Ka nota a ka luna hoʻoponopono: Unuhi ʻia na Kamalani Johnson. Click here to read this article in English.

E ʻae ʻia kekahi o nā ʻohana e hoʻopiʻi nei iā Nā Kula ʻO Kamehameha e waiho ʻia ko lākou mau inoa ma ka huna no ka manawa i ka wā e holomua ai ka hihia e ʻaʻa nei i ko ke kula kulekele ʻae haumāna e hoʻomakakoho ana i nā keiki Hawaiʻi, i hoʻoholo ai kahi luna kānāwai pekelala.

Civil Beat stories ma ka ʻōlelo Hawaiʻi

‘Ka Ulana Pilina’ is an ongoing collection of news articles and opinion pieces written in the Hawaiian language to better connect with our Indigenous readers, identify underreported stories and improve our engagement with an underserved community.

Read More

Ma kahi palapala i hoʻokomo ʻia ma mua aku nei o kēia mahina, ua kākau ka Luna Kānāwai Māhele o ʻAmelika Hui Pū ʻIa ʻo Micah Smith, ʻaʻole i “hōʻike kūpono mai” ka ʻohana, i ʻike wale ʻia nō ma nā inoa ʻo B.P. a me I.P., no ka makaʻu o ʻeha a no ka hoʻopaʻi ʻia no ke komo ʻana i ka hihia.

I loko nō naʻe o kēia, ua lawa ka nui o nā ʻōlelo hoʻoweliweli i nā alakaʻi o Students for Fair Admissions, ka hui e hoʻopiʻi nei iā Nā Kula ʻo Kamehameha, e hoʻoholo ai no ka hiki paha ke pā ka ʻohana i nā ʻōlelo hoʻoweliweli ma ka leka a ma ka pūnaewele inā hōʻike ʻia ko lākou mau inoa.

“He mea kēia e lawa kūpono ai kā lākou e makaʻu nei ʻo ka lilo he luahi o nā manaʻo ma ka pūnaewele, i loko nō paha o ka liʻiliʻi,” i kākau ai ʻo Smith.

E nānā hou ʻia paha ka waiho ʻia o nā inoa ma ka huna i ka hihia e holomua ai a komo ma ke keʻehina hōʻike noiʻi, ka wā nō hoʻi a nā ʻaoʻao ʻelua e noiʻi ai no ke kūkulu i ke kahua o ko lāua mau manaʻo.

Ke noi nei he ʻelua hou mea hoʻopiʻi e komo i ka hihia, wahi a kekahi palapala hōʻike manaʻo i hoʻokomo ʻia e pili ana iā Kamehameha ma ka ʻaha hoʻokolokolo pekelala. Helu ʻia kahi haumāna kula kiʻekiʻe papa 10 i hōʻole ʻia he ʻelua manawa e Kamehameha ʻoiai ʻaʻole ʻo ia he Hawaiʻi ma ka hihia hou i hoʻokomo pū ʻia nō hoʻi e Students for Fair Admissions. E ʻike ʻia kona inoa ma nā hua inoa ʻo K.S.

Wahi a kā Smith palapala o ka lā 7 o ʻApelila, e pono ʻo Students for Fair Admissions e hōʻike i nā inoa o B.P. a me I.P. ma ka huna iā Kamehameha. E koi pū ʻia lākou e hōʻike i nā inoa o nā ʻohana ʻelua ʻē aʻe ma ka hihia iā Kamehameha, i ʻike wale ʻia nō ʻo ia ʻo ʻOhana A a me ʻOhana B ma nā palapala ʻaha hoʻokolokolo. ʻAʻole i noi mua ia mau ʻohana i ke komo ma Kamehameha.

Ua leka uila pū ʻia nā inoa o nā ʻohana iā Smith no ka hōʻoia inā he pilina e kūpono ʻole ai kona hoʻomalu ʻana i ka hihia. Me he lā, ʻaʻohe pilina kūpono ʻole ma waena o nā ʻohana a me Smith, nāna i kākau ma ka papa hihia “ua ʻike ka ʻaha hoʻokolokolo ʻaʻohe hoʻi mea o kēia mau inoa e kūpono ʻole ai kona hoʻomalu ʻana.”

E hōʻike ana kahi palapala kākau na Sterling Wong, kahi ʻelele o Kamehameha, i ka mahalo o ke kula i ko ka ʻaha hoʻokolokolo kauoha ʻana e hōʻike ʻia nā inoa o ia mau mea hoʻopiʻi i ke kula.

“Kūpaʻa mākou i ka palekana haumāna a me ke alakaʻi ʻana ma luna o ke kapu aloha,” i ʻōlelo ai ka palapala. Ua ʻōlelo ke kula no ka “paʻa o kona manaʻo e kākoʻo ka ʻike kūʻiʻo a me ke kānāwai i ko mākou ʻaoʻao.”

Ua hōʻea mai ke noi e waiho ʻia ko B.P. a me ko I.P. mau inoa ma ka huna i ka wā i hū aʻe ai ka nui o nā ʻōlelo hoʻoweliweli ola i nā alakaʻi a loio o ka hui e hoʻopiʻi nei iā Nā Kula ʻo Kamehameha. Ma ka wā o kekahi hālāwai hoʻolohe ma Malaki, ua ʻōlelo ka loio ʻo Cam Norris he 125 ʻōlelo hoʻoweliweli ola i loaʻa i nā loio e kū ʻelele ana no Students for Fair Admissions a pēlā no ko ka hui lālā hoʻokumu, ʻo Ed Blum. Mai ka makahiki 2024 mai, he lālā ʻo Blum o ka papa alakaʻi o kekahi hui e ʻimi ana e wāwahi i kahi papahana pekelala e hoʻonoho ana i nā kauka Hawaiʻi ma nā kaiaulu i lawa ʻole kona lawelawe kūpono ʻia.

Ua ʻōlelo ʻo Norris, he “makehewa a he hanaʻino” ka hoʻokikina ʻana i nā ʻohana e hōʻike i ko lākou mau inoa ma kēia keʻehina o ka hihia ma ka ʻimi ʻana e hoʻokuʻu ʻia ka hihia ma mua o ka hōʻea ʻana i ka hoʻokolokolo ʻia.

ʻO Students for Fair Admissions, ka hui i eo iā lākou ka lanakila o kahi hihia mua o kona ʻano i ka makahiki 2023 e wāwahi ana i ka affirmative action ma ka ʻae haumāna kulanui, ka hui e alakaʻi nei i ka hoʻopiʻi ʻana iā Kamehameha. Ua ʻōlelo ka poʻe waiho manaʻo ma ka pūnaewele iā Blum, e aho kona pepehi ʻia. Ua loaʻa pū i ko ka hui loio alakaʻi he ʻeke i manaʻo ʻia he kūkae i leka ʻia i kona hale.

Ma ka wā paio manaʻo no ka waiho ʻia o nā inoa ma ka huna, ua kāpae ʻo Joachim Cox, he loio no Kamehameha, i nā ʻōlelo hoʻoweliweli, me ka ʻōlelo, “ʻAʻole kēia mau manaʻo he mau manaʻo mahalo ʻia.” Ua ʻōlelo nō naʻe ʻo ia, ua like pū nō hoʻi ka ʻōlelo a ka lehulehu ākea i ka wā o nā hihia hope ʻelua e ʻaʻa ana i ke kulekele ʻae haumāna.

“ʻAʻohe nō hopena ʻino o kēia mau ʻōlelo hoʻoweliweli,” i ʻōlelo ai ʻo Cox. Ma ka hihia e kū nei, wahi āna i hoʻomau ai, “ʻO kā kākou e ʻike nei, e ka mea hanohano, he kuhi wale nō ia.

Ma ke kauoha o ka lā 7 o ʻApelila, ua kākau ʻo Smith, ʻaʻohe i pili nā ʻōlelo hoʻoweliweli i pili i kēia hihia iā B.P. a me I.P. a i kēia.

No kahi kaona liʻiliʻi o Hawaiʻi ka makuahine a me kāna kaikamahine, wahi a nā palapala ʻaha hoʻokolokolo. ʻAʻole nō lāua he Hawaiʻi, a ua hōʻole ʻia kā I.P. noi iā Kamehameha. Hōʻike nā palapala ʻaha hoʻokolokolo no ka piha ʻana o kona makahiki 18 mai ka wā mai i hoʻokomo ʻia ai ka hihia i kēlā makahiki aku nei.

Ma nā palapala ʻaha hoʻokolokolo, kākau nā loio o ka ʻohana no ko lākou hopohopo i ka hoʻopaʻi ʻia e nā mea kākoʻo iā Kamehameha. Ua ʻōlelo nō naʻe ʻo Smith ma ka wā o ka hālāwai hoʻolohe, i loko nō o ke kūpono ʻole o nā manaʻo āna i ʻike ai, ʻaʻohe ʻike kūʻiʻo no nā mea kākoʻo iā Kamehameha ia mau ʻōlelo hoʻoweliweli.

“I koʻu manaʻo, ʻaʻohe ʻike kūʻiʻo he mau mea kākoʻo ia poʻe a he poʻe hōʻaleʻale wai pū paha ma ka pūnaewele,” i ʻōlelo ai ʻo Smith.

Kākoʻo ʻia ko Civil Beat mau moʻolelo na kahi haʻawina kālā mai Chamberlin Family Philanthropy.