Wahi a Meia Richard Bissen, ke ʻimi nei ko Maui i nā hana e lilo ai nā hale hoʻokipa malihini no ka wā pōkole i mau wahi noho loa no nā kamaʻāina i hoʻoneʻe ʻia. 

Kā ka luna hoʻoponopono nota: Unuhi ʻia na Ākea Kahikina. Click here to read this article in English.

Ua kū nā meia ʻehā ma ke kahua like ma ka Pōʻahā ma ka ʻahahui a ke Council for Native Hawaiian Advancement no kekahi kūkākūkā ma ke ʻano he pānela i pili i ka hana e pono ai ka noho paʻa ʻana o nā ʻohana kupa ma Hawaiʻi — he hopena i kūkākūkā pinepine ʻia ma kekahi mokuʻāina i hoʻokaumaha ʻia e kekahi pōpilikia lōʻihi no ka noho hale ʻana. 

Ua haʻi ‘ōlelo maila ʻo Meia Derek Kawakami no Kauaʻi e pili ana i ka hoʻokuʻu ʻana i kona mau hoa aloha nāna i kūʻēʻē loa i kāna hoʻolālā kūkulu hale pipiʻi ʻole ma ko lākou kaiāulu. A ua kālele hoʻi ʻo ia i ke ʻano e loli ai ka hana ke hōʻeuʻeu ʻia nā kaiāulu e kālai i ka hana a ke keʻena hoʻolālā o ke kalana, ma kahi o ka ʻēkoʻa. 

  • Civil Beat stories ma ka ʻōlelo Hawaiʻi

Ua kālele pū maila ʻo Meia Mitch Roth no Hawaiʻi i ke koʻikoʻi o ka ʻae ʻia ʻana mai o ka holomua ʻana ma ʻō aku o ka mea maʻamau. Inā lohi a waiwai ʻole ka ʻōnaehana hōʻae o ke kalana, wahi āna, e aho e hoʻololi i nā kānāwai nāna e hoʻololohi nei i ka hana. 

“Nui nā manawa e paʻa ai kākou i ka mea i makemake ʻole ʻia,” wahi a Roth. “ʻO ka mea maʻamau ma Hawaiʻi Mokupuni, ʻaʻole mākou makemake i ke kūkulu hale, ʻaʻole makemake iā TMT, ʻaʻole makemake i kēia. Kālele mākou i nā mea i makemake ʻole ʻia ma kahi o nā mea i makemake ʻia.” 

Kauai Mayor Derek Kawakami hugs Maui Mayor Richard Bissen after opening with a sentimental appreciation for the neighbor island leaders after the Aug. 8 fires Wednesday, Nov. 16, 2023, at the 22nd Native Hawaiian Convention at Maui Arts & Culture Center in Kahului. The mayors including Honolulu Mayor Richard Blangiardi, seated left, and Hawaii County Mayor Mitch Roth were part of a panel discussion Hawaii’s Mayors: A Collective Commitment to Housing.(Kevin Fujii/Civil Beat/2023)
Eia mai ʻo Meia Derek Kawakami no Kauaʻi ke pūliki nei iā Meia Richard Bissen no Maui, ka mea nāna i mahalo nui me ka walohia i nā alakaʻi kalana ʻē aʻe no ko lākou kōkua ʻana iā ia a me ko Maui ma hope o nā ahi ʻāhiu kaumaha loa ma ka lā 8 o ʻAukake. ʻO nā mea e noho ana, ʻo ia nō ʻo Meia Rick Blangiardi no Honolulu, ma ka ʻaoʻao hema, a me Meia Mitch Rotch no Hawaiʻi. (Kevin Fujii/Civil Beat/2023)

Ua hoʻolālā ʻia ka mālama ʻana i ka ʻahahui ma Oʻahu, akā, ua hoʻoneʻe ʻia i Maui e nā alakaʻi no ke kākoʻo ʻana iā Mauinuiakama. 

ʻO kekahi mea a Roth i hōʻike mai ai i pili i ka hana a kāna papa luna hoʻokele, ʻo ia nō ka hoʻokō ʻana i ka hiki i nā kamaʻāina ke hānai pono i kā lākou mau keiki ma Hawaiʻi nei. ʻO kēia hoʻololi kuanaʻike ʻana ka mea nāna i hōʻeuʻeu i ke kalana e hoʻonui i ka nui o nā hale pipiʻi ʻole mai 1,200 a i 6,600 hale, wahi a Roth. 

ʻO ka hapanui o ke kūkākūkā he hoʻokahi hola, ka mea hoʻi i hoʻomalu ʻia e Micah Kane, ka CEO o Hawaiʻi Community Foundation, ua pili ia i nā ālaina kikoʻī ma ke kūkulu hou ʻana iā Lāhainā i mea e noho paʻa ai nā ʻohana kamaʻāina ma ke kūlanakauhale i ʻai ʻokoʻa ʻia e ke ahi ʻāhiu ma ka lā 8 o ʻAukake. Ua luku ʻia nā pono hana no ka ʻauwai lepo, ka uila, a me ka wai e ke ahi, a pono kekahi mau makahiki no ke kūkulu hou ʻia ʻana. 

Ua hoʻolaha maila ʻo Meia Richard Bissen no Maui, ke ʻimi aku nei ke kalana i nā hana e lilo ai nā hale hoʻokipa malihini no ka wā pōkole i mau wahi noho loa no nā kamaʻāina i hoʻoneʻe ʻia. 

Ma kēlā pule aku nei ʻo ia i ʻōlelo aku ai, ua hālāwai pū nā luna o ke kalana me nā alakaʻi o ka pā ʻoihana hoʻokipa malihini no ke kūkākūkā ʻana i ka hana e hōʻumeʻume ʻia ai nā ʻona hale e hāʻawi manawaleʻa i ko lākou mau hale hoʻomaha a me nā hale i hoʻolimalima pōkole ʻia no ka mālama ʻana i nā ʻohana no Lāhainā i nalowale ai ko lākou hale i ka pōpilikia. 

“ʻO ka mea a ke kalana e ʻimi nei, ʻo ia nō ko lākou koho ʻoluʻolu ʻana e ʻaelike mai,” wahi a Bissen. 

Ululani Beirne of Kahana Valley listens intently during the 22nd Native Hawaiian Convention Wednesday, Nov. 16, 2023, at the Maui Arts & Culture Center in Kahului. (Kevin Fujii/Civil Beat/2023)
Eia mai ʻo Ululani Beirne no ke awāwa o Kahana ke hoʻolohe pono nei ma ka ʻahahui 22 a CNHA ma ka Maui Arts and Culture Center ma Kahului.  (Kevin Fujii/Civil Beat/2023)

Eia mai kekahi ālaina i koe: ʻoi aku ka waiwai o nā hale hoʻolimalima ma mua o ka waiwai i loaʻa i nā kānaka hale ʻole no Lāhainā, i loko nō o ke kākoʻo ʻia ʻana e ke aupuni ma ka pae pekelala a me ka mokuʻāina. 

“Makemake mākou i nā kānaka a pau no Lāhainā e noho paʻa ma Lāhainā,” wahi a Bissen. “Pēlā pū no nā kānaka ma Kula. Makemake mākou e noho nā kānaka ma ko lākou ʻāina hānau. ʻAʻole mākou makemake e kūʻai wale aku nā kānaka i ko lākou ʻāina, i ko lākou home, a ʻaʻole mākou makemake e hāʻawi pio nā kānaka ma muli o nā kānaka pī e makepono ana i ka mea e hana ʻia nei ma ko mākou kaiāulu.” 

ʻŌlelo maila ʻo Bissen, kākoʻo ʻo ia i ka manaʻo no kekahi waiwai noho kahu no ka ʻāina kaiāulu i mea e paʻa ai nā pono ʻāina ma Lāhainā i nā lima kamaʻāina. 

Ma kekahi manawa o ke kūkākūkā pānela, ua kū mai ʻo Bissen no ka mahalo lehulehu ʻana i nā meia o Honolulu, Hawaiʻi, a me Kauaʻi. 

ʻO kona mau hoa meia, ka mea e noho ana ma ke kahua ma ka hale keaka ʻo Castle ma ka Maui Arts and Cultural Center, ʻo lākou nō kekahi o nā kānaka mua loa nāna i kelepona aku iā Bissen no ke kōkua ʻana ma ka wā i lapalapa ai ke ahi ma Maui ma ka lā 8 o ʻAukake. Wahi a Bissen, ʻaʻole pono kona nīele ʻana i kona mau hoa mea e hoʻouna mai i nā mākaʻi, nā kinai ahi, a me nā kānaka hoʻēmi ulia pōpilikia i Maui, no ka mea, ua hana ʻē nō lākou pēlā. 

Akā, ma muli o ka nui o ka walohia i loko o Bissen, ua noho hou ʻo ia i lalo, a ʻo kona noi akula nō ia i ke anaina e paʻipaʻi lima nui no nā meia o Honolulu, Hawaiʻi, a me Kauaʻi ma kahi o kona leo mahalo, no ka mea, ua paʻa kona leo i ka walohia nui o loko. 

ʻO Kawakami ka mea mua loa i kū i luna no ka pūliki ʻana iā Bissen. Ua hana like koke akula ʻo Blangiardi a me Roth. 

ʻO kā Civil Beat kūkala nūhou ʻana i pili i ke kalana o Maui, ke uku hapa ʻia e nā haʻawina kālā mai ka Nuestro Futuro Foundation. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

A good reason not to give

We know not everyone can afford to pay for news right now, which is why we keep our journalism free for everyone to read, listen, watch and share. 

But that promise wouldn’t be possible without support from loyal readers like you.

Make a gift to Civil Beat today and help keep our journalism free for all readers. And if you’re able, consider a sustaining monthly gift to support our work all year-round.

 

 

About the Author