E Holo! He Hōʻea Ma Ka ʻĀpua Nā Mea Hele Ma Kahi ʻAʻe Alanui O Ala Moana
Holo ikaika nā kaʻa ma kēia ala ʻaʻe alanui ʻōhua o Ala Moana i ka wā e hoʻāʻo ana nā mea hele e hōʻea i kekahi ʻaoʻao.
Ka nota a ka luna hoʻoponopono: Unuhi ʻia na Kamalani Johnson. Click here to read this article in English.
He mea hoʻopōʻino paha ka pana manawa o nā hōʻailona alanui ma nā huina ʻaʻe alanui no nā kūpuna a mea like paha e pono ai ka manawa hou aku e ʻaʻe ai i ke alanui i ke Kikowaena Kūʻai o Ala Moana, i ʻōlelo ai ʻo Lani Michael, kahi mea e noho ana ma kahi kokoke.
Noho ʻo Michael ma ka Yacht Harbor Towers. E kū ana ia wahi ma waho pono o Waikīkī, ma luna o ka huina ma kekahi ʻaoʻao o Magic Island ma kaʻe o ke Alanui Atkinson a me Ala Moana, a he mōakāka pono ka ʻikena i ia huina.
E ʻaʻe ana kahi ʻaʻe alanui he ʻewalu ala kalaiwa kaʻa i kaʻawale ma ka ʻelua puʻu e kapa ʻia nei na nā wilikī alanui he mea ʻaʻe alanui lau pae.
“ʻO ka pilikia ka hāiki o ka manawa e ʻaʻe loa ai i ke alanui mai ke kihi ʻēkoʻa a hiki loa i ka ʻaoʻao kikowaena kūʻai,” i ʻōlelo ai ʻo Michael. “Hoʻomaka akula e hele wāwae a hālāwai me ke ālaina no ka lele ʻē ʻana o nā kaʻa i ke kalaiwa.”
He 43 kekona a hōʻea kahi mea kākau moʻolelo i kekahi ʻaoʻao ma kahi kakahiaka Poʻahā, e hele wāwae ana me ka wikiwiki a ma lalo iki nō hoʻi o ka palena manawa he 45 kekona i koi ʻia ma ia wahi ʻaʻe alanui. E pono he manawa hou aku i ka nui o nā mea hele e hōʻea ai i kekahi ʻaoʻao.
Holo ikaika maʻamau nā kaʻa ma ia wahi ʻaʻe alanui e huli hema ana mai ke Alanui Ala Moana i ke Alanui Atkinson i ka wā a nā mea hele e noke ana i ka hōʻea i kekahi ʻaoʻao, wahi a Michael.
Ua hāpai ʻo ia i ke kumuhana ma nā ala like ʻole a ʻo ia pū hoʻi ke kāhea ʻana i ke keʻena meia a me ke Keʻena Mākaʻi o Honolulu, a ua hōʻea pū hoʻi kahi mākaʻi o ke Keʻena Mākaʻi o Honolulu a hoʻopaʻa he noi.
I kēia manawa, lawe ʻo ia he pū makani e hoʻohū ai i nā mea kau mokokaikala, he pahuʻa nō naʻe ka hopena.
Hōʻike ka ʻikepili o ka Māhele Ala Kalaiwa o ke Keʻena Mākaʻi o Honolulu a pēlā hoʻi ka ʻikepili o kekahi mau wahi hou aku i nā ulia kaʻa nui o nā makahiki ʻekolu i hala iho nei ma ia wahi ʻaʻe alanui a i kahi e pili pū ana.
Aia he ulia kaʻa nui ma laila ma Malaki 25, he hoʻokuʻi a ʻauheʻe ke ʻano, a pau ihola kahi kāne ma nā kanalima ma laila ma ʻOkakopa 30, 2023, ma hope o ka hoʻokuʻi ʻia iā ia e hele ana ma ke Alanui Ala Moana ma waho o kahi ʻaʻe alanui.
ʻO ka maʻamau, aia ka pana manawa he 850 ma nā hōʻailona alanui o Honolulu i ko ke kūlanakauhale Māhele Hōʻailona Alanui a ʻEnehana, i ʻōlelo ai ka ʻelele ʻo Travis Ota.
“Ma ka pili i nā hōʻailona kūlanakauhale, hiki i nā mea kalaiwa a mea hele ke hōʻike no ka pilikia ma ka papahana 311 inā he manaʻo no ka pana manawa o ka hōʻailona,” i ʻōlelo ai ʻo Ota. “Makaʻala pono ko ka Māhele Hōʻailona Alanui a ʻEnehana i ka pana manawa o kēia mau hōʻailona, a he hiki ke hoʻonui a hoʻēmi i ka manawa i nā wā paʻahana o ke alanui e ʻoi aku ai ka holo o nā kaʻa a me nā mea hele.”
Kaʻa nō naʻe nā hōʻailona alanui o Ala Moana a me Atkinson ma lalo o ko ka mokuʻāina Māhele Alanui Nui. Mālama pū mo ka mokuʻāina Keʻena Alakau i nā hōʻailona ma ke 80 a ʻoi alanui nui ma Oʻahu, wahi a ke kahuapaʻa.
ʻAʻole i pane ʻia kahi leka uila i ke keʻena alakau o ka mokuʻāina i ka Poʻakolu no ka huina alanui a me ke kiʻina e hāpai manaʻo ai no ka pana manawa o nā hōʻailona.
He mau ala lapaʻau kā ka mokuʻāina i lawelawe ai ma nā wahi ʻē aʻe o ke Alanui Ala Moana, kahi i hōʻike ai ka ʻikepili ulia kaʻa i nā pākēneka kiʻekiʻe o nā ulia kaʻa ma waena o nā mea kau kaʻa, paikikala, a mea hele.
Ua hoʻolilo ʻia ʻelua hou aku huina alanui o Ala Moana — ma ke Ala Hobron a me ke Alanui ʻEna — a he mau wahi ʻaʻe alanui no nā mea hele wale nō e hoʻomaka ana ma ka makahiki 2022. He pale kaʻawale ko ia mau huina alanui i kēia manawa e ʻulaʻula pū ai nā hōʻailona kaʻa, e emi ai nā “kuʻia paha ma waena o nā kaʻa a me nā mea hele,” i ʻōlelo ai ke keʻena.
Iā Wai E Kiʻi Ai?
I loko nō o ka noʻonoʻo ʻia o ke Kikowaena Hoʻokele Alanui i hoʻokumu ʻia i ka makahiki 2022 no ka hoʻolaukaʻi hou aku i ka hoʻokele ma waena o ka mokuʻāina a kalana a me nā hui palekana ākea, mau nō ka kaʻawale loa o ke kiʻina e hāpai manaʻo ai.
No nā huina alanui e hoʻokele ʻia na ke Keʻena Lawelawe Alakau o Honolulu, e kāhea i ka Māhele Hōʻailona Alanui ma (808) 768-8387, a i ʻole paha ma (808) 768-5323, a i ʻole paha ia, e kiʻi aku i ka papahana HNL 311, a i ʻole ia, e leka uila i ko ke kūlanakauhale keʻena hāpai manaʻo ma complaints@honolulu.gov.
No nā hōʻailona alanui e hoʻokele ʻia na ka mokuʻāina ma nā alanui nui ma Oʻahu, e hāpai i nā manaʻo ma (808) 587-2160 a leka uila paha iā complainthighwayoahu@hawaii.gov.
He Manaʻo Kōkua Paha Kou No E Hoʻoponopono Aku!?
E haʻi mai iā mākou i kahi o ka pilikia, ma ka nui e hiki. He kōkua ke kiʻi kelepona. Eia nā ala e kiʻi mai ai:
ʻEmo ʻole ka hoʻouna aku ma ka hoʻokō i kēia palapala.
Hiki ke leka uila mai iāmākou ma news@civilbeat.org. E kikokiko iā “E Hoʻoponopono” ma kahi kumuhana i ʻole e nalowale.
Hiki ke hoʻouna leka i ke keʻena ma PO Box 10857, Honolulu, HI, 96816.
ʻAʻole mākou e hōʻike i kou inoa me ke noi mua ʻole. Inā ʻimi mākou i ka hoʻoholomua i kāu, e hōʻike mākou i ka mea e loaʻa iā mākou.
