Ka nota a ka luna hoʻoponopono: Unuhi ʻia na Kamalani Johnson. Click here to read this article in English.

No ke kūlanalana o ke kālā pekelala ma lalo o Trump i noi nui ai nā hui kū i ka ʻauhau ʻole i ka mokuʻāina i kālā e lewa ai nā papahana i kēia makahiki.

Civil Beat stories ma ka ʻōlelo Hawaiʻi

‘Ka Ulana Pilina’ is an ongoing collection of news articles and opinion pieces written in the Hawaiian language to better connect with our Indigenous readers, identify underreported stories and improve our engagement with an underserved community.

Read More

I ka Poʻahā, ua hāʻawi nā ʻelele kau kānāwai mokuʻāina he $49.5 miliona kālā ma nā haʻawina kālā mokuʻāina i ke 95 hui kū i ka ʻauhau ʻole ma Hawaiʻi i kāʻili ʻia ka haʻawina kālā pekelala a lawelawe nō paha i ka poʻe i pā i ke kāʻili ʻia o ka haʻawina kālā pekelala. E hoʻohana ka nui o nā hui i ke kālā no ka hoʻolako meaʻai i nā kānaka emi mai o ke kālā no ka manaʻo e kāʻili ʻia ke kālā e lewa nei nā papahana hoʻolako meaʻai pekelala.

ʻO Hawaiʻi Foodbank a me Boys & Girls Club of the Big Island kekahi o nā moho nui i koho ʻia no kēia haʻawina kālā pōulia, a ua hāʻawi ʻia nō hoʻi he haʻawina kālā he $5.5 miliona [iā Hawaiʻi Foodbank] no ke kākoʻo i nā hana hoʻolako meaʻai, [a iā Boys & Girls Club of the Big Island] nāna e lawelawe i nā ʻōpio ma ka hoʻolako i ka meaʻai pono a me ka manaʻo pū nō hoʻi e hoʻonui i nā papahana kākoʻo haʻawina a nohola ola pono no nā keiki emi mai o ke kālā.

ʻO kahi mea nui, e holo he 34% a ʻoi pākēneka o ke kālā — ma kahi o ka $16 miliona — i nā hui kū i ka ʻauhau ʻole i haʻi mua i nā ʻelele kau kānāwai no ka pā ʻole i nā hoʻēmi kālā pekelala. Eia nō naʻe, ua hōʻike ia mau hui ma nā palapala noi, e hoʻohana ʻia nā haʻawina kālā no ke kākoʻo ʻana i nā kaiaulu i pā.

ʻO Living Pono Project kekahi o nā hui i pā, a i hōʻike hoʻi no ka loaʻa mua ʻole o kahi haʻawina kālā pekelala me ka hāpai pū nō hoʻi he papahana e hoʻolako ʻia ai ke kalo, ʻulu, a ʻuala i hoʻoulu ʻia ma Hawaiʻi nō i nā ʻōhua o ka Papahana ʻAiaola Kākoʻo pekelala.

He ʻŌnaehana I Hoʻohalahala ʻIa

Ua hoʻokaʻawale ka ʻAhaʻōlelo he kālā no nā haʻawina kālā pōulia no nā hui kū i ka ʻauhau ʻole ma nā lā hope loa o ke kau ʻahaʻōlelo. Ua hoʻomakaʻala mua nō hoʻi ʻo Public First Law Center i ia manawa no nā “hemahema ʻōnaehana” ma ke ʻano i hoʻoholomua ʻia ai ka pila.
Ua hoʻohalahala pū ʻia ka papahana haʻawina kālā no ke ʻano i hoʻolālā ai ka ʻAhaʻōlelo e kākaʻahi aku i ke kālā — ma kahi kōmike he ʻehā wale nō ʻelele kau kānāwai ka nui i hoʻoholo ʻia ai ka manaʻo.

He 200 a ʻoi hui i noi i kālā kōkua ma ʻOkakopa, e noi ana nō hoʻi he $150 miliona ma nā haʻawina kālā kōkua. ʻAneʻane he hapa lua o nā mea noi i hōʻike no ka hoʻēmi ʻole ʻia o kā lākou mau haʻawina kālā pekelala, me ka hōʻike pū nō naʻe no ke ʻano e kākoʻo ai kā lākou mau papahana i ka poʻe i pā i nā hoʻēmi kālā pekelala.

ʻO kekahi mau hui i koho ʻia no ka hāʻawi ʻia o ke kālā nā kikowaena lawelawe ola kino i kahi kuaʻāina, nā haukapila i pā i nā hoʻēmi kālā Medicaid a Medicare, a me nā hui e kākoʻo ana i nā ʻōpio nui paha o ka papaha e pilikia i ke kānāwai a me nā hui e kākoʻo ana i nā kānaka nona ke kīnana me nā haʻuki.

Ua hōʻike ke kōmike loiloi, e kōkua nā haʻawina kālā i ka poʻe i pā nui i nā hoʻēmi kālā.

Wahi a ka ʻElele Jenna Takenouchi ma kahi kūkala pāpaho i ka Poʻahā, “Ua hōʻike mai ka lele nui ʻana o nā hui o ka mokuʻāina i ke koʻikoʻi o ka hoʻoikaika ʻana i ko kākou mau kaiaulu a pēlā pū ka hana maikaʻi e ʻauamo ʻia nei na nā hoa hui kū i ka ʻauhau ʻole, a nā ʻohana a mea noho o Hawaiʻi e kaukaʻi nui ai i kēlā lā kēia lā.”

Aia ke uku ʻia nei he $500,000 iā Aloha United Way no ka hoʻoholomua ʻana i ka papahana. He hoʻouna ʻia mai koe o nā leka hāʻawi haʻawina kālā na ka mokuʻāina, wahi a ke kahuapaʻa papahana, e wehewehe ana i ka ʻōnaehana hōʻoia a moʻohelu no nā moho haʻawina kālā.

Ua kōkua ko Civil Beat ʻĀhaʻilono ʻo Caitlin Thompson ma kēia moʻolelo.