Ka nota a ka luna hoʻoponopono: Unuhi ʻia na Kamalani Johnson. Click here to read this article in English.

Makemake kekahi ʻohana ʻilikea haole, e hoʻopiʻi nei iā Nā Kula ʻo Kamehameha no kona kulekele ʻae haumāna Hawaiʻi, e waiho ʻia ko lākou mau inoa ma ka huna i ka wā e holo ana ka hihia ma muli o ka hoʻoweliweli ʻia o ko lākou ola a me ka makaʻu i ka hōʻike ʻokoʻa ʻia ma ke ākea e pā ai paha ko lākou mau ʻoihana.

Civil Beat stories ma ka ʻōlelo Hawaiʻi

‘Ka Ulana Pilina’ is an ongoing collection of news articles and opinion pieces written in the Hawaiian language to better connect with our Indigenous readers, identify underreported stories and improve our engagement with an underserved community.

Read More

Ua weliweli maoli nō ka hopena o ka hihia. Ua hōʻike ʻokoʻa ʻia ka helu wahi o ka loio alakaʻi o ka hihia ma ke kūlelepaho, a ua hōʻea he pahu nona kekahi mea i manaʻo ʻia he kūkae i mua o kona ʻīpuka komo. Ua hāpai pū kekahi poʻe, e aho e pepehi ʻia ka lālā hoʻokumu o ka hui kū i ka ʻauhau ʻole e alakaʻi nei i ka hihia e like me Charlie Kirk, ka mea hoʻopaipai politika o ka politika ʻākau.

Ke noi nei ka makuahine a me kāna kaikamahine ma ka hihia, i kāhea wale ʻia nō ʻo B.P. a me I.P., i ka ʻaha hoʻokolokolo e waiho ʻia ko lāua mau inoa ma ka huna. He puʻu hiki makamua ka hoʻoholo no ka waiho ʻia o nā inoa a huna. Ke hopohopo nei nā loio, he mea ka hōʻike ʻia o nā inoa e hoʻokikina ana i ka haʻalele ʻana i ka hihia.

“He nui pākela nā hana ʻino i ulu aʻe mai kēia hihia a i kēia, a keu aku no nā limahana pono sīwila i ʻike maʻamau i kēia ʻano hana,” i ʻōlelo aʻe ai ʻo Jesse Franklin-Murdock, he loio no ka ʻaoʻao hoʻopiʻi, ma kahi palapala hōʻike ʻaha hoʻokolokolo. “No kahi kaikamahine ʻōpio e noho ana ma ke kaiaulu, he mea kūpono ʻole loa kēia.” 

Ma nā palapala ʻaha hoʻokolokolo i hala iho nei, ua hōʻole ʻo Kamehameha i ka manaʻo weliweli a he kūpono ʻole, me ka ʻōlelo pū nō naʻe, e pono e hōʻike ka ʻohana iā lākou iho ma ke ākea inā makemake e hoʻomau ma ka hihia.

“ʻAʻohe o lākou pono ma ka hoʻopale ʻia mai nā manaʻo hoʻohalahala no kā lākou e hana nei,” i ʻōlelo ai nā loio o Nā Kula ʻo Kamehameha ma kahi palapala ʻaha hoʻokolokolo i ka Poʻakolu.

No ka nīnau no ka waiho ʻia o nā inoa a huna, ua ʻokoʻa nā hopena o ʻelua hihia kulekele ʻae haumāna iā Nā Kula ʻo Kamehameha no nā mea hoʻopiʻi liʻiliʻi mai.

            Ma ka mea mua, ʻo ka mea hoʻopiʻi, i ʻike wale ʻia nō ʻo John Doe, ua waiho ʻia kona inoa a huna i ka holo ʻana o ka hihia. Ua mālama ʻo Kamehameha i ia huna ʻana ma hope o ka ʻae ʻana e hoʻonā i ka hihia no ka $7 miliona kālā.

            Ma kekahi hihia i ka makahiki 2010, ua holo ka manaʻo o ka ʻaha hoʻokolokolo, ʻaʻole i hiki ke waiho ʻia a huna nā inoa o ka ʻehā mea Hawaiʻi ʻole i ka holo ʻana o ka hihia, i kū ma hope mai no ka hoʻopiʻi ʻia o kekahi mau māhele i ka ʻAha Hoʻokolokolo Kiʻekiʻe o ʻAmelika Hui Pū ʻIa.

Ma kekahi hihia kaʻawale o ka makahiki 2003, ua hōʻike ʻia ka inoa o kahi mea hoʻopiʻi liʻiliʻi. Ua hoʻopiʻi ʻo Brayden Mohica-Cummings, he haumāna papa ʻehiku i ia wā, i mea e noho ai ma Kamehameha, a haʻalele ihola i ka hihia i ka wā i ʻae ai ke kula e ʻae iā ia e noho a pau kona wā papa 12.

‘ʻAʻohe Nō Lua O Kēia Hihia’

Ua hoʻokomo ʻia nā palapala no ka hihia e kū nei ma ʻOkakopa na Students for Fair Admissions, he hui hoʻolale kūʻē i ka affirmative action i eo iā lākou ka lanakila ma kahi hoʻoholo ʻAha Hoʻokolokolo Kiʻekiʻe o ʻAmelika Hui Pū ʻIa, i pau ai ka noʻonoʻo ʻia o ka lāhui kanaka ma nā kulekele ʻae haumāna kulanui.

Ua ʻōlelo ka lālā hoʻokumu ʻo Ed Blum ma nā palapala hihia no ka weliweli o ka hopena o ia hihia a me nā mea ʻē aʻe pū kekahi.

“ʻAʻohe nō naʻe lua e like me kēia hihia iā Nā Kula ʻo Kamehameha,” wahi āna i kākau ai. “ʻO ka nui o nā ʻōlelo hoʻoweliweli, hana ʻino, a hana ʻē aʻe o ia ʻano like pū i hana ʻia mai iaʻu…ua ʻoi pākela i kaʻu i ʻike mua ai.”

Ua kākau ʻo Blum no kona lumaʻi ʻia e ka nui leka uila a manaʻo kelepona i pono ai kona kāpae ʻana i kona ʻike hoʻokaʻaʻike mai ke kahuapaʻa o kona hui kū i ka ʻauhau ʻole.

Aia pū ke pilikia nei ʻo Jesse Franklin-Murdock, ka loio kūloko e nānā nei i kēia hihia. Ua haʻi ʻo ia i ka ʻaha hoʻokolokolo no ka hoʻoweliweli ʻia o lāua ʻo kāna wahine a me kona ʻohana ma ke kūlelepaho. I ka hopena o kēlā makahiki aku nei, ma hope o ka hoʻokomo ʻia o ka hihia, ua ʻōlelo ʻo ia no ka loaʻa o kahi ʻeke i manaʻo ʻia he kūkae ke nānā aku mai kahi mea i huna kona inoa, a ma hope mai kona hōʻike ʻana aku i ka FBI.