Ka nota a ka luna hoʻoponopono: Unuhi ʻia na Kamalani Johnson. Click here to read this article in English.

Ua lawa nā pāloka i loaʻa i ka ʻekolu lālā papa kahu waiwai hoʻomau o ke Keʻena Kuleana Hawaiʻi e holomua ai i ka wā koho pāloka nui.

Inā holo nā hopena, e hoʻokūkū nā moho hoʻomau ʻo Brickwood Galuteria, Keoni Souza, a me John Waiheʻe IV me Ikaika Anderson, Adrian Kealii Akina, a me Kanekoa Crabbe no ka mālama i ko lākou mau noho ma ka papa o ke Keʻena Kuleana Hawaiʻi. Noa ka ʻekolu noho ākea ma ka hoʻokūkū o kēia makahiki.

Ua holomua nā moho nui ʻeono i loaʻa iā lākou nā pāloka he nui loa no nā noho ākea no ka mea, ʻaʻole i loaʻa he 50% a ʻoi o nā pāloka e eo piha ai ka lanakila i kekahi moho. E alakaʻi ana ʻo Galuteria me ka 15.1% o nā pāloka a ma hope mai ʻo Waiheʻe (14.3%), Anderson (11.9%), Souza (11.7%), Akina (8.9%) a me Crabbe (6.1%).

Aia pū he ʻelua hou aku hoʻokūkū no nā noho Keʻena Kuleana Hawaiʻi e kū ʻelele ana no Oʻahu a me Maui no ka Wā Koho Pāloka Nui. Ua holomua maʻamau ka Lālā Papa Kahu Waiwai Kalei Akaka a me kona hoa hoʻokūkū ʻo Hinaleimoana Wong Kalu no Oʻahu, a me ka Lālā Papa Kahu Waiwai Carmen Hulu Lindsey a me kona hoa hoʻokūkū ʻo Keʻeaumoku Kapu no Maui ʻoiai, he ʻelua wale nō moho hoʻokūkū ma kēlā me kēia hoʻokūkū.

Aia ke ʻano e paʻa mai ai ka papa kahu waiwai no nā makahiki ʻelua e hiki mai ana i ka hopena o ia mau hoʻokūkū a he mea nui ma kēia wā koʻikoʻi o ke Keʻena Kuleana Hawaiʻi ma ka wā e ʻimi ana i ke kūkulu ma luna o ke 30 a ʻoi ʻeka ʻāina ma Kakaʻako a ma waena hoʻi o ke kūkākūkā i ka loaʻa mai paha o ke kālā ma ka ʻumi miliona a ʻoi kālā he uku ʻāina mai nā keʻena mokuʻāina e uku ʻia i ke keʻena.

E holo nā waiwai e loaʻa mai ia mau papahana no ka hoʻokō ʻana i ko ke Keʻena Kuleana Hawaiʻi mākia ʻo ka hoʻokāʻoi i ke kūlana o nā Kānaka Maoli. Ma kona hoʻokumu ʻia i ka makahiki 1978 a me kona alakaʻi ʻia na kona Papa Kahu Waiwai, hoʻokele ke Keʻena Kuleana Hawaiʻi he $600 a ʻoi miliona kālā ma ka waiwai kālā a ʻāina no ka pono o nā Kānaka Maoli.

He kenekoa mokuʻāina ʻo Galuteria ma mua i hāʻule ma kona holo moho ʻana i ka makahiki 2018 ma mua o ke eo ʻana o kona noho iā ia ma ka papa kahu waiwai o ke Keʻena Kuleana Hawaiʻi i ka makahiki 2022. ʻO Waiheʻe kekahi o ko ka papa kahu waiwai mau lālā noho lōʻihi a ʻo ia ke keiki kāne a ke Kiaʻāina John Waiheʻe i noho mua akula. ʻO Souza ka hope luna hoʻomalu o ka papa kahu waiwai a ua koho pāloka ʻia i ka makahiki 2022. He ʻelele ʻaha kūlanakauhale o Honolulu ʻo Anderson ma mua a he moho no ke kūlana hope kiaʻāina. Ua noho ʻo Akina he kumu aʻo no ke 30 a ʻoi mau makahiki, wahi a kona kahuapaʻa. Ua hana ʻo Crabbe ma nā ʻano kūlana like ʻole e laʻa me ka noho polopeka kūmanawa, lima hana, kanaka uila, mahiʻai, a lawaiʻa, wahi a kona kahuapaʻa.

Ua hihia ka papa kahu waiwai ma nā mahina i hala iho nei no kahi hihia kānāwai me ka Luna Hoʻokele Hoʻokō ʻo Stacy Ferreira.

Ua huli ka manaʻo o kekahi māhele o nā lālā papa kahu waiwai he ʻehā ko lākou nui a kaʻawale mai ka manaʻo o ka papa kahu waiwai, ʻo ia hoʻi ʻo Akaka and Lindsey, a kākoʻo i nā kumu hoʻopiʻi a Ferreira i hāpai aʻe ai ma ka hihia e hoʻopiʻi ana no ka hoʻopaʻi kūpono ʻole ʻana o nā lālā papa kahu waiwai iā ia.

Aia nā Lālā Papa Kahu Waiwai ʻo Dan Ahuna, Galuteria, Waiheʻe, a me Souza ma ka māhele nui aʻe i alakaʻi ʻia e Kai Kahele. ʻO nā lālā hope ʻekolu nā lālā e paʻa ai ka ʻīkoi o ke kime alakaʻi o ka papa kahu waiwai a ʻo ia nā luna hoʻomalu o nā ʻano kōmike e hoʻomalu ana i ko ke keʻena ala hoʻokō i ka hoʻopaipai a me ka mālama a hoʻokele ʻia o ke kālā a me ka ʻāina.

ʻO ka manaʻo o ke kaʻawale ma ka ʻelima lālā ma kekahi ʻaoʻao a he ʻehā lālā ma kekahi ʻaoʻao, he mea ka hāʻule ʻana o kekahi lālā papa kahu waiwai hoʻomau ma kona hoʻokūkū e loli a pā loa ai paha ke ʻano e paʻa mai ai ka mana hoʻokele o ka papa kahu waiwai. Pēlā nō hoʻi i ka makahiki 2024 i ka wā i eo ai ka noho kaʻawale o Hawaiʻi mokupuni iā Kahele, he lunamakaʻāinana o ka ʻAhaʻōlelo Lāhui ma mua, a noho akula ma ko Lindsey wahi he luna hoʻomalu ma kāna hālāwai mua.

Hiki i nā mea koho pāloka a pau i kākau inoa ke koho pāloka ma nā hoʻokūkū Keʻena Kuleana Hawaiʻi ma muli o kekahi manaʻo hoʻoholo o ka ʻAha Hoʻokolokolo Kiʻekiʻe o ʻAmelika Hui Pū ʻIa i ka makahiki 2021 i pau ai ke koho pāloka wale ʻana nō o nā Kānaka Maoli no ke Keʻena Kuleana Hawaiʻi.