Kā ka luna hoʻoponopono nota: Unuhi ʻia na Ākea Kahikina. Click here to read this article in English. 

Kani Leo: E hoʻolohe i ka pūkaʻina kūkākūkā i pili i kēia ʻakikala. No ka ʻikepili hou, e hahai iā Stemming The Tide ma kāu polokalamu pūkaʻina kūkākūkā punahele.

Me ka ʻaʻahu ʻia ʻana o kahi ʻahu hinuhinu o nā hulu pōʻeleʻele, kūlepe kahi ʻakihihehiʻale i kona mau ʻēheu ma Waialua ma Oʻahu. 

ʻO ka neʻena o ka manu keiki, ʻo ia ka hōʻailona mākaukau no kona lele mua ʻana, akā ʻaʻole kēlā kona lanakila hoʻokahi. Wahi a nā mea noiʻi, ʻo kēia manu nō paha ma James Campbell National Wildlife Refuge ka manu mua lua i hānau ʻia ma Oʻahu mai ka hoʻopilikia ʻana mai o nā kānaka i ko lākou nohona — he hehi koʻikoʻi loa no ko ka lāhulu ola ʻana i loko nō o ka hoʻohuli aniau. 

Ma o nā kekeke, e hana ana nā hui mālama ʻāina e lawe mai i nā ʻakēʻakē a me nā manu kai ʻē aʻe mai nā mokupuni mamao mai ma muli o nā pilikia i pili i ka piʻi ʻilikai a me ka hoʻomehana honua.

ʻO Nā Pilikia, He Kahiko A He Hou

ʻO nā kuhia no nā mokupuni ma loko o Papahānaumokuākea Marine National Monument, he kīpuka i loaʻa nā mile kuea he 583,000 a puni nā mokupuni mamao, hōʻike ua kuhia nei, inā piʻi ke kai he ʻeono kapuaʻi, e nalowale ana nō paha ka ʻāina he 26%.

ʻO Beth Flint, he luna noiʻi kālaimeaola ʻo ia no U.S. Fish and Wildlife Service, ua hana ʻo ia ma nā mokupuni mamao no 40 mau makahiki, a ua ʻike maka ʻo ia i ka hoʻololi ʻia ʻana o ka nohona manu a me ka hoʻomohala ʻana i nā wahi pūnana a me ka ʻimi home hou ʻana no nā manu. 

“ʻO nā loli hoʻoweliweli aʻu i ʻike ai ma o kēlā mau makahiki aku nei he 40…ʻo ia ka nalowale ʻokoʻa ʻana o nā moku liʻiliʻi a me ka ʻaʻai koke ma nā moku nui,” wahi a Flint. 

Ua palemo iho kekahi mau moku a ʻo ka nalowale akula nō ia o nā wahi pūnana ma o nā hanana anilā nui. Ua hoʻomake ʻia nā kaʻupu makua a me nā keiki he 100,000 a ʻoi ma Pihemanu ma hope o ka ʻōlaʻi ma ka makahiki 2011 a me ke kai eʻe i pae ma Iāpana; ma ka makahiki 2018, ma o ka palemo ʻana o Moku Hikina, ua nalowale kahi wahi hānau no nā honu, nā ʻīlio kai, a me nā lāhulu like ʻole o nā manu kai. 

He wānana nō paha kēia mau hanana i nā mea e hiki mai ana, wahi a nā mea mālama ʻāina. 

ʻO ko Pihemanu kaʻupu a me nā mōlī, ua pulupē ʻino lākou ma hope o ke kai eʻe ʻo Tohoku ma ka makahiki 2011 a me ka ʻōlaʻi, a liʻiliʻi ka nui manu i ola ma hope. AP Photo/2011

ʻOiai, he holoholona laulauna nā manu kai e hoʻokolonaio i nā mokupuni holoʻokoʻa, ua kūpaʻa lākou i kā lākou wahi e hoʻopili ai ma ka wā ʻōpio. No laila, i mea e hoʻoponopono ʻia ai ka pilikia, ʻo nā hui e like me Pacific Rim Conservation, hoʻoneʻe lākou i nā manu keiki no nā mokupuni mamao a hoʻohana iā lākou e hōʻumeʻume i nā manu ʻē aʻe e lele i nā mokupuni ma ʻaneʻi. 

No James Campbell National Wildlife Refuge hoʻi, ʻo nā manu keiki he 511 o nā lāhulu ʻehā like ʻole — ka mōlī, ke kaʻupu, ka nunulu, a me ka ʻakihihehiʻale — ua lawe ʻia maila lākou i home hou mai nā mokupuni mamao mai ma waena o nā makahiki 2015 a me 2021 ma loko o nā wahi i kiaʻi ʻia e nā pā pale poʻiiʻa. 

A ua ola aʻe nō nā manu keiki i hoʻoneʻe ʻia he 92% i ka wā ulu ʻēheu, a ʻo ko lākou hoʻi maila nō ia ma ka wā makua, wahi a FWS. 

Wahi a Lindsay Young, ʻo ia ko PRC luna hoʻokō, ʻo kekahi pahuhopu o ka hui penei, e hoʻokō ʻia ka nalowale ʻokoʻa ʻole ʻana o ka ʻāina, ʻo ia hoʻi, no kēlā me kēia iwilei kuea o ka ʻāina ma nā mokupuni mamao, he koho ʻē aʻe ko nā manu kai ma nā mokupuni ʻewalu mai Hawaiʻi i Kauaʻi. 

Koho nā mea noiʻi i ke kaʻupu kūpono no ka hoʻoneʻe ʻia ʻana me ka nānā ʻana i ka nui pilikia i pili i ka piʻi kai a me ka hū ʻino. ʻO kēia kekahi o nā kaʻupu makua he mau kaukani e hoʻopūnana ana ma Pihemanu.  Courtesy: Lindsay Young/Pacific Rim Conservation

ʻO ka hoʻohuli aniau ke kolu ma ka papahelu o nā pilikia nohona no nā manu kai ma ka pae honua, a aia nō ia ma hope o nā lāhulu malihini a me ka hopu hewa o ka lawaiʻa, wahi a kahi noiʻi ma ka makahiki 2019 ma o nā noiʻi he 900. 

I loko nō o ka hoʻolako ʻana o nā mokupuni nui i ka ʻāina kiʻekiʻe a me ke kīpuka ma waho o ka hoʻohuli aniau, ua hoʻopilikia hou ʻia nā manu i nā mea i hoʻālo ʻia ma mua: ʻo nā kānaka, ʻo nā holoholona kūloko a nā lāhulu malihini. 

ʻO nā puaʻa, nā pōpoki a me nā ʻiole, ʻo ia nō ka pilikia nui loa i nā manu kai, no laila, he pono ke kau pā ʻana e kiaʻi pono ʻia ai lākou ma ko lākou mau home hou. 

Akā, ua hoʻopilikia pū hoʻi kekahi o nā mokupuni mamao e nā lāhulu malihini, e laʻa ʻo Pihemanu, ʻo ia kahi e ʻai ʻia ai nā mōlī e nā ʻiole hale i waiho ʻia ma ka moku ma hope o ke Kaua Honua ʻElua. ʻAi ka naonao malihini i nā manu kai kekahi. 

Hōʻike kēia palapala ʻāina i ka palena o Papahānaumokuākea Marine National Monument a puni nā mokupuni mamao i kokoke i nā mokupuni nui ʻewalu.  Courtesy: PMNM

Ua kūkulu aku nei ʻo PRC i kahi pā pale poʻiiʻa me ka lōʻihi he ʻelua mile e kūpale ana i nā ʻeka he 168 o Kīlauea Point National Wildlife Refuge ma Kauaʻi, a ʻo ia ka mea e kō ai kā lākou pahuhopu no ka nalowale ʻole ʻana, wahi a Young. 

“ʻO ka hehi e hiki mai ana, ʻo ia ka hoʻokō ʻana i ka loaʻa ʻana o nā pūʻuo ma o kēlā mau wahi a pau,” wahi a Young. 

ʻŌlelo ʻo Flint, ua holomua nui lākou me nā ʻakihihehiʻale, ʻoiai, e hōʻumeʻume ana nā manu i nā manu ʻē aʻe a lahalaha ka pūʻuo ke hoʻoneʻe ʻia nā holoholona e hoʻokumu ʻia ai kahi pūʻuo kahua e nā hui e like me PRC. 

“ʻO kēlā nō kā mākou nuʻu e kūlia aku ai, ʻo ia ka hoʻonui ʻana i ka uluō,” wahi a Flint. “Ma kai, ua maopopo leʻa ka hana iā lākou, a ikaika loa kēlā mau mea liʻiliʻi. Akā, inā ʻaʻole hiki iā lākou ke ʻimi i wahi e waiho ʻia kā lākou mau hua a hānai ʻia ai kā lākou mau keiki, e halapohe ana lākou.”

ʻO Ke Guano A Me Ke Olakino Kaiaola

Ma hope o ka pae ʻana o kahi mōlī ma nā pali hikina ʻākau o Molokaʻi ma Ianuali, ua haʻi ʻia ʻo Molokai Land Trust, e loaʻa koke ana nō paha nā kōkoʻolua hoʻopiʻi mua loa i kēlā wahi.

Molokai Land Trust The Mokio Preserve Albatross decoys near the edge of a cliff as recorded bird chirping echoes from 2 speakers installed near the pinnacle of the mountains.
ʻO Molokai Land Trust, i like me nā hui mālama ʻāina ʻē aʻe e hana ana me nā wahi hōʻumeʻume, hoʻohana lākou i nā manu kaʻana e hōʻumeʻume i nā manu maoli. No ka hoʻolohe ʻana i nā mea ʻē aʻe e pili ana i kā lākou hana, e hoʻolono mai i kēlā pukana aku nei o Stemming The Tide. Cory Lum/Civil Beat/2022

“Ua hoʻomaka lākou me ka hoʻokolonaio ʻana ma Kauaʻi, a ua hoʻoneʻe ʻia i Oʻahu. A ʻo ko mākou ʻike maka akula nō ia ma ʻaneʻi,” wahi Butch Haase, ʻo ia ka luna hoʻokō no MLT. “No laila, ʻo kēia ka pohaku i kau ʻia aku nei ma luna pono o ke kahua.” 

ʻO ka māhele ʻāina he 63 ʻeka, ua puni i nā pali a me kahi pā e hoʻopau koke ʻia, a he $1 miliona ke kumu kūʻai, he home hoʻi ia no ka ʻuaʻu kani, ʻo ia ka mea nāna e ʻeli a waiho i kā lākou pūnana ma lalo o ka honua. 

A, ʻo ka holomua o ke olakino noho loa o nā manu, kākoʻo ua holomua nei i ke kaiaola nui. ʻO ke kūkae o nā manu i kapa ʻia ʻo guano, he kīpulu nō ia e makepono ai ka ʻāina a me ke kai.  

ʻOiai, ua makeʻe nui ʻia ka guano ma ke ʻano he kīpulu, ua ʻeli ʻia ʻo Pihemanu ma ke kinohi o ke kenekulia 20, a ʻo ia ka home o ka pūʻuo mōlī nui loa ma ka honua nei. ʻO kēia hana luku i hōʻeuʻeu i kekahi o nā pale mālama ʻāina kahiko loa ma nā mokupuni mamao. 

Akā, inā waiho ʻia, hiki i ka guano ke hoʻēmi i ka hoʻohuli aniau. 

“ʻO kēla mau māhuola mai ka guano manu kai, hiki ia kē hoʻokīpulu i nā ʻōnaehana malina kapakai a hoʻonui i ka paʻapū a me ka like ʻole o nā lāhulu, mai ka ʻōlaula, a i ka limu, mai ka pūkoʻa a i ka iʻa,” wahi a Haase. 

Ma luna aʻe o kēlā, ua hōʻike ʻia, hoʻolako nā manu kai i nā mea koʻikoʻi i nā kaiaola ma ka Pakipika, wahi a Brad Keitt, ʻo ia ka luna o American Bird Conservancy’s Oceans and Islands Program.

An albatross comes in for a landing on the north shore of Kauai.
Ke pae nei kahi mōlī ma ke kapakai ʻākau o Kauaʻi. Nathan Eagle/Civil Beat/2022

Hoʻolako nā manu ʻeli e like me ka ʻuaʻu kani i ka naikokene malina he 15% a i 27%, a ʻo ia ka nui a nā kīpulu e hoʻopilipili aku ai e kākoʻo i nā kaiaola lāʻau. 

“He kuleana kupanaha ko kēia mau manu kai, ma luna aʻe o ka ʻike maka ʻia a me ka hoʻonanea ʻia ʻana o lākou,” wahi a Keitt. “He māhele koʻikoʻi lākou o kēia mau kaiaola mokupuni a me ka ʻāina a puni.”

ʻO Nā Pilikia E Hoʻohui Ana

Ke hoʻopilikia aku ka piʻi ʻilikai i ka wā ma hope o nā manu kai, ke hoʻopilikia pū hoʻi nei ka hoʻohuli aniau i nā manukai a me ko lākou wela kino ma ke anilā wela a me ko lākou hiki ʻana ke ʻimi ʻai ma o ka Pakipika. 

An albatross with a chick on the north shore of Kauai.
He mōlī me kāna keiki ma ke kapakai ʻākau o Kauaʻi.  Nathan Eagle/Civil Beat/2022

ʻO nā loli anilā ma loko o ka nā makahiki ʻo El Nino lāua ʻo La Nina, ʻo ia nā mea e kōkua mau iā Pacific Rim Conservation ma ke kuhi ʻana i ke ʻano o ka huakaʻi ʻana o nā mōli e ʻimi i ka ʻai na kā lākou mau keiki ma ko lākou noho pūnana ʻana. Akā, ke hoʻololi nā nui iʻa i nā ʻano huakaʻi, he pono ko nā manu e hoʻololi pū ma ko lākou lele ʻana i ʻĀlaka, Iāpana, a me Mekiko. 

“Inā mamao loa ka ʻimi ʻai ʻana na ke keiki, inā hoʻololi ka palena wahi i loaʻa ka ʻai a hoʻākea iki ʻia, ʻaʻole nō paha e hiki ke hoʻi pono i nā keiki no ka hānai ʻana iā lākou,” wahi a Young me ka ʻōlelo hou ʻana, ma kēlā kau hoʻopiʻi aku nei, ua hoʻēmi ʻia ka helu ola no nā manu keiki. “Hōʻike kēlā helu i ʻāiki no nā mea e hiki mai ana ma ka hoʻololi ʻia ʻana o ke kai.”

ʻOiai, he holoholona hana maʻa, hoʻomākaukau ʻia nā manu keiki e lele ma ka wā like o kēlā me kēia makahiki, ma ke kauwela, e hopu i ka iʻa a me ka mūheʻe ma ka wā e nui ai ka lako. Akā, ke nui ka wela, e hōʻea ana nō paha ka wā e lako ai ka iʻa ma mua o kēlā wā. 

“Hiki nō paha ia ke hoʻopilikia i ko lākou noho loa ʻana,” wahi a Young. 

ʻO Ka Pedialyte A Me Nā Iʻa Maka

Ke hoʻoneʻe ʻia nā manu e like me nā mōlī, a i ʻole, ʻaʻole hoʻi ko lākou mau mākua mai ka huakaʻi mai i ka wā kūpono, lilo nā hui e like me PRC i makua hānai ma o ka hānai ʻana iā lākou i ka iʻa he paona ma kēlā me kēia lā a me ka Pedialyte e mau ai ka māʻona a me ke kena. 

“Ke heluhelu nei kākou i ka nele ʻana o ka ʻai pēpē ʻole ma kēia manawa,” wahi a Young. “Pēlā ke ʻano no Pedialyte a me nā wai electrolyte ma ka wā i hala, a he mau wā ko laila i hiki ʻole iā mākou ke loaʻa.” 

ʻŌlelo nā ʻaʻa ma ka Moku ʻo Kure ma nā mokupuni mamao, mau nō ko lākou ʻeli ʻana e hoʻokuʻu ʻia ai nā manu kai mai lalo mai o ke one, e laʻa kēia kaʻupu, ma muli o nā kai eʻe, nā ʻino nui, a me nā kai e piʻi ana.  Cynthia Vanderlip/DLNR

Ua hoʻopilikia kikoʻī ʻia ka mōlī, e like me nā manu kai ʻē aʻe, ke hoʻopūnana nei lākou i nā wahi i hiki ʻole ke hele ʻia, a ma hope o ke kiko ʻana, hala ʻelima mau mahina ma mua o ka lele ʻana. 

Ua pili kēia i nā pilikia mālama ʻāina no nā mea mālama ʻāina iho, ʻo lākou nā mea e hānai lima i nā manu, a he pono ka loaʻa ʻana o ka iʻa maka a me ka Pedialyte na nā manu i loko nō o ka noʻonoʻo ʻana i ke kapuaʻi wāwae kalepona ma o ka huakaʻi ʻana. 

“No laila, ʻaʻole makepono kēia i nā wahi mamao loa e pilikia ai ka halihali lako ʻana,” wahi a Young. 

Eia naʻe, i loko nō o nā hōʻailona maikaʻi ʻole no nā manu, lana ka manaʻo o Flint no FWS, e lele aʻe ana nō nā manu a ʻimi i nā wahi noho ʻē aʻe.

He ʻano maikaʻi loa ko lākou: hiki iā lākou ke lele i nā mile he mau kaukani no ka ʻimi ʻana i ka ʻai a me ka home.

“Ua makepono kēlā iā lākou no nā makahiki he 30 miliona, a lana koʻu manaʻo, e hoʻomau aku ana pēlā,” wahi a Flint. 

Ua kākoʻo ʻia kā Civil Beat kūkala nūhou ʻana e pili ana i ka hoʻohuli aniau e ka Environmental Funders Group ma ka Hawaii Community Foundation, ʻo Marisla Fund ma ka Hawaii Community Foundation a me ka Frost Family Foundation. 

Ua kākoʻo hapa ʻia kā Civil Beat kūkala nūhou ʻana i ke Kalana o Maui e nā haʻawina kālā na Nuestro Futuro Foundation a me Fred Baldwin Memorial Foundation. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

Quality journalism takes time.

A story that takes fives minutes to read often takes days to report.
 
Quality journalism takes time and resources to produce, but with support from readers like you, Civil Beat can investigate issues and publish stories that are otherwise difficult to fund.
 
Become a donor and help support Civil Beat’s next investigation.

About the Author