Kā ka luna hoʻoponopono nota: Unuhi ʻia na Ākea Kahikina. Click here to read this article in English.

E mau ana ke kula hoʻāmana aupuni ʻo Kamalani Academy ma Wahiawā, Oʻahu no ʻelua mau makahiki hou aku ma muli o kona ʻae ʻana mai e hoʻololi i kona papa luna a e hoʻoikaika i ka mālama ʻana i nā palapala e helu ʻia ai ka hele a me ka hele ʻole ʻana o nā haumāna i ke kula. 

ʻO kēia huli ʻana, ua hana ʻia ma hope o ke koho pāloka ʻana o ka ʻAha Kula Hoʻāmana ma Pepeluali e hoʻomau ʻole aku i ka palapala ʻaelike o ia kula ma muli o kekahi polokalamu aʻo pūnaewele i hoʻāpono ʻē ʻole ʻia a me nā pilikia ma ka palapala ʻana i ka hele kula ʻana o nā haumāna mai ka makahiki 2021 aku. 

Ua hoʻopiʻi pono ke kula hoʻāmana aupuni i ka hopena i ka Papa Hoʻonaʻauao, ka mea nāna i hōʻike mai, ʻaʻole mōakāka ke kuhi ʻana o ke komikina i nā pilikia kikoʻī i kūikawā e pono ai ka hoʻomau ʻole ʻana aku. 

Ua pūlima ʻo Kamalani Academy i kekahi palapala ʻaelike hou no ʻelua makahiki me ke komikina ma Mei, a loaʻa nā ‘ōlelo hoʻopaʻa no ka nānā pono ʻana i ke kālā a me ke kau inoa ʻana o nā haumāna a me ka loiloi ʻana i ka luna o ke kula kekahi. 

Ma o ka ʻaelike ʻana, pono ke kāpae ʻia ka luna papa o ke kula a kūkulu hou ʻia, eia naʻe, ma ka Pōʻahā, ʻaʻole i loaʻa mai i ke komikina kekahi palapala noi no ka hoʻomaka ʻana i kēīa kūkulu hou ʻana. Aia nō a koho ʻia ka papa luna hou, e pau ana ka nānā ʻana o ka papa luna kahiko i ia kula. 

E koi ʻia ana ʻo Kamalani Academy e hoʻouna aku i nā palapala hōʻike kālā i kēlā me kēia mahina i ke komikina a e hōʻike hoʻi i ka hōʻoi ʻana aku i ka ʻōnaehana helu haumāna ma muli o ka palapala ʻaelike. 

ʻAʻole i hāpai manaʻo mai ka Papa Hoʻonaʻauao no kēia kumuhana. Ua kuhi mai ka ʻAha Kula Hoʻāmana i ka moʻoʻōlelo o ka hālāwai nui mai ka Pōʻahā, akā ʻaʻole lākou i hoʻomau mai i ka wehewehe ʻana. 

ʻO Amanda Fung ke poʻokula, a nāna nō i haʻalele i ia kūlana ma ka Pōʻaono, a e lilo ana ʻo Kawena Martinez i luna kūikawā, wahi a ke komikina. Wahi a Miguel Gonzalez, ka wahaʻōlelo no Kamalani Academy, ʻaʻole i pili ka haʻalele ʻana o ke poʻokumu i ke kūkulu hou ʻia ʻana o ka papa luna. 

ʻO Justine Shively, ʻelua āna keiki i hele i kēia kula no nā makahiki he ʻelua me ka hapa, a ʻōlelo mai ʻo ia, pīhoihoi nō nā mākua i ka hoʻololi ʻana, a hauʻoli hoʻi lākou i “ka hoʻomau ʻia ʻana o ke kula no nā keiki.” 

Ua komo aku kāna mau keiki i kekahi hālāwai hōʻeuʻeu no ka hoʻopakele ʻana i ke kula ma hope o ka hoʻopiʻi ʻia ʻana o ke koho a ke komikina. ʻŌlelo mai ʻo ia, i kēia kula hoʻāmana ʻo ia i hoʻouna aku ai i kāna mau keiki ma muli o ka liʻiliʻi o nā papa, a hiki iā lāua ke aʻo mai i ka moʻomeheu Hawaiʻi. 

ʻŌlelo mai ʻo Shively, he mea nui ka nānā pono ʻia ʻana o ke kula, a ua haʻi aku ka papa luna i nā mākua i ko lākou hoʻololi ʻana a me ka nānā hou ʻana i ka palapala ʻaelike ma ka makahiki 2025. 

ʻO Kamalani Academy, he kula ma lalo o Nā Mea Hawaiʻi Arts Integration, ka mea nāna i hoʻomaka ma ka makahiki 2017 me ka papa haʻawina e kālele ana i ka hana noʻeau. He 150 mau haumāna kāna. 

Ua hoʻohalahala ʻia ke kula ma ka makahiki 2021 ma o kekahi ʻŌlelo Hōʻike Hopohopo i pili i ka hemahema o kona helu haumāna ʻana ma ka hoʻomaka ʻana o kekahi polokalamu aʻo pūnaewele i hoʻāpono ʻē ʻole ʻia, ka mea nāna i hoʻokomo aku i nā haumāna he 169 i hiki ʻole ke helu pono ʻia. A, ʻo ke kauoha akula nō ia o ke komikina e kāpae aku i 183 mau haumāna ma ka papa helu inoa haumāna kūhelu.

ʻO ka palapala ʻaelike hou, he hoʻolōʻihi ʻana nō ia mai ka makahiki 2023 a i 2025, a ʻoi aku ka pōkole o kēia ma mua o nā palapala ʻaelike he ʻelima makahiki, ka mea hoʻi i hāʻawi ʻia i nā kula hoʻāmana ʻē aʻe he 35 ma ka mokuʻāina. 

ʻO kā Civil Beat kūkala nūhou ʻana i pili i ka hoʻonaʻauao ʻana, ua kākoʻo ʻia e kekahi haʻawina kālā maiā Chamberlin Family Philanthropy. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.