Kā ka luna hoʻoponopono nota: Unuhi ʻia na Ākea Kahikina. Click here to read this article in English. 

Hoihoi anei ʻoe e hoʻolohe i nā mea ʻē aʻe? E hahai iā ‘Stemming The Tide’ a nānā i kā Civil Beat mau pūkaʻina kūkā ʻē aʻe. 

Ka Ulana Pilina Badge Olelo HawaiiʻO seaweed, ʻo macroalgae, a ʻo kelp — nui nā inoa like ʻole no nā lāʻau o ke kai, akā ma Hawaiʻi, ʻo limu kona inoa. 

Ma mua o ka hōʻea ʻana mai o nā haole komohana, he koʻikoʻi ka lumi ma ka moʻomeheu a me ka nohona Hawaiʻi. ʻO ka limu he ʻai, he lāʻau lapaʻau, he mea lei, a he mea hoʻowaihoʻoluʻu i ke kapa. ʻO kekahi ʻano ʻo ka limu kala, he mea ia ma nā hana hoʻoponopono — he ʻaha ia e hoʻonā ʻia ai ka hihia o ka naʻau — i mea e noi kala ʻia ai nā kānaka ma ka ʻaha ma o ka hoʻopaʻa a me ka ʻai ʻana i ka lāʻau. 

Ma ke ʻano he kahua ia no ka ʻōnaehana ʻai o nā holoholona kai, he mea nui ka limu ma nā kaiaola moana, ʻoiai, nāna e hānai a kiaʻi i nā holoholona iwi kuamoʻo ʻole liʻiliʻi a me nā holoholona ʻai lāʻau

Limu Wally Ito Crustacean Limu Kohu
Kuhi ka loea limu ʻo Wally Ito i kahi pāpaka liʻiliʻi i ʻimi ʻia ma kēia lālā o ka limu kohu.  Ku‘u Kauanoe/Civil Beat/2022

Akā naʻe, ma o kēlā mau kekeke aku nei, ua hoʻopilikia nui ʻia nā limu ʻōiwi like ʻole ma ko Hawaiʻi mau kai. ʻO ke kūkulu hale, ka hoʻohaumia wai honua, nā lāhui limu haole a me ka hoʻohuli aniau, ua lilo pū kēia mau mea i pilikia nui no ka limu. 

ʻO Veronica Gibson, he haumāna laeʻula ʻo ia ma ke Kulanui o Hawaiʻi ma Mānoa, a e noiʻi limu ana ʻo ia no nā makahiki he 10 a ʻoi. Nāna kā i ʻōlelo, aia kākou ma kinohi o ka hoʻomaopopo leʻa ʻana i ia mea. ʻO ka mea mōakākā naʻe, ʻo ia ke kuleana a ka poʻe e ʻauamo aku ana no ka mālama ʻana i ka wā e hiki mai ana no ka limu. 

Limu Veronica Gibson Diving
Ua hānai ʻia ʻo Veronica Gibson ma Kona, a ma laila i ulu aʻe ai kona hoihoi limu me kona puni kai ʻana. Ma ke ʻano he moho laeʻula ʻo ia ma ke Kulanui o Hawaiʻi ma Mānoa, ke noiʻi nei ʻo ia nei i ka pilina o ka wai honua a me ka limu.  Elizabeth Sides

“ʻO kākou kānaka nā wilikī kaiaola e koho i nā mea e uluāhewa a me ke ʻano o kā kākou hopena ma kēia mau kaiaola,” wahi āna. 

Paʻa ko Gibson manaʻo, inā hoʻonui ʻia ka helu o nā kānaka i kamaʻāina i ka hiʻona o nā kaiaola ʻōiwi, e hiki ana iā lākou ke haʻilono i nā loli maʻamau ʻole. 

ʻO Nā Haʻawina Uluāhewa

He paʻakikī ka hoʻoponopono ʻia ʻana o kēia pilikia. Akā, aia ke kinohi ma ka hoʻomaopopo ʻana i nā lāʻau ʻino a me ke kumu o ka ʻino. 

ʻO ka Department of Land and Natural Resources, he papa helu kona o nā lāhui limu malihini ma Hawaiʻi. Ua kaulana kēia mau ʻano limu i ka ʻapakau ʻana i nā limu ʻōiwi, e laʻa ʻo muck weed, ʻo hook weed, a me “smothering seaweed.”

Ka Papahelu Huaʻōlelo Hou

Wehewehe mau ʻia ka līoho mānui malihini ma ke ʻano he lāhui haole e hoʻohaku ma nā hāpapa a ālai i ka māhuahua ʻana o nā lāhui ʻē aʻe, e laʻa nā lāʻau, nā holoholona iwi kuamoʻo ʻole a me nā iʻa. Akā, hiki i ka limu ʻōiwi ke poʻipū i nā hāpapa, a hiki i ka limu i hoʻolauna ʻia ke hoʻoliliuwelo i ko lākou mau nohona. 

“I koʻu manaʻo, he kūlana ka mea i ‘hoʻolauna ia’ a me ka mea ‘malihini,” wahi a Ryan Okano, ʻo ia ka luna hoʻohana polokalamu no ko ka DLNR Division of Aquatic Resources. “ʻO ka mea uluāhewa, noʻu iho, he ʻano ia e hōʻike ʻia e nā lāhui haole ma loko o nā pōʻaiapili maʻamau ʻole.”

ʻO Gracilaria salicornia i kapa ʻia ʻo gorilla ogo, ua lawe ʻia maila kēia i Hawaiʻi ma ke ʻano he ʻai. Ua hoʻolauna ʻia ka lāhui poupou mai Hilo a i Oʻahu, a i loko nō o ka hoʻohana ʻia ʻana o kēia limu no ka hōʻono ʻana i ka puaʻa a me ka poke, ua emi ke koi a nui aʻe ka lako. 

Ua nānā ʻo Gibson i ka māhuahua ʻana o ka gorilla ogo ma ko Oʻahu kai ma o kēlā mau makahiki aku nei he 12, a ua komo ʻo ia i nā hana hemo ogo ma Waikīkī. Paʻa kona manaʻo, he haʻawina nō ia e makaʻala ai. 

“E akahele i kāu mea e hoʻolauna aku ai, no ka mea, he paʻakikī ka wānana ʻana i ka mea e hiki mai ana,” wahi a Gibson.

Ma muli o ka hoʻohapa ʻana, ʻo ia ka hoʻolaupaʻi ai ʻole ʻia ʻana o ka limu ma o kekahi hapa, ua hoʻohaku ka gorilla ogo i nā kapakai hikina a me nā kapakai ʻākau, a ma laila nō i lupalupa ai kona hoa paio ʻo ka limu manauea. 

“Hoʻololi ʻia ke kaiaola e kona lupalupa ʻana, akā ʻaʻole nō ke makemake ʻia,” wahi a Gibson. 

Limu Wally Ito Malia Heimuli Oneula Beach Park Ewa Beach
ʻOhiʻohi ʻo Wally Ito i mau hāpana o ka limu ʻōiwi ma ka pāka kahakai ʻo Oneʻula. E mālama aku ana ʻo ia i ua mau hāpana nei ma kahi puke lina kui e hōʻike aku ai a e aʻo aku ai i ko Hawaiʻi mau haumāna i ka limu.  Ku‘u Kauanoe/Civil Beat/2022

ʻO Wally Ito, ʻo ia he kamaʻāina a he loea limu, a ua hoʻomaha loa aku nei ʻo ia i kona kūlana luna ma Kuaʻāina Ulu ʻAuamo. He 50 ona makahiki ma ka nānā ʻana i ka ʻapakau ʻana o ka limu haole i nā limu ʻōiwi. 

Ma mua, ua kaulana loa nā kapakai o ʻEwa a me Kahe i ka nui o nā ʻano limu e lupalupa ana. Kau mai ka haliʻa o Ito i nā kahakai e uhi ʻia i nā ʻano ʻōmaʻomaʻo like ʻole, a na nā kamaʻāina e ʻohi a lawe i ka limu i ka hale. 

Ua hoʻēmi nui ʻia ka nui limu e ka hoʻonui ʻana o ke kūkulu hale, a ua hoʻopilikia pū hoʻi ka mahi uka ʻana i ka wai honua e pono ai ke ola o ka limu ma ka moana. ʻAʻole hiki i ka limu ʻōiwi ke kāmau ma ka hoʻolauna ʻia ʻana o nā limu malihini i ko Hawaiʻi kai ma nā kekeke 1970 a me 1980 no ka mahi iʻa

Ke aʻo aku nei ʻo Ito i kona ʻike limu i nā kaiāulu i hoihoi i ka hoʻoponopono kapakai ʻana. Kapa ʻia ʻo ia ʻo ʻAnakala Wally, a hoʻomākaʻikaʻi pinepine ʻo ia i nā haumāna a me nā lālā kaiāulu ma o nā “limu walks.” Ma laila nō ʻo ia e nānā aku ai i ka ulu ʻana o nā ʻano limu ma ko Oʻahu mau kahakai like ʻole. 

E Hoʻokaulike

He mau ʻano limu like ʻole ma nā pae like ʻole. ʻAʻole ia he limu maikaʻi a he limu maikaʻi ʻole. E aho nā mea noiʻi e noʻonoʻo i ke ʻano o nā limu malihini e hoʻololi aku ai i nā kaiaola holoʻokoʻa ma o nā mea maikaʻi a me nā mea maikaʻi ʻole. 

He ʻai ka limu na nā ʻopihi, nā wana, a me nā iʻa, a he hale hoʻi nō ia no nā iʻa liʻiliʻi. Kōkua kekahi mau limu e hānau i ke one a kūkulu i ka hāpapa. 

“ʻAʻole pili wale kēia i ke kāohi limu maikaʻi ʻole,” wahi a Okano. “E aho kākou e noʻonoʻo i kā kākou hana ponoʻī i kēia mau kaiaola.”

Aia ke ola o ka limu i ka wai honua i nui aʻe ai ka māhuaola, akā, ke haumia ka wai i ka hana kanaka, hiki i nā limu ʻōiwi ke hana me he limu malihini lā. ʻO ka wai pelapela, ka luawai pelapela, ke kūkulu hale, a me ka mahiʻai ʻana, hiki pū i kēia mau mea ke hoʻopilikia nui. 

“E ulu koke nā limu ʻōiwi me ka ʻai ʻana i kēlā mau māhuaola,” wahi a Gibson. “Akā, inā keu ka līoho a ka nui, e pala ana ka limu a hoʻēmi ʻia ka ʻokikene, a ʻo ka haʻalele akula nō ia o nā iʻa.”

Hoʻohihia ʻia aku ka pilikia e ka hoʻohuli aniau, keu hoʻi nā hopena o ka hoʻopiʻi ʻilikai a me ka hoʻomehana kai. 

ʻO Kanoe Morishige, he luna ʻo ia no Nā Maka Onaona, a ua noiʻi ʻo ia i ka nui helu o ka limu, ka ʻopihi, a me ka hāʻukeʻuke. Kuhi ʻo ia, ʻo ka wā lōʻihi me ka wela a me ka ʻole o nā nalu nunui, ʻo ia ke hoʻomake i ka limu. A laila, hiki i kēlā ke hoʻololi i ka ʻai a me ka nohona o nā iʻa a waele ʻia kahi e lupalupa ai nā limu malihini. 

“Inā hoʻololi ʻia ka holo maʻamau ʻana o ko kākou ʻāina, hiki ke hoʻololi nui ʻia ka māhuahua ʻana aʻe o kēia mau lāhui,” wahi āna. 

Paʻakikī ka hoʻokaulike ʻana i kahi kaiaola, wahi āna, a hoʻonui ʻia ka paʻakikī e nā limu malihini a me nā loli maʻamau ʻole e hana ana ma nā kai. 

E Pani Hakahaka

Me nā ʻano limu he 500 a ʻoi ma Hawaiʻi, ua maopopo iā Nicole Yamase, aia kākou ma kinohi o ka hoʻomaopopo leʻa ʻana i ka limu a me ke ʻano o kona ulu ʻana. Mahalo ka moho laeʻula Maikonekia i ka noiʻi limu ma Hawaiʻi ma muli o ke koʻikoʻi o ka limu i ka moʻomeheu Hawaiʻi. 

“Makemake loa wau e lawe mai i kēia pilina i kuʻu home a pani i kēia mau hakahaka ʻike,” wahi āna. 

Nui nā hana moʻomeheu me ka limu ma Hawaiʻi ma muli paha o kona lupalupa a me kona hiki ke ʻohiʻohi maʻalahi ʻia. No laila, e aha ana inā emi mai ka limu ʻōiwi?

Limu Nicole Yamase AFRC
Mālama ʻo Nicole Yamase i kāna mau noiʻi ma Ānuenue Fisheries Research Center ma Honolulu. Ke hoʻopaʻa nei ʻo ia i ka līoho ʻo Microdictyon setchellianum, ʻo ia kahi lāhui limu e ʻimi pinepine ʻia ma Hawaiʻi.  Courtesy of Nicole Yamase

Ua kapa ʻo Hawaiʻi i ka makahiki 2022 ʻo “The Year Of The Limu,” a nui nā mea e aʻo ʻia. Akā naʻe, no Yamase, he hōʻailona kēia e hōʻike ʻia aku ai ka hoihoi o nā kānaka e mālama a hoʻolaha i ka ʻike limi ʻōiwi i ke kaiāulu. Ke noiʻi nei ʻo ia i ka limu kala, ʻo ia nō he lāhui limu a Ito e makemake ai e lilo i limu kūhelu no ka mokuʻāina. 

Ua ʻōlelo ʻo Morishige, he mea nui ke aʻo ʻana i ka limu ma ke ʻano he ʻai; he hana hoʻi ia e hui pū ai nā kānaka a hana haʻaheo i ka ʻike kuʻuna. 

“Ua pili nā loina limu i ka ʻike makamaka i ka ʻāina a me kahi kuleana a ko kākou mau lawaiʻa a me nā kānaka e ʻauamo nei no ko lākou mau kaiāulu lahalaha,” wahi āna. 

A, e hana ka limu me he kenele lā ma ka mine lānahu no ka nānā ʻana i ke olakino o ko kākou mau kaiaola kahakai, wahi āna. No laila, e aho e makaʻala. ʻIke ʻo ia, inā loli ka limu, e loli ka nui o ka ʻopihi a me ka hāʻukeʻuke, a pēlā pū me nā nui iʻa, a ʻo ka loli akula nō ia o ka ʻōnaehana ʻai holoʻokoʻa, no ka mea, ua pili pū nā ʻōnaehana a pau a kaukaʻi lākou kekahi i kekahi no ke ola pono ʻana. 

“ʻO ka limu ka hōʻailona mua ma kapakai e hōʻike ana i nā mea e hana ana ma kai a me ka ʻāina,” wahi a Morishige. 

Ua kākoʻo ʻia kā Civil Beat kūkala nūhou ʻana e pili ana i ka hoʻohuli aniau e ka Environmental Funders Group ma ka Hawaii Community Foundation, ʻo Marisla Fund ma ka Hawaii Community Foundation a me ka Frost Family Foundation. 

Ua uku hapa ʻia ʻo “Hawaii Grown” e nā makana kālā maiā Ulupono Fund ma ka Hawaii Community Foundation a me ka Frost Family Foundation. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

We’re here to help Hawaii vote.

Our staff has spent months preparing for this election season. Now it’s your turn to vote on the leaders who will impact our community for years to come.

If you’ve relied on our daily analysis and reporting, Candidate Q&As, free events and online resources, please consider making a donation to your local nonprofit newsroom.

Every contribution, however big or small, powers our journalism.

About the Author