E Hoʻomanawanui Ana Nā Kūpuna I Ka Hoʻoponopono ʻIa O Kahi ʻEleweka Pilikia Ma Nā Keʻena Hale Liliha
Pilikia ihola nā ʻeleweka o kahi hale he ʻumikūmāono ona papahele i ka wai hālana. He mau mahina paha ka wā e hoʻoponopono ʻia ai ka ʻeleweka e kau nui ai nā ʻōhua.
Ka nota a ka luna hoʻoponopono: Unuhi ʻia na Kamalani Johnson. Click here to read this article in English.
Kū mai nā ʻāʻumeʻume nui ma kahi keʻena hale o Honolulu i kahi pio ʻana o ka uila no ka ʻelima mahina no nā mea noho ʻelemākule a luāhine ma ka nui loa, a he kaukaʻi ka nui o lākou ma luna o nā koʻo hele wāwae a me nā noho huila uila.
Ua hoʻomaka ka pilikia i ʻOkakopa, i ka wā i hālana ai ka wai o kahi lumi hoʻomāhu wai o kahi papahele o luna aʻe o Malulani Hale a pilikia ai ka ʻeleweka e kau nui ai nā ʻōhua a me ka ʻeleweka makakoho ʻelua. Ua hoʻoponopono hou ʻia ua mau ʻeleweka ʻelua nei ma nā makahiki ʻelua i hala ihola.
I loko nō o ka hiki i ka pāʻoihana mālama hale ke hoʻoponopono i ka ʻeleweka lawelawe o ka hale he ʻumikūmāono ona mau papahele ma ke Alanui Kuakini ʻĀkau i kekahi lā mai, oia mau ka pilikia o ka ʻeleweka nui mai ia wā mai.
Ua hōʻike mai ʻo Michelle Aiwohi, he mea noho ma ka papahele ʻehā, kānalua nā mea noho i ka ʻeʻe ma ka ʻeleweka liʻiliʻi mai, he ʻeono kānaka ka nui e hiki ke kau i ka wā hoʻokahi ma ka nui loa ʻoiai e kū ana. E pono paha ka poʻe iā ia nā kōkua hele e hoʻomanawanui he ʻekolu a ʻehā paha kau ʻana a kaʻawale kūpono mai ka ʻeleweka no ka ʻeʻe ʻana. Hala i ka poʻe nā wā e kau ai ma ka HandiVan kalana, e hoʻomanawanui ana he ʻelima wale nō minuke. Ua paʻakikī pū aʻe ka lawe leka a me ka neʻe a haʻalele ʻana o nā kānaka i nā keʻena hale.
Ua ʻōlelo ʻo Katharina O’Connor, he 76 ona mau makahiki, nāna e noho nei ma ka papahele ʻeiwa me kona makuahine he 93 ona mau makahiki, ua lōʻihi aʻe nā wā hoʻomanawanui i ka pio ʻana o ka uila a i ko nā limahana lawelawe pōulia lawelawe ʻōhua ʻana. A i ka wā e hala ai kahi mea noho ma ka hale ma nā mahina i hala iho nei, hālāwai nā limahana lawelawe pōulia me kahi pilikia kūikawā.
ʻAʻole nō lawa ka nui o ka ʻeleweka lawelawe no ka mānele pōulia e hoʻohana ʻia no ka hoʻoneʻe i ke kino kupapaʻu o ka mea ʻakahi a hala inā e moe ana, i ʻōlelo ai ʻo O’Connor. No laila, pono e lawe ʻia ke kino kupapaʻu o ka mea i hala i paʻa me ke kino e kū pololei ana i luna.
He keu a ka ʻūlōlohi ka hoʻoponopono ʻia o nā ʻeleweka ma Honolulu, a ʻaʻohe papa manawa hoʻokō no ka wā e hoʻoponopono ʻia ai nā mea o Malulani Hale a i kēia. Ua ʻōlelo ʻo Nolan Zane, he lālā o ka hui mālama hale ʻo Urban Real Estate Company, he ʻike nō ʻo ia i ke kīkahō ʻana, a me ka minamina, he mau mahina kahi ala hoʻoponopono ma ka hikiwawe loa.
“He mea e pihō ai ka naʻau ka pilikia o ka ʻeleweka nui?” i nīnau ai ʻo Zane. “Pololei maoli nō, ke kūlia nei nō naʻe mākou i ka hoʻoponopono.”
ʻĀnō, ke noiʻi nei ka pāʻoihana i kekahi mau ala lapaʻau a ua kono ʻia he aʻoaʻo ʻeleweka, nāna e hāpai ana he papahana hoʻohikiwawe ʻia me ka hui ʻinikua o ka hale a me ka pāʻoihana lawelawe ʻeleweka.
A “inā ua hoʻomaka hou mai kinohi no ke kūkulu he mea hou, he hoʻokahi makahiki piha a holo pono ia ʻeleweka,” i ʻōlelo ai ʻo Zane, mai ka wā mai e hana ʻia ai nā lako hana, a halihali ʻia mai a kūkulu ʻia.
E lana aʻe ana kona manaʻo, ʻaʻole e lōʻihi loa.
Iā Wai E ʻImi Ai
Nolan Zane, manakia mālama o Malulani Hale ma ka Urban Real Estate Company. (808) 351-3923.
