Ka nota a ka luna hoʻoponopono: Unuhi ʻia na Kamalani Johnson. Click here to read this article in English.

Ua lilo he mau hola o ko nā limahana pōulia o Maui ʻimi pahuʻa ʻana i kahi luahine he 71 ona mau makahiki ma Maui i hāʻule i loko o ke kahawai ʻo ʻĪao i ke kakahiaka Poʻaono, wahi a ke Keʻena Mākaʻi o ke Kalana o Maui.

Civil Beat stories ma ka ʻōlelo Hawaiʻi

‘Ka Ulana Pilina’ is an ongoing collection of news articles and opinion pieces written in the Hawaiian language to better connect with our Indigenous readers, identify underreported stories and improve our engagement with an underserved community.

Read More

E hoʻāʻo ana ka luahine, i ʻike ʻia no kona hele pinepine ʻana i kahi wahi e noho nei ka poʻe hale ʻole ma kahi kokoke i ka Uapo o Waiʻehu ma ke Alanui ʻo Waiʻehu Beach, e hōʻiliʻili i ka wai ma kahi ʻie ma kahi o ka 11:40am o ke awakea i kona wā i hāʻule iho ai, wahi a nā mākaʻi. ʻO kona nalowale koke ihola nō ia i loko o ke kahawai kaheāwai, a ʻaʻole nō i ʻike hou ʻia mai ia wā mai, i haʻi ai kahi mea ʻike maka i nā mākaʻi.

E kaheāwai ana ke kahawai a keu aku ma muli nō hoʻi o ka ua nui. ʻO ka luahine ka mea mua i hōʻike ʻia ua nalowale he hopena o nā ʻino Kona i hala iho nei i pā nui ai ka mokuʻāina.

Ua ʻimi hele akula nā makaʻi a me ke Keʻena Kinai Ahi o Maui i ia wahi a me ke kai, he hapalua mile mai kahi i hāʻule ai ka luahine, ma ke kau Jet Ski a helekopa pū. ʻAʻole nō naʻe ʻo ia i loaʻa mai ka hola 4 o ka ʻauinalā o ka Poʻaono, wahi a nā mākaʻi. E mau ana ka ʻimi hele ʻana iā ia, i ʻōlelo ai nā mākaʻi.

Ua noi nā mākaʻi e kāhea ka poʻe iā ia kahi ʻike no kēia hihia i ka laina pōulia ʻole o ke keʻena mākaʻi ma (808) 244-6400 me ke kuhikuhi aku i ka helu waihona 26-007835.

ʻAʻole e komo a ʻaʻe pū ka poʻe i ka wai kaheāwai, nā ala i hālana i ka wai, a me nā kahawai no ka loli honua o ke anilā a pōʻino ai paha ke ola, wahi a nā mākaʻi.

Ma Oʻahu, ua kāpae ʻia nā kauoha hoʻohaʻalele i kauoha ʻia no nā kaiaulu o nā Kapa Kai ʻĀkau ʻo Waialua a me Haleʻiwa i ka ʻauinalā Poʻaono i ka mao ʻana o ke anilā ʻino a hiki ai i nā mea noho o laila ke hoʻi i ka hale a hoʻomaka e ʻike i ka nui lilo he hopena o ka wai hālana o nā lā i hala akula.

Ua haʻi nō naʻe ka Papa Hoʻolako Wai o Honolulu i nā mea noho o kahi māhele o nā Kapa Kai ʻĀkau, e aho ko lākou hoʻopaila ʻana i ka wai paipu no ka ʻekolu minuke ma mua o ka hoʻohana, inu, kuke, a hana hau ʻana paha. ʻO ia hoʻi nā kaiaulu i pā ʻo Waialua, Haleʻiwa, Paumalū, Pūpūkea, Waialeʻe, a me Turtle Bay. E hoʻolaha ka Papa Hoʻolako Wai ke palekana hou ke kiʻi wale ʻana aku nō i ka wai paipu.

I loko o kēia wā, aia ke waiho nei ka Papa Hoʻolako Wai he ʻelua kaʻa nona nā kini wai he 2,000 kālani kona nui ma ka Hui Kaiaulu o Waialua a me ka Pāka Kaiaulu o ke Kahakai ʻo Sunset i ka Poʻaono.