o ka Hawaiʻi ma ka huakaʻi mauna ʻana. He kaʻina hana ko lākou, a nui ka mālama a me ke akahele. ʻAʻole i waiho pinepine ʻia nā koena o ka nohona kanaka ma laila. 

He Kuleana Ka Piʻi Mauna

No nā ʻohana i hana i kēia mau loina piʻi, ua hoʻopili pū ʻia nā kuleana koʻikoʻi — e laʻa ke kanu ʻana a me ka mālama ʻana i nā wahi kanu. 

Aia nā kanu ma nā wahi ana. Ua kōkua kēia wahi mamao e kiaʻi i nā kanu i ka hana ʻino ʻia ma ka wā e hiki mai ana. ʻO kēia mau wahi, ʻo ia ke kuleana o nā ʻohana a me nā mea e hoʻokuleana ʻia — a he kuleana ia i ili ʻia ma o nā hanauna he nui. 

Ma o kēia loina kapu e hana aku ai nā Kānaka Maoli e laʻa ʻo Olds. ʻAʻole ʻo ia mehameha i ka ili ʻia ʻana o ka loina a me ka hana moʻomeheu ma luna ona, akā pā kona naʻau i ka mehameha ma kona ʻāʻumeʻume ʻana ma kahi honua haole e hulikua ʻia ai nā wahi kapu a me nā loina. 

Aʻo mai ʻo Kanaʻiaupuni Razon-Olds e piʻi pōhaku ma Oʻahu.  Courtesy: Kanaka Cimbers

“Ma koʻu piʻi ʻana, pā ka naʻau i ka pili ʻāina. I ka pili kupunawahine. I ka pili ʻohana,” wahi a Olds. “Penei kēia e hoʻohanohano aku ai i koʻu Hawaiʻi ʻana a me kahi aʻu i hoʻokumu ai — ʻo ia he kuleana a he pōmaikaʻi.” Ua kau kona mau maka i ka hana pū ʻana me nā keʻena e laʻa ka Department of Land and Natural Resources e hoʻonaʻauao pono ʻia ai nā hekehi a me nā piʻi mauna e pili ana i nā wahi a lākou e kipa aku ai. 

“Aia kekahi o nā wahi kupanaha ma ʻaneʻi e mālama ʻia mai nei ma ko kākou mau nahelehele,” i wehewehe aku ai ʻo Olds. “He pono ko kākou kiaʻi ʻana aku iā lākou no kēia hanauna aʻe. He wahi maʻalahi ka luku ʻana i kēia mau wahi e haku maiau ʻia e ko mākou mau kūpuna. Ma o ka hoʻonaʻauao ʻana, e mau aku ana nō kēia mau wahi i mau haneli makahiki aʻe, ʻo ia hoʻi nā wahi i haku ʻia i mau haneli makahiki aku nei.”

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner

Not a subscription

Civil Beat is a small nonprofit newsroom, and we’re committed to a paywall-free website and subscription-free content because we believe in journalism as a public service.
 
That’s why donations from readers like you are essential to our continued existence.
 
Help keep our journalism free for all readers by becoming a monthly member of Civil Beat today.

About the Author

  • Trisha Kehaulani Watson
    Trisha Kehaulani Watson is a Kaimuki resident, small business owner, and bibliophile. She holds a Ph.D. in American Studies from the University of Hawaii and J.D. from the William S. Richardson School of Law. She writes about environmental issues, cultural resource management, and the intersection between culture and politics. Opinions are the author's own and do not necessarily reflect Civil Beat's views. You can follow or contact her on Twitter at @hehawaiiau.