Kā ka luna hoʻoponopono nota: Unuhi ʻia na Ākea Kahikina. Click here to read this article in English.

ʻAʻole mākaukau ke Keʻena Kuleana Hawaiʻi i ka hāʻawi pio ʻana i ke kūkulu nuʻuoʻa ʻana ma kekahi mau māhele ʻāina ona ma ka ʻaekai o Kakaʻako. 

Ua koho ka papa kahu waiwai o OHA ma ka Pōʻahā e hōʻole i ke noi mai ka Wahaʻōlelo o ka Hale ʻo Scott Saiki no ka ʻae ʻana mai i ka uku he $100 miliona kālā i mea e mau ʻole ai ko lākou noke ʻana e hoʻonoa i ke kapu noho hale ma nā ʻāina o OHA ma Kakaʻako Makai. 

Ua hoʻoili ʻia kēlā mau ʻāina ma luna o OHA ma ka makahiki 2021 ma ke ʻano he ʻaelike no ka hoʻonā ʻana i ka hihia i pili i ka uku ʻia ʻana o OHA e ka mokuʻāina no ka hoʻohana ʻana i ka ʻāina lehulehu. He $200 miliona kālā ka waiwai o ka ʻāina i ʻaelike ʻia ma kēlā manawa, a ke kuhi nei naʻe ke keʻena, he $90 miliona kālā ka waiwai maoli ma kēlā manawa. 

ʻO ka uku i hāpai ʻia e Saiki, he māhele liʻiliʻi nō ia o ke kālā i ʻaiʻē iā OHA ma nā uku ʻē aʻe mai ka ʻāina lehulehu mai, wahi a ke keʻena ma kekahi ʻōlelo hoʻolaha. 

ʻO ka pāpā ʻia ʻana o ke kūkulu hale ʻana, “he hopena ʻino loa kēlā no ka waiwai o ka ʻāina ma Hakuone,” wahi a ka ʻōlelo i hoʻolaha ʻia, ka mea i kuhi aku i ka inoa hou a OHA i kapa aku ai i kona ʻāina ma Kakaʻako. 

Ua lanakila ʻole kā OHA hana e hoʻonoa i ke kapu kūkulu hale ma hope o ka holomua ʻole ʻana o Senate Bill 1235 ma ka Hale. Ua eo kekahi pila like ma ka Hale ma ka makahiki 2021. Hiki iā OHA ke kūkulu i nā nuʻuhaʻa ma kekahi mau māhele ʻāina a me kekahi mau kikowaena kūʻai. 

Wahi a Carmen Hulu Lindsey, ka luna noho o ka papa o OHA, ua pili nō kēia i ke kaulike. 

“Ke noi aku nei mākou i nā pono like o nā hui kūkulu hale no ka ʻāina ʻē, no ka mea, mau nō ke kūkulu ʻia ʻana aʻe o kā lākou mau nuʻuoʻa me ke ālai ʻole ma haʻi pono o Hakuone,” wahi āna ma ka ʻōlelo hoʻolaha. 

Hoʻomau aku ʻo ia, ʻike ʻo OHA i ka ʻāina ma ke ʻano “he ʻenikini hoʻokele waiwai, he wahi i kū kokoke i ka mole kiwikā, kahi a mākou e hōʻike aku ai i ko mākou moʻomeheu, kahi hoʻi e hoʻopulapula ʻia ai nā ʻohana a me nā hui ʻoihana.” 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.