Kā ka luna hoʻoponopono nota: Unuhi ʻia na Ākea Kahikina. Click here to read this article in English.

Me ke komo ʻokoʻa ʻana i ka ʻaʻahu ʻeleʻele, ua kū ka haku lole kaila ʻo Micah Kamohoalii me kāna mau kānaka hōʻike lole no ʻehā hola ma nā alahele o Lādana. ʻAʻahu nā poʻohiwi i nā ʻahuʻula, a kū kiʻekiʻe kekahi mau kāhili ma luna o ka lehulehu e kakali ana i ke kanu ʻia ʻana o ka Mōʻīwahine ʻo Elizabeth ka Lua. 

Ka Ulana Pilina Badge Olelo HawaiiMa ka hōʻea ʻana mai o ka pahu kupapaʻu, ua hīmeni mālie ʻo Kamohoalii a me kāna mau kānaka hōʻike lole iā “Aloha ʻOe,” ʻo ia hoʻi kekahi mele kaulana i haku ʻia na ka Mōʻīwahine ʻo Liliʻuokalani. 

ʻO Kamohoalii, aia ʻo ia ma ke kapikala o ke Aupuni Mōʻī Hui Pū ʻIa no London Fashion Week, a ʻōlelo ʻo ia, penei nō nā Kānaka Maoli e hoʻohanohano kuʻuna ai i ka hala ʻana o kekahi. 

“ʻAʻole kēia he hana keaka no mākou,” wahi a Kamohoalii. “Inā hala ko mākou aliʻi, penei kā mākou hana. I loko nō o ke kākoʻo a me ke kākoʻo ʻole ʻana o mākou iā ia, ua maopopo nō iā mākou ka hoʻohanohano aliʻi ʻana.”

Native Hawaiian fashion designer Micah Kamohoalii and his models paid their respects to Queen Elizabeth II, who died earlier this month.
Native Hawaiian fashion designer Micah Kamohoalii and his models paid their respects to Queen Elizabeth II, who died earlier this month. Courtesy: Dezigns by Kamohoalii/2022

Ma Lādana, ua hōʻihi ka haku lole kaila Kanaka Maoli ʻo Micah Kamohoalii a me kāna mau kānaka hōʻike lole i ka Mōʻīwahine ʻo Elizabeth ka Lua, ʻo ia ka i hala akula ma Kepakemapa. 

ʻO Elizabeth, ʻo ia ko ka UK mōʻī i noho mōʻī me ka lōʻihi loa, ua hala loa ʻo ia ma kinohi o Kepakemapa, a 96 ona makahiki. ʻO kona hoʻolewa ma ka lā 19 o Kepakemapa, ua nānā nā kānaka he 28 miliona ma ka UK a me nā kānaka he mau miliona ma o ka honua, wahi a BBC News. 

I loko nō o ka uē ʻana o nā kānaka he nui i ka hala ʻana o Elizabeth, ʻaʻole like ka manaʻo walohia ma Hawaiʻi a me nā aupuni Pakipika ʻē aʻe, ʻo ia nā mea i noho akula ma lalo o ke aupuni kolonaio. No nā Kānaka Maoli hoʻi, ua nui ka hihia i pili i ka hala ʻana o ka mōʻīwahine, a nui nā kānaka e hāpai manaʻo aʻe ana ma ka pāpaho pilikanaka ma nā pule ma hope pono aku o kona hala ʻana.  

ʻŌlelo kekahi, he hoʻomanaʻo minamina kēia no ka hala ʻana o ka mōʻī o kahi aupuni, a ʻōlelo hoʻohalahala kekahi ʻē aʻe iā Elizabeth, no ka mea, he hōʻailona nō ʻo ia i ka moʻolelo hoʻokolonaio o ke aupuni mōʻī. 

ʻAʻole i hoʻokolonaio ʻia ʻo Hawaiʻi e ka UK, akā ua noho ia ma lalo o kahi palapala ʻaelike ma mua o ka lilo ʻana o Pelekania i aupuni mua loa i hōʻoia i ke kūʻokoʻa o Hawaiʻi ma ka makahiki 1843. Ua hoʻouluulu ʻia ko Hawaiʻi aupuni mōʻī e ko Pelekania aupuni mōʻī. 

Kākoʻo mau kekahi mau moʻomeheu i ka noho aupuni mōʻī ʻana, akā kūʻē nui ʻia ka noho aupuni mōʻī ʻana ma o ka honua, wahi a ka hoʻopaʻa moʻolelo ʻo DeSoto Brown ma ka hale hōʻikeʻike o Bihopa. 

“Ma ka wā i hōʻihi ʻia ai ka mōʻī, ua hoʻohalahala ʻia nō naʻe e ka lehulehu,” wahi a Brown ma kahi leka uila. “ʻO kona hoʻomau ʻia ʻana ma nā wahi like ʻole, he hōʻike ia i kona waiwai, akā naʻe, ʻike ʻia hoʻi ia ma ke ʻano he hōʻike ia i ka hana ʻino ʻana i nā kānaka no ke aupuni home a me nā kānaka i hoʻokolonaio ʻia, no laila, he mea ia e kūʻē ʻia.”

Portrait, Queen Victoria, Iolani Palace, Artifact
He kiʻi kēia o ko Pelekania Mōʻīwahine ʻo Victoria i hāʻawi ʻia i ka Hale Aliʻi ʻo ʻIolani e ka Mōʻīwahine ʻo Elizabeth ka Mua.  David Croxford/Civil Beat/2022

No kekahi mau kanaka he nui, he hōʻailona ʻo Elizabeth i ka wā e hoʻolaha aʻe ai ʻo ka UK i kona mana naʻi ma o ka honua. ʻO ka hapanui o nā aupuni, e laʻa ka Pakipika, ua hoʻokolonaio ʻia ma ka wā i noho mōʻī ai ka mōʻīwahine ʻo Victoria ma ke kenekulia 19. 

Akā, ʻo Elizabeth, ʻo ia ka i lilo i mōʻī ma ka makahiki 1952, ua kākoʻo ʻo ia i ka hoʻēmi kolonaio, wahi a ka Polopeka ʻo Niklaus Schweizer ma ke Kulanui o Hawaiʻi, ʻo ia ke noiʻi i ka moʻolelo o ʻEulopa a me ka Pakipika. 

Wahi āna, ua lilo nā aupuni he mau kākini i aupuni kūʻokoʻa ma ka wā i noho mōʻī ai ʻo Elizabeth, e laʻa ʻo Ghana, ʻo Sāmoa, ʻo Aotearoa, ʻo Fiji, ʻo Papua New Guinea, a me Rarotonga. 

Ua kālele hoʻi ʻo Schweizer, ʻaʻole i hoʻokolonaio ʻia ʻo Hawaiʻi e ka UK, no ka mea, ua hōʻoia ka poʻe Pelekania i ke kūʻokoʻa o ke aupuni mokupuni ma ka makahiki 1843. 

“Aia nō a komo ʻia kēlā pae, ʻaʻole hiki ke hoʻokolonaio ʻia,” wahi a Schweizer. “Akā, he huikau nui ko laila. Kuhihewa nā kānaka he nui, hoʻokolonaio ʻia ʻo Hawaiʻi, akā ʻaʻole pēlā ka ʻoiaʻiʻo.”

“He hoʻokolonaio noʻonoʻo ko laila, ʻo ia ka i hiki maila ma hope o ka hoʻokahuli ʻana i ka Mōʻīwahine ʻo Liliʻuokalani,” wahi āna. “Akā, ʻaʻole i hana ʻia ka hoʻokolonaio politika ma ʻaneʻi nei. No laila, ma kēlā ʻano, ʻokoʻa ʻo Hawaiʻi, a ʻokoʻa ʻo Tahiti a me nā hui mokupuni ʻē aʻe.”

He Pilina Lua ʻOle

ʻO ko Hawaiʻi pilina me ka UK ma ke kenekulia 19, he waipahē ke ʻano a he pilikia ke ʻano, wahi a Brown. 

“E like me ka mea i ʻike nui ʻia, ua hoʻokolonaio ikaika ʻo Pelekania i nā ʻāina ma o ka honua no nā makahiki he mau haneli, a ua hiki iā Hawaiʻi ke lilo i wahi e makeʻe ʻia pēlā,” wahi a Brown. “Ma ka manawa like naʻe, ua huli akula nā mōʻī Hawaiʻi iā ʻEnelani no ke kōkua a me ke alakaʻi ʻana a ua makemake ʻia kahi pilina waipahē.”

Ma o ke kenekulia 19, ua hoʻohālikelike ʻo Hawaiʻi i kekahi mau mea haole, e laʻa ka mea kaua e like me ka pū, ka pikineki kauʻāina, a me ka haku ʻana i hae aupuni. 

Ua hoʻomaka ʻia ko Hawaiʻi pilina me nā haole ʻilikea ma nā makahiki 1700 ma hope o ka hiki ʻana mai o ke kāpena ʻo James Cook. Wahi a ka hoʻopaʻa moʻolelo ʻo Zita Cup Choy ma ka Hale Aliʻi ʻo ʻIolani, ua lawe akula ʻo Kamehameha ka Nui i nā manaʻo a me nā mea pono e like me nā pū maiā Cook mai, “i hiki iā ia ke hoʻoikaika iā ia iho a me kona lāhui, a ʻo kona naʻi akula nō ia i nā mokupuni i aupuni hoʻokahi ma ka makahiki 1820.”

Paʻi ʻia ka Union Jack ma ka hae mokuʻāina, ʻo ia ka i haku ʻia ma ka makahiki 1816. Me ke kūkākūkā ʻana me ke kāpena Pelekāne ʻo George Vancouver, ua haku ʻo Kamehameha ka Nui i ka hae no ka hoʻouna ʻana aku i kona moku i Kina no ke kūʻai ʻana aku i ka ʻiliahi, wahi a Cup Choy. 

Hawaiian Flag, Union Jack
ʻO ka Union Jack, he māhele ia o ka hae Hawaiʻi.  David Croxford/Civil Beat/2022

“ʻO Pelekania Nui, he hoa ʻo ia o Hawaiʻi,” wahi a Cup Choy. “ʻO Palani a me Luʻukia, ʻo lāua nō nā aupuni mana nui ma kēlā wā. ʻO ka Union Jack, a me nā waihoʻoluʻu he ʻulaʻula, he keʻokeʻo, a he uliulu, ʻo ia nā mea e hōʻike i nā aupuni ʻē aʻe, he mau hoa ikaika loa ko mākou.” 

Eia naʻe, ua hele a hihia kēlā pilina ma ka makahiki 1843 ma muli o ka Paulet Affair, ʻo ia ka wā i kāʻili ʻia ai ke ea o Hawaiʻi e kahi ʻelele Pelekania. 

Ua hoʻihoʻi ʻia ko Hawaiʻi ea ma kēlā makahiki like ma hope o ka huakaʻi ʻana mai o ka ʻAkimalala Pelekania ʻo Richard Thomas i Honolulu me ka loaʻa ʻana o ka hae Hawaiʻi iā ia e hoʻopau ai i ka noho aupuni hewa ʻana. Ua hōʻoia ʻia ʻo Hawaiʻi ma ke ʻano he aupuni kūʻokoʻa ma ka makahiki 1843. 

I kēia lā, hoʻohanohano ke Kuea ʻo Thomas i kēlā lā, a ʻo ia kekahi o nā wahi ma Hawaiʻi e ʻāpono ʻia ai ka hae Hawaiʻi e kū a welo me ka mehameha. 

ʻO ka hapanui o nā ʻaʻahu a me nā kāhiko o ka mōʻī Hawaiʻi, keu hoʻi ka wā i noho mōʻī ai ʻo Kalākaua, ua hoʻohālikelike ʻia i ko ʻEulopa “i hiki iā ia ke hoʻohālikelike iā ia iho a me kona aupuni i ke kūlana like o nā aupuni hanohano ʻē aʻe,” wahi a Brown. 

“Ua hoʻāʻo ʻo ia (ʻo Kalākaua) e hoʻākea i ka mana o kona aupuni ma ka Pakipika ma o kahi hui kuʻikahi me Sāmoa (ʻaʻole i holo pono, no ka mea, ua hoʻāʻo ʻē ʻo Kelemania i ka naʻi ʻana i kēlā aupuni),” wahi a Brown. “Ua hāpai ʻo Kalākaua i ka male ʻana o kāna kaikamahine hanauna ʻo Kaʻiulani a me kahi keiki aliʻi no Iāpana, a pēlā ka hana ma ʻEulopa no nā kenekulia he nui no ka mālama ʻana i nā pilina ma waena o nā aupuni. Ua holo pono ʻole kēia, no ka mea, ʻo ke keiki aliʻi Kepanī — he keiki maoli ʻo ia ma kēlā wā — ua loaʻa ʻē iā ia kahi male i hoʻohiki ʻē ʻia ma kona wā e hiki mai ana.”

Iolani Palace Artifact, Etching,
He kiʻi kālai kula i hāʻawi manawaleʻa ʻia i ka Hale Aliʻi ʻo ʻIolani no ka ʻAha Iupilē Kula o ka Mōʻīwahine ʻo Victoria ma Westminster Abbey. Aia ka Mōʻīwahine ʻo Kapiʻolani a me ke Kamaliʻiwahine ʻo Liliʻuokalani ma ʻaoʻao hema.   David Croxford/Civil Beat/2022

Ma loko o ka Hale Aliʻi ʻo ʻIolani e noho ai ʻelua kiʻi kālai kula i pili i ka mōʻī Pelekania. Ua makana ʻia ka Hale Aliʻi ʻo ʻIolani e Elizabeth i ke kiʻi maoli o ka Mōʻīwahine ʻo Victoria ma kona wā ʻōpiopio mai ka makahiki 1838. ʻO ke kiʻi kālai kula ʻē aʻe, hōʻike kēia kiʻi i ko ka Mōʻīwahine ʻo Victoria ʻAha Iupilē Kula ma Westminster Abbey, a aia ma ke kiʻi, ʻo ia nō ka Mōʻīwahine ʻo Kapiʻolani a me ke Kamaliʻiwahine ʻo Liliʻuokalani. 

“Ma muli o ko lāua moʻokūʻauhau, ua ʻoi loa aʻe ko lāua kūlana ma luna o nā aliʻi ma laila,” wahi a Cup Choy. “Ua hoʻokipa ʻo ia iā lāua, ua honi ʻo ia i nā papalina, ua hoʻolauna ʻo ia i kāna mau keiki, me he mea lā, ʻo lākou mōʻī nō paha he mau kaikuaʻana a kaikaina hoʻi.” 

Pā Ka Naʻau I Nā Manaʻo Like ʻOle

ʻO ka hala ʻana o Elizabeth, ua pā ka naʻau i nā manaʻo like ʻole no nā kamaʻāina ma Hawaiʻi. I loko nō o ka uē ʻana o kekahi, ua hele a pilikia kekahi ʻē aʻe. 

ʻO Noe Noe Wong-Wilson, ua nānā ʻo ia i ka hoʻolewa ma ke kīwī, a ʻōlelo ʻo ia, ua kaumaha ʻo ia, a ʻo ko Elizabeth hala ʻana, he hoʻomanaʻo ia no ka hala ʻana o ka mōʻī o kahi aupuni. 

“ʻO kēia ka hala ʻana o kahi wā holoʻokoʻa,” wahi a Wong-Wilson. “Ua kaumaha loa wau. Ua paʻa koʻu maka i ke kīwī a me ka ʻike ʻana i ka uē ʻana o ke aupuni. Noʻu iho, ua like nō paha ia me ka mea i pā ai ka naʻau o ko kākou lāhui ma ka hala ʻana o Liliʻuokalani.”

Wahi a kahi haumāna ʻo Nainoa Kahiona ma ke Kulanui o Hawaiʻi, ʻaʻole ʻo ia i nānā i ka hala ʻana o Elizabeth, akā ua pūʻiwa ʻo ia i kona hala ʻana. 

“ʻAʻole au e hoʻolauleʻa, ʻaʻole au e uē, no ka mea, ʻaʻohe aʻu mea e mahalo pono aku ai i pili i ka ʻohana aliʻi,” wahi āna. 

Wahi a Kahiona, ua ʻike ʻo ia i ka pilina o Hawaiʻi me nā mōʻī Pelekane, akā ʻōlelo naʻe ʻo ia, “ma ka wā hoʻokahuli aupuni, ʻaʻole i kākoʻo ʻo Pelekania i ka Mōʻīwahine ʻo Liliʻuokalani no ka noho mōʻī hou ʻana.” 

Aia ʻo Kamohoalii ma Lādana no ka pule lole kaila e hōʻikeʻike ʻia ai kāna mau lole ma ke alahele hōʻike lole. Ua ʻōlelo akula ʻo ia, he kūpono kona hōʻihi ʻana iā Elizabeth ma muli o ko Hawaiʻi pilina me nā mōʻī Pelekania. 

“He pilina makamaka ko kākou mau kūpuna me nā kūpuna kuakahi a me nā kūpuna kualua o ka Mōʻīwahine ʻo Elizabeth,” wahi āna. “No laila, ua manaʻo ihola mākou, he kūpono nō ko mākou kū ʻana ma laila no ka hāʻawi aloha ʻana, no koʻu moʻokūʻauhau a me kona moʻokūʻauhau kekahi.”

Ma muli o kekahi wikiō e hōʻike ana i ka hīmeni ʻana o Kamohoalii a me kāna mau kānaka hōʻike lole iā “Aloha ʻOe” ma Lādana, ua hāpai ʻia ka leo kākoʻo a me ka leo hoʻohalahala ma nā kahua pāpaho pilikanaka e laʻa ʻo Instagram, Facebook, Tik Tok, a me Twitter. Wahi āna, ua hala ʻelua lā ma mua o kona kāpae ʻana i “nā manaʻo ʻino” ma kāna pāpaho pilikanaka. 

ʻŌlelo aku kekahi mau ʻōlelo hoʻolaha, “ʻO ka hīmeni ʻana i ke mele na ka Mōʻīwahine ʻo Liliʻuokalani, he ʻino loa kēlā,” wahi a kahi kanaka ma Twitter e pili ana i ka wikiō. 

ʻŌlelo akula ʻo Kamohoalii, kānalua nō paha kekahi mau kānaka ma Hawaiʻi i ka hala ʻana o ka mōʻīwahine ma muli o ka naʻaupō a me ka ʻeha o loko i pili i ka hoʻokahuli ʻana i ke Aupuni Hawaiʻi. 

“Penei nō paha kā lākou ‘No ke aha e mau ai kou aupuni, a no ke aha i kāʻili ʻia aku ai ko mākou aupuni? Inā he hoa kāua, no ke aha ʻoe i kōkua ʻole mai ai iā mākou ma ka hoʻihoʻi aupuni ʻana?” wahi a Kamohoalii. 

I loko nō o ka mahalo ʻana o nā kānaka i nā aliʻi, ua hele a liʻiliʻi ka mahalo ma o ka holo ʻana o ka wā. Wahi a Brown, ʻo ke kuleana hanohano o Elizabeth, he hōʻailona nō ia i ke koena o ke Aupuni ʻEmepela, a ua nalowale akula ka hapanui o ua kuleana nei. 

“ʻOiai, ua liʻuliʻu nō a ua hele a kūʻokoʻa nā panalāʻau, ua emi ka pilikia a me ka hana ʻino ʻana,” wahi a Brown. “ʻO ka hapanui o nā kānaka e noho ana ma lalo o wā hoʻokolonaio, ua make loa lākou, a ʻaʻole nui ka noho ʻana pēlā i kēia manawa. No laila, ʻo ka mea nui i pā ai ka naʻau, ʻo ia ke kaumaha a me ka minamina ma ka hopena o ka wā lōʻihi loa me nā kau palena mōakāka.”

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

An Important Note

If you consider nonprofit, independent news to be an essential service that helps keep our community informed, please include Civil Beat among your year-end contributions.

And for those who can, consider supporting us with a monthly gift, which helps keep our content free for those who need it most.

This year, we are making it our goal to raise $225,000 in reader support by December 31, to support our news coverage statewide and throughout the Pacific. Are you ready to help us continue this work?

About the Author