Kā ka luna hoʻoponopono nota: Unuhi ʻia na Ākea Kahikina. Click here to read this article in English. 

Makemake ke kalana ʻo Maui iā Bank of America e hoʻokō i kāna hoʻohiki i hoʻopuka ʻia i mau kekeke aku nei i nā Kānaka Maoli e hoʻopaʻa ʻia ai ke kālā he 150 miliona no ke kūkulu a me kūʻai home ʻana ma nā ʻāina i māhele ʻia no lākou e ka ʻAhaʻōlelo lāhui ma hope o ka hoʻokāhuli aupuni ʻana.

Ka Ulana Pilina Badge Olelo Hawaii

I kēlā kauwela aku nei, ua hai ka Maui City Council i kēlā Hawaii Attorney General aku nei ʻo Margery Bronster e uhai i kahi hihia kānāwai i kūʻē iā Bank of America no kona hoʻokō ʻole ʻana i ke kuleana i ko nā mokupuni poʻe ʻōiwi. Ua ʻāpono ka ʻaha i ka uku ʻana i ke kālā he 200,000 a ʻoi i kā Bronster hui ʻoihana.

Mai kēlā wā aʻe, ua pilikia naʻe ke kalana a me nā loio i ke koho ʻana i ka ʻoi o ke alahele no ka paio ʻana i ka lua o ko ʻAmelika panakō nui loa, a ʻo ia kai loaʻa ke kālā he $2.3 kiliona ma ko lākou waiwai a ua hana nui lākou i kāna paipai kālaiʻāina ponoʻī e hūnā ʻia ai ka pilikia. A hala hoʻokahi makahiki aku, ʻaʻohe hihia kānāwai i hoʻouna ʻia a aia wale nō ko ke kalana ʻo Maui mau kūkākūkā ma nā hālāwai luna hoʻokō.

Ma o nā loio a me nā hana hoʻopaipai, ua ʻōlelo ʻo Bank of America, ua hoʻokō lākou i ka hoʻohiki i ko ka paeʻāina mau Kānaka Maoli, akā ʻaʻole naʻe ia i like me kā lākou i hoʻolālā ai. No ka hōʻoia ʻana i ka ʻoiaʻiʻo, kuhi ka panakō i kahi leka i hoʻouna ʻia iā lākou mai ke keʻena aupuni ʻo Department of Hawaiian Home Lands ma ka makahiki 2007 e hōʻike ʻia ai kā lākou hoʻokō ʻana i ka hoʻohiki he 15o miliona kālā.

Flag flies at Kaiona Beach Park with the majestic Koolau Mountains near Waimanalo.
E paio ana kekahi hui liʻiliʻi o nā Kānaka Maoli iā Bank of America e pili ana i kahi hoʻohiki he 150 miliona kālā a ka panakō i hoʻopaʻa ʻia i iwakāluakūmālima makahiki a ʻoi aku. Cory Lum/Civil Beat

 

E ʻalo ana ke kalana ʻo Maui i mau pilikia i ka hoʻoponopono ʻana i kēia hihia, e laʻa ke kū pono ʻana i ke kānāwai.

ʻO nā luna kālaiʻāina i hāpai manaʻo no kēia hukihuki — e laʻa ke kiaʻāina ʻo David Ige a me ke kenekoa U.S. ʻo Brian Schatz — ua ʻōlelo lākou, ʻaʻole lākou ʻike i nā koho he nui i ke koi ʻana iā Bank of America e hoʻoponopono i kā lākou hoʻohiki maoli. ʻŌlelo ʻo Ige, ʻaʻohe pono o ka mokuʻāina e uhai i koi kū i ke kānāwai, no ka mea, ʻaʻole hiki ke ʻimi ʻia kahi palapala ʻaelike a i ʻole kahi ʻaelike hoʻonā me ka panakō.

Ua haʻi ka ʻelele no Bank of America ʻo Bill Halldin i kahi ʻōlelo iā Civil Beat, ua hūhewa ke kalana ʻo Maui i ko lākou uhai ʻana i kahi hihia kānāwai.

“He hōʻihi ko mākou i nā pilikia a ke kaiāulu Kanaka Maoli i ʻalo ai, akā he koi kūpono ʻole kēia i kahi hoʻohiki i hoʻopaʻa ʻia ma ka makahiki 1994,” wahi a Halldin. “Ua hoʻokō ka Panakō i kāna hoʻohiki ʻana a ua hōʻoia ka mokuʻāina i ua hoʻokō ʻana ma ka makahiki 2007.”

Ua kūkākūkā ka Maui County Council i kā lākou mau kaʻakālai kānāwai ma nā hālāwai lehulehu ʻole.

Ua ʻōlelo ka hope luna ʻo Keani Rawlins-Fernandez, e kālele ana ka hihia kānāwai i ko ka panakō hoʻokō ʻole ʻana i kāna pahuhopu no nā Kānaka Maoli e noho ana ma ka ʻāina hoʻokūʻonoʻono a me ka hopena e makehewa ai ko ke kalana loaʻa kālā mai nā ʻauhau pono ʻāina. Ke noʻonoʻo nei hoʻi ke kalana i ko lākou hiki ʻana ke uhai i kahi hihia kānāwai no nā panikū hoʻopunipuni.

“Ua hānau ʻia kēia hoʻohiki e ka hoʻokae ʻili,” wahi a Rawlins-Fernandez. “ʻO wau he Kanaka ʻŌiwi, a ma o ko Bank of America hoʻokō ʻole ʻana i kāna hoʻohiki, ua hōʻeha ua panakō nei i ko kākou lāhui ma ke kāohi ʻana i manawa kūpono no kākou e kūkulu i waiwai hanauna.”

Ua ʻōlelo ʻo ia, ua nui kona hopohopo i hoʻohole ʻole ko ke kalana ʻo Maui i ka hihia kānāwai, e hoʻomau ana ʻo Bank of America e hōʻalo i ke kuleana.

“Loaʻa iā lākou ke kālā, loaʻa iā lākou nā loio mana nui, aia mau nō ka wā ma ko lākou ʻaoʻao,” wahi a Rawlins-Fernandez. “Ua keu ko mākou ʻaha a ka nahoa ma ka paio ʻana no ka poʻe a me nā kaiāulu, akā he manaʻolana koʻu no ka hui pū ʻana mai o nā ʻaha ʻē aʻe, no ka mea, ua hoʻonele pū ʻia ko lākou mau kalana i kēlā mau ʻauhau like a ua hoʻonele pū ʻia ko lākou kānaka i kēlā mau manawa kūpono like.”

ʻUa Manaʻo ʻIa, ʻO Mākou He Poʻe Waiwai ʻOle”

ʻO ka hukihuki o ke kalana ʻo Maui a me Bank of America, aia ke kinohi o ua hukihuki nei ma ka māhele mua o ke kekeke 1990 i ko ka panakō noho mana ʻana ma nā mokupuni.

Ma ka makahiki 1994, ua makemake ʻo Bank of America e hoʻākea i kāna kea mākeke ma Hawaiʻi ma o ke kūʻai ʻana aku iā Liberty Bank i hoʻokahua ʻia ma Honolulu.

Ua koi ʻia ka panakō i ka ʻāpono ʻia a ka Federal Reserve no ka lilo ʻana, akā, ʻo kekahi hui kumuloaʻa ʻole ʻo Nā Poʻe Kōkua a me kahi hui pili ʻo Hawaiʻi Fair Lending Coalition, ua hoʻouka lāua i kumu hoʻopiʻi e hōʻike ʻia ka hana ʻana a nā panakō i kaʻina hana hoʻokae ʻili e ālai ʻia ai nā Pilipino a me nā Kānaka Maoli i ka loaʻa ʻana o nā molaki home.

No ka loaʻa ʻana o kā ke aupuni pekelala ʻāpono ʻana, ua hoʻolaha ʻo Bank of America, e hoʻolako ana lākou i nā kālā he $150 miliona ma o nā hōʻaiʻē molaki i nā Kānaka Maoli e ʻiʻini ana e kūʻai home ma ka ʻāina he 200,000 ʻeka i mālama ʻia no lākou e ke keʻena mokuʻāina ʻo Department of Hawaiian Home Lands.

“Ua wahaheʻe lākou. ʻAʻole lākou i hana pēlā.” – U.S. Sen. Brian Schatz

Ua hoʻohiki ka panakō e hoʻolako i ke kālā he $100,000 ma o nā papahana hāʻawi kāla e kōkua ʻia ai nā Pilipino ma Hawaiʻi ma ka ʻimi hale ʻana a ua mālama ʻia ke kālā he $30 miliona i nā ʻaiʻē kūkulu no ka mokupuni ʻo Kauaʻi, ʻo ia kahi e kūkulu hou ʻia ma hope o ka luku ʻia ʻana e ka makani pāhili ʻo Iniki ma ka makahiki 1992.

Ma ka hapanui o nā kuanaʻike, ʻaʻole nō i hoʻokō ʻokoʻa ka panakō. Ma ka makahiki 1997, ua kāpae ʻo Bank of America i kāna mau hale panakō ma Hawaiʻi nei, a hala ka makahiki 1998, ua hōʻaiʻē ʻia nā Kānaka Maoli noho ʻāina hoʻokūʻonoʻono he $3 miliona wale nō. ʻAʻole naʻe i hulikua ʻokoʻa ka panakō i ka paeʻāina.

Ma kēlā makahiki like, ua koi ʻo Bank of America i kā ke aupuni pekelala ʻāpono ʻana i ko lākou hoʻohui ʻana me NationsBank e lilo i panakō me ka ʻoi o ka nui ma ʻAmelika.

Ua hoʻohiki hou ka panakō e hoʻokō i ke kālā he $150 miliona, a ua kipa mai nā luna panakō i nei paeʻāina e hui pū me Nā Poʻe Kōkua a me nā Kānaka Maoli ʻē aʻe i hoʻokahu ʻia ma ka hale aliʻi ʻo ʻIolani e hōʻike ʻia ai ke kūpaʻa o ka manaʻo.

Aia ʻo Kehaulani Filimoeatu ma kekahi o nā hālāwai, a ʻo ia kekahi mea hoʻokumu no Nā Poʻe Kōkua. No kahi mau manawa, ua nui kona manaʻolana i ko Bank of America hoʻokō ʻana i kā lākou hoʻohiki.

“No nā Kānaka Maoli ma Hawaiʻi, ua manaʻo ʻia mākou he poʻe waiwai ʻole a nui ko lākou hopohopo iā mākou,” wahi a Filimoeatu.

ʻO Kehaulani Filimoeatu kekahi mea hoʻokumu no Nā Poʻe Kōkua, ʻo ia kekahi hui kumuloaʻa ʻole e hōʻeu iā Bank of America e hoʻolako i ke kālā he $150 miliona no nā hōʻaiʻē home. Courtesy: Bryan Berkowitz

Ua ʻāʻumeʻume nā Kānaka Maoli no nā hanauna he nui e kū like — ma nā wahi kālaiʻāina a me nā hoʻokele waiwai — me nā mea i hoʻokolonaio i ka paeʻāina, wahi āna. Na ka nele ʻana i ka hōʻaiʻē ʻole e hoʻomāhuahua aku i nā pilikia o ke kū like ʻole ʻana, keu hoʻi ka ʻoi aʻe o ka nui helu o ka ʻilihune ʻana ma mua o ko nā lāhui ʻē aʻe ma ka mokuʻāina.

Ua ʻōlelo ʻo ia, ua hōʻike kā Bank of America hoʻohiki i manawa kūpono e hoʻolohi aku i kēia pōʻaiapuni maikaʻi ʻole ma o ke kau ʻia ʻana o ke kālā i nā lima Kanaka Maoli e kūʻai aku ana i ko lākou mau home ponoʻī.

Ma ka makahiki 2003, ua hoʻomaka ʻo DHHL e kūkākūkā me Bank of America i kahi ʻaelike kūʻokoʻa e hiki ai iā lākou ke hoʻēmi i ke koena o ka hoʻohiki he $150 miliona ma o nā hana ʻē aʻe, e laʻa ka hōʻaiʻē ʻana i nā hui kūkulu hale.

A hala aku nā makahiki he ʻehā, ua hoʻouna aku ka hope luna no DHHL ʻo Ben Anderson i kahi leka me ka ʻōlelo ʻana, ua hoʻokō ʻia ka hoʻohiki wahi a kāna nānā hou ʻana i kahi pakuhi makaʻaha he ʻelua ʻaoʻao a nā luna panakō i hoʻouna aku ai i ke keʻena, a ʻo ia kai hōʻike i nā moʻo hōʻaiʻē, nā hōʻaiʻē kūkulu, a me nā palapala hāʻawina kālā a lākou i hoʻolako aku ai ma o nā makahiki.

“Ua hōʻike ʻia nō paha ka hoʻokō pono ʻana a BoA wahi a kēia ʻōlelo hōʻoia,” wahi a Henderson.

No Bank of America, ua koʻikoʻi loa ka leka no ka hōʻoia ʻana i ka hoʻokō hoʻohiki ʻana, akā no kekahi mau Kānaka Maoli, ua hōʻike leʻa ʻia nō ke kūkākūkā hūnā ʻana a ke kiaʻāina ʻo Linda Lingle a me kāna hui hoʻolawelawe, e like me ka mea hoʻouluulu kaulana ʻo Bumpy Kanahele i kākau aku ai ma kahi ʻatikala op-ed ma ka Honolulu Star-Bulletin.

Ma ka makahiki 2012, ua ʻōlelo ka Hawaiian Homes Commission, ʻo ia ka mea e nānā ʻokoʻa ma luna o DHHL, ua ʻāpono ʻo Henderson iā Bank of America me ka ʻole o ka ʻāpono ʻana a ke kōmikina.

ʻĀnō, ʻōlelo kahi ʻelele no DHHL, ma waho aʻe o nā leka, ʻaʻole loaʻa i ke keʻena kahi palapala e hōʻoia ʻia ai nā ʻaelike i kākau ʻia a i ʻole nā mea hoʻomanaʻo o ka hoʻomaopopo ʻana me Bank of America me ka wehewehe pono ʻana i ke ʻano kikoʻī e hoʻokō ʻia ai ka hoʻokō, a i ʻole kekahi mau palapala e hōʻoia ʻia ai nā helu i loaʻa ma ua pakahi makaʻaha nei.

ʻO Kehaulani Filimoeʻatu, ʻo ia ka lua mai ka ʻaoʻao hema, a ʻo Catherine Bessant, ʻo ia ke kolu mai ka ʻaoʻao ʻākau, ua hui pū lāua ma Hawaiʻi ma ka makahiki 1998 ma ko Bank of America hōʻoia hou ʻana i ka hoʻohiki he $150 miliona i nā Kānaka Maoli. 

“Na wai lā e kū me ka ʻoluʻolu ke hana ʻia pēlā?” wahi a Brandon Makaawaawa, ʻo ia ka pelekikena ʻānō no Nā Poʻe Kōkua. “ʻO kēlā he $150 miliona kālā me ka ʻole o kahi likiki. Inā hoʻopihapiha a hoʻouna aku kahi kanaka i nā palapala ʻauhau i kēia wā, e ʻoi aʻe ana ka nui o nā palapala na ua kanaka nei”

“Ua kānalua ʻo Makaawawa, ʻo Rawlins-Fernandez, a me kekahi mau kānaka ʻē aʻe i ke kuleana o DHHL ma ke kūkākūkā ʻana me Bank of America, ʻoiai ua hoʻohiki ʻo Bank of America i ke keʻena pekelala, ʻaʻole i hoʻohiki pololei ʻia ke keʻena mokuʻāina.

Ua ʻōlelo ʻo Halldin, ʻaʻole e lawe mai ana ʻo Bank of America i nā palapala ʻē aʻe ma waho o ka pakuhi makaʻaha.

Nā Makahiki Me Ka Hukikuhi ʻAna

Ma ka makahiki 2018, ua hoʻouna aku ʻo Ige i kahi leka iā Catherine Bessant, ʻo ia kahi luna hoʻokō kūlana kiʻekiʻe loa, a ua wehewehe ʻia ʻo ia e kekahi ma ka makakina ʻo American Banker ʻo “The Most Powerful Woman in Banking.”

Ua haʻi aku ʻo Ige iā Bessant, ua “lawehala” ʻo Bank of America i kona hoʻokō ʻana i kāna hoʻohiki i nā Kānaka Maoli, a ʻo ia kēia ka wā kūpono e hoʻi hou mai ai lākou i ka paeʻāina e kūkākūkā i “ʻaelike kaulike hope loa.” A ʻaʻole i liʻuliʻu, ua huliāmahi kahi manaʻo ma o ka mokuʻāina iā Bank of America e hoʻoponopono.

ʻO ka Maui County Council ka mua e ʻāpono i kahi ʻōlelo hoʻoholo e kākoʻo ʻia ai kā Ige hana. Ma o ka makahiki aʻe o ia wā, ua hahai like ko Honolulu, Kauaʻi, a me ko Hawaiʻi ʻaha kalana ma ka ʻaha Kenekoa no Hawaiʻi.

Ua hāpai manaʻo kā ʻo ko Hawaiʻi kenekoa ʻAmelika ʻo Brian Schatz i kona nīnau ʻia ʻana e Filimoeatu ma kahi hālāwai kaiāulu ma Maui.

“Ua wahaheʻe lākou,” wahi āna. “ʻAʻole lākou i hana pēlā.”

Ma ka manawa like, ua hoʻomaka ʻo Bank of America i kā lākou paipai kālaiʻāina ponoʻī e kūʻē i kēia kuanaʻike e kuhi ʻia ai lākou he poʻe i hulikua i ka hoʻohiki ʻana i nā Kānaka Maoli.

Ma ka makahiki 2019, ua hai lākou iā Ivan Lui-Kwan, he loio Kanaka Maoli kaulana, no ka hana hoʻopaipai i nā luna o ka mokuʻāina a me nā kalana. Hōʻike nā palapala molala i kā ka panakō uku ʻana iā Lui-Kwan he $75,000 kālā, a no ka hoʻohuli manaʻo i ke kiaʻāina kekahi māhele nui o ua kālā nei.

Ma luna aʻe o ka hana hoʻopaipai, ua hoʻouna aku ʻo Bank of America i kahi hihia kānāwai i kūʻē iā ke kalana ʻo Maui ma ka makahiki 2020, a ua hana ʻia kēia i mau hola aku nei o ko ka ʻaha hoʻāpono ʻana i kā lākou ʻōlelo hoʻoholo e hoʻomau i ka palapala hoʻopiʻi e kūʻē i ka ʻoihana. Akā, ua kāpae ʻia ua hihia kānāwai nei e  ka U.S. District Court Judge ʻo J. Michael Seabright me ka ʻōlelo ʻana penei, he lele ʻē ka ʻaʻa ʻana, no ka mea, ʻaʻole i hoʻouna ʻē ʻia aku kā ke kalana ʻo Maui hihia kānāwai.

“Ma kahi o ko mākou hoʻohihia ʻana iā mākou iho i kahi mea pohihihi a kala loa, ke koho aku nei mākou e holomua.” — DHHL Alakaʻi ʻo William Aila

Ua hōʻole ʻo Ige i mau noi nīnauele no kēia moʻolelo, akā ua wehewehe pālua kāna keʻena ma o nā ʻōlelo hoʻolaha, ʻaʻole i mau ko ke kiaʻāina manaʻo i ka hiki ʻana i ka mokuʻāina ke koi aku i ʻaelike iā Bank of America.

“Ua paʻa ko ke kiaʻāina kūlana ma hope o ke aʻoaʻo ʻia ʻana a ka Department of the Attorney General, ʻo ia kai nānā hou i ka ʻikepili ma nā palapala ʻaiʻē a me nā papaphana i hiki ke nānā ʻia ma kēia wā ʻānō,” wahi a ke keʻena. “ʻOiai ua hala nā makahiki he iwakālua a ʻoi, ʻaʻohe kaukaʻi oneʻi i ka ʻōʻili ʻana mai o ka ʻikepili hou. Akā, inā e hoʻomaopopo ʻia ana kahi ʻikepili hou, e nānā hou aku ana ka Mokuʻāina i ua ʻikepili nei i ke ʻano e hoʻololi ʻia ai ko mākou kuanaʻike.”

A laila, ua paipai ka ʻōlelo hoʻolaha i nā hui ʻē aʻe i hoʻopilikia ʻia e Bank of America e hoʻoponopono i nā pilikia me ka Federal Reserve a me BOA.”

ʻO William Aila, ʻo ia ke alakaʻi no DHHL, manaʻo ʻo ia, ua hoʻokō nō ʻo Bank of America i kāna hoʻohiki wahi a ka leka a Henderson.

“ʻO Ben Henderson, he kāne kū hanohano ʻo ia,” wahi a Aila. “ʻIke nō kēia, ʻaʻole ʻo ia e hoʻouna aku i kēlā leka inā manaʻo ʻo ia, he hana kūpono ʻole nō paha kāna ma kona kūlana.”

Hoihoi naʻe ʻo Alia e ʻimi i mau manawa kūpono hou no nā mea hōʻaiʻē e hoʻolako i nā hōʻaiʻē kūkulu a me nā mea home i nā Kānaka Maoli i hoʻokahu ʻia. Inā koho ʻo Bank of America i ka hana ʻana pēlā, wahi āna, he hana lehiwa ana nō ia.

DHHL William Aila during Senate Hawaiian Affairs Committee meeting.
ʻO William Aila, ʻo ia ka luna no DHHL, ʻōlelo ʻo ia, ʻo kēia ka wā no kākou e holomua aku ai mai ka hihia me Bank of America a e ʻimi i mau wahi hou no nā hōʻaiʻē i nā Kānaka Maoli. Cory Lum/Civil Beat

“Ma kahi o ko mākou hoʻohihia ʻana iā mākou iho i kahi mea pohihihi a kala loa, ke koho aku nei mākou e holomua,” wahi a Aila. “ʻO koʻu kūlana penei, inā ʻaʻole hoihoi ʻo Bank of America e hoʻi mai i Hawaiʻi no ka hōʻaiʻē hou ʻana, e hana ana nō mākou me lākou.”

Ua hāpai ʻo Bank of America, ʻaʻole maʻalahi ke komo ʻana i ka mākeke no nā hōʻaiʻē home Kanaka Maoli.

Ua ʻōlelo ka panakō, ua paʻakikī ka hoʻokūkū ʻana me nā mea hōʻaiʻē ʻē aʻe, e laʻa ʻo Bank of Hawaiʻi a me First Hawaiian Bank.

Aia hoʻi kekahi nele ʻana i mau ʻāina ʻole i nā laweʻaiʻē ma muli o ko DHHL ʻāʻumeʻume ʻana e kūkulu i nā home hoʻokūʻonoʻono e kō ai ke koina. Ma ka makahiki 1998, wahi a ka panakō, e kakali ana nā Kānaka Maoli i hoʻokahu ʻia he 16,000 a ʻoi i nā ʻāina noho home. Ma ka makahiki 2018, ua māhuahua aʻe ka nui ma ka papa inoa i nā kānaka he 23,000 a ʻoi.

He Hoʻohuli Hoʻonoho Nō Paha Ka Haʻina

ʻAʻole nui ke kanaaho ke peki hope kahi panakō mai kahi hoʻohiki kaiāulu, wahi a Linda Jun, ʻo ia kahi loio kulekele kūlana kiʻekiʻe no Americans for Financial Reform. 

Papa huaʻōlelo hou

ʻO ka hana maʻamau, hoʻopaʻa ʻia ka hoʻohiki ʻana ma loko o ke kaʻina hana no nā hoʻohui panakō a me ka lilo pono ʻana, wahi āna, akā ʻaʻole nui ka nānā ʻokoʻa ʻana ma hope aku. Ma kēlā manawa, aia ka paio ʻana i ke kaiāulu.

“ʻO ka ʻoiaʻiʻo, ʻaʻole nō kēia kahi māhele kūhelu o ke kaʻina hana, a ʻo nā kānaka hoʻoponopono i hiki ke hōʻoi i kā lākou hana, ʻaʻole lākou e hana nei pēlā,” wahi a Jun. “No laila, na ka lehulehu e hōʻoiaʻio i ka mea e hoʻohiki ʻia.”

ʻO Nick Weiner, ʻo ia kahi kanaka no Committee for Better Banks, ua kuhi ʻo ia i ka hana hoʻokamani ʻana a Bank of America ma o ko lākou kūʻē mau ʻana i nā kūkākūkā hou e pli ana i ka hoʻohiki he $150 miliona kālā ma ka wā e kālele ʻia ai ke kaulike a me ke kūlike lāhui ma ka mua o nā kūkākūkā lehulehu.

Ua mōakāka leʻa ia, loaʻa iā Bank of America ke kālā, wahi āna me ke kuhi ʻana i kā lākou ʻōlelo hoʻolaha no ka hoʻonui ʻana i ka uku hana liʻiliʻi loa i kā lākou mau limahana i $25 kālā no kēlā me kēia hola a me ka hoʻopukapuka ʻana i nā kālā he $1 biliona a ʻoi no ke kūlike lāhui a me nā manawa hoʻokele waiwai, keu hoʻi ma nā kaiāulu Pāʻele, nā Hesapanika, a me nā ʻĀkia.

“E ʻākeʻakeʻa aku ana lākou no nā kekeke he nui,” wahi a Weiner. “ʻAʻole maopopo iaʻu ke kumu o ko lākou hoʻi ʻole ʻana no ka hoʻoponopono ika ʻana e kō ai ka hoʻohiki.”

E koi ʻia ana nō paha ka hana a ka ʻAhaʻōlelo lāhui, wahi a Schatz. Ua ʻōlelo kēia, ʻaʻole i ʻimi kāna keʻena i haʻina moākāka e hoʻomaka hou ʻia ai nā kūkākūkā me Bank of America, keu hoʻi ka hoʻopaʻi ʻana iā lākou no ka hulikua ʻana i kā lākou hoʻohiki maoli ponoʻī.

“Ua mākaukau nō kēia māhele no ka hoʻohuli ʻia,” wahi a Schatz. “ʻAʻole e kāpala laholio ʻia nā hoʻohui panakō. Inā mahalo nā mea hoʻoponopono i nā panakō no kā lākou mau hoʻohiki i ko lākou mau kaiāulu, he pono ana nō ke kuleana o nā mea hoʻoponopono e hoʻoholo i nā hoʻohiki. Ua mōakāka leʻa nō ia iaʻu, ʻaʻole nō pēlā kā lākou hana.”

Ua kākoʻo ʻia kahi māhele o kā Civil Beat kūkala nūhou ʻana i ke kalana ʻo Maui e kahi papahana haʻawina kālā maiā Nuestro Futuro Foundation.

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

Not a subscription

Civil Beat is a small nonprofit newsroom, and we’re committed to a paywall-free website and subscription-free content because we believe in journalism as a public service.
 
That’s why donations from readers like you are essential to our continued existence.
 
Help keep our journalism free for all readers by becoming a monthly member of Civil Beat today.

About the Author