Kā ka luna hoʻoponopono nota: Unuhi ʻia na Ākea Kahikina. Click here to read this article in English. 

ʻO kekahi makepono ma kēia au hou o nā hālāwai pūnaewele i lawe ʻia e ka wā maʻi ahulau, ʻo ia ka hoʻomaʻalahi ʻana i ke kūkākūkā ʻana o nā manaʻo mai kahi pae a i kahi pae.

Ka Ulana Pilina Badge Olelo Hawaii

He mea nui nō hoʻi kēlā ma nā mokupuni auwaea. Ma muli o ka maʻamau hou ʻo ka hoʻolele pūnaewele a me nā hālāwai Zoom, ʻaʻohe pono o ko Hawaiʻi poʻe e eʻe i ka mokulele no ka haʻi a me ka hoʻolohe ʻōlelo ʻana, ka nānā ʻana i kahi hōʻike kūʻānō, a i ʻole ke komo ʻana i nā hālāwai hoʻolālā me nā hoa hana ma o ka paeʻāina ʻAmelika.

Hiki iā kākou ke kūkākūkā kūʻānō me nā poʻe a puni ka honua. ʻOi aku nō ka leʻaleʻa ma ka huakaʻi kino ʻana, akā he makamae nō hoʻi ka hiki ʻana ke kūkākūkā i loko nō o nā ālaina ʻāina he nui.

Ke ʻākoakoa pū ka poʻe mai ʻō a ʻō i kahi pūnaewele like, e kālele ʻia ka hoʻohana ʻana i ka ʻōlelo hōʻoia ʻāina.

ʻO ia hoʻi, pēlā nō paha ma kahi mau hui.

ʻO ka ʻōlelo hōʻoia ʻāina penei, “he ʻōlelo paʻalula ia e ʻike a hōʻihi i nā Poʻe ʻŌiwi ma ke ʻano he puʻukū ʻāina kuʻuna lākou a me ka pilina e ʻonipaʻa ana ma waena o nā Poʻe ʻŌiwi a me ko lākou mau kulāiwi ponoʻī,” wahi a ka Native American Council. Ke hoʻokomo pū nā hālāwai pūnaewele i nā poʻe no nā wahi like ʻole, he kupanaha ka hoʻolohe ʻana i nā ʻōlelo hōʻoia ʻāina ma nā ʻano like ʻole.

Wahi a ka National Museum of the American Indian, he loina kuʻuna nō ka ʻōlelo hōʻoia ʻāina i hana ʻia i mau kenekulia ma nā kaiāulu ʻōiwi he nui. Hāʻawi aku ka hale hōʻikeʻike i kēia kahua ʻōlelo maʻalahi me he kinohi lā penei: “Hōʻoia mākou me ka mahalo i nā Poʻe ʻŌiwi a me ko lākou kulāiwi kupuna a mākou e ʻākoakoa ai, a me nā kaiāulu ʻŌiwi like ʻole e noho nei ma ʻaneʻi i kēia lā.”

Ma Hawaiʻi nei, ua hele a maʻamau nā ʻōlelo hōʻoia ʻāina ma nā hanahana moʻomeheu, ma nā pōʻaiapili kula, a me nā wahi hana keaka.

Molokai DHHL Hawaiian Homestead land near the Molokai Airport.
Hoʻokomo nā mea he nui ma o ko ke Kulanui o Hawaiʻi ʻōnaehana i kahi ʻōlelo hōʻoia ʻāina ma ke ʻano he māhele ia o nā ʻaha kūkā, nā hōʻikeʻike a me nā pūlima leka uila. Loaʻa i nā kula pākahi ma o ko UH ʻōnaehana i kā lākou ʻōlelo hōʻoia ʻāina ponoʻī i kikoʻī i ke ahupuaʻa a me ka mokuʻāina a lākou e noho nei. Cory Lum/Civil Beat/2021

Hoʻolaha pūnaewele ʻia nā ʻōlelo hōʻoia ʻāina like ʻole na UH ma ka namu Haole a me ka ʻōlelo Hawaiʻi, a nui a maiau ka manaʻo o laila. Penei kahi māhele o ka ʻōlelo hōʻoia ʻāina no ke kulanui kaiāulu ʻo Kapiʻolani:

“No ka pono o ke Kulanui o Hawaiʻi a me kona Papa o nā Kahu Kula, e hāʻawi kēia me ka hōʻihi i kēia Hōʻoia ʻĀina e hōʻoia ʻia ʻo Hawaiʻi ma ke ʻano he wahi ʻōiwi a me kona mau kupa e kapa ʻānō ʻia ai he Kanaka Maoli. Hoʻohanohano kēia ʻōlelo i ka ʻāina a mākou e kū ai a alakaʻi kēia i ke ʻano a mākou e ʻōlelo a e hana aku ai. Noi kēia i nā kānaka a pau ma ʻaneʻi i ko kākou noʻonoʻo a me ka hoʻohanohano ʻana i nā poʻe ʻōiwi, ʻo ia hoʻi nā puʻukū kuʻuna o ka ʻāina no nā hanauna he nui. Ua mōakāka ka nuʻukia o ke Kulanui o Hawaiʻi i ko mākou hoʻohiki i ka hānai ʻana i ke olapono o ko kākou mau poʻe ʻōiwi a me ko lākou mau kaiāulu ma o ke kaʻina hana akeakamai, a pēlā kākou e kākoʻo aku ai i ka ulu kaiāulu ʻana no ko kākou poʻe a me ka honua.”

Penei kahi mana i hoʻopuka ʻia no ko ke Kulanui o Hawaiʻi keʻena ʻo Place of Learning Advancement:

Papa huaʻōlelo hou

“E hoʻomaka kēia me ka hōʻoia ʻana i ka ʻāina a kākou e ʻākoakoa pū ai…he māhele kēia o kahi māhele nui e ʻike ʻia e nā Kānaka Maoli ʻo Papahānaumoku ʻo ia ʻo ko lākou kupuna wahine. Hōʻoia kēia i ko ka Mōʻīwahine ʻo Liliʻuokalani kuʻu ʻana i ke Aupuni Hawaiʻi a me kēia mau ʻāina ma lalo o ka pōpilikia a me ke kūʻē ʻana iā ʻAmelika e hōʻalo ʻia ai ka luku ʻia ʻana o kona lāhui. Hōʻoia hoʻi kēia iā Hāwaiʻi ma ke ʻano he mokuʻāina o ʻAmelika e noho hewa ʻia nei.”

He politika? ʻO ia nō. He politika mau nō ka loaʻa ʻāina ʻana.

Aʻo ʻia mai ka ʻōlelo hōʻoia ʻāina ma ke ʻano he haʻawina kahua e nā haumāna ma nā polokalamu kaiapuni a me nā kānaka e aʻo mai ana i ka ʻōlelo Hawaiʻi.

“Aʻo aku mākou i kā mākou mau kamaliʻi, ke kū lākou no ka ʻōlelo ʻana aku, e aho lākou e hōʻoia i ka wahi a lākou i hoʻokumu ai no ka hoʻopaʻa ʻia ʻana o nā inoa ʻāina ma ko mākou hāliʻa e ola ana. Ua ʻano like nō paha ia me ko nā Poʻe ʻŌiwi ʻAmelika e hana aku ai me ka hōʻoia ʻana i ko lākou mau hui, nā kūʻauhau, a me nā lāhui,” wahi a ʻIlima Choy, ʻo ia he kumu a he hana moʻomeheu. “Hana ʻia kēia ma ka haʻi ʻōlelo paʻalula a i ʻole ma ka hoʻolauna ʻia ʻana o lākou a me ko lākou ʻāina.”

Opinion article badge

Akā ʻaʻole i hoʻomaʻamau ʻia ke kaʻina hana ma nā ʻākoakoa no ka ʻoihana a me ke aupuni ma Hawaiʻi, a ma nā kaiāulu ʻē aʻe naʻe — e laʻa ʻo Portland, ʻOlekona — hoʻohana pinepine ʻia nā ʻōlelo hōʻoia ʻāina.

Akā naʻe, ʻaʻole nō paha kēlā ka mea kūpono, inā he mea paʻalula ia nā huaʻōlelo e hahai wale aku i kahi ʻano kaulana.

“Ma kahi pae, he pahuhopu maikaʻi loa ko ka ʻōlelo hōʻoia ʻāina, akā hiki paha i ua ʻōlelo nei ke lohe ʻia ma ke ʻano he lomi paʻakai ia ma kahi palapū,” wahi a Makiʻilei Ishihara, ʻo ia he kumu a he hana keaka. “E like me nā ʻōlelo penei, ʻHōʻoia mākou, aia mākou ma nā ʻāina o kēia poʻe ʻŌiwi i ʻaihue ʻia a i ʻole e noho hewa ʻia,’ ‘o ia ka mea e nūnēnūnē ai kēia i ka mea kikoʻī a ka hui e hana aku ai e hoʻopili a e hāʻawi aku i kēia mau kaiāulu ʻŌiwi a lākou e hōʻoia aku ai?”

Eia naʻe, he kinohi nō ia ka ʻōlelo wale ʻana i nā huaʻōlelo o ka moʻolelo a me ke kūlana ʻānō o kahi ʻāina a me kona poʻe. Ua loaʻa iā Hawaiʻi kahi ʻōlelo hōʻaloʻalo no ka hahai lohi ʻana i nā ʻano kaulana e hana ana ma ʻAmelika. Ua aʻo aku nei kekahi iaʻu i kahi mea hoʻomakeʻaka, “Ke kani ka hola ʻelima ma ka Pae Komohana, ma Hawaiʻi, ʻo ka makahiki 1959 ma laila,” a he ʻoiaʻiʻo nō ia no nā makahiki he nui.

Akā, na kēia au hou o nā hālāwai pūnaewele a me ka hoʻolelo kūʻānō e kāpae i kēlā ʻōlelo hōʻaloʻalo. No laila, ma mua o kou hoʻomaka ʻana i kēia hālāwai aʻe, e noiʻi iki i mau ʻōlelo hōʻoia ʻāina. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

We need your help.

Civil Beat is a small nonprofit newsroom that provides free content with no paywall. That means readership growth alone can’t sustain our journalism.

We need those of you who value our journalism to support it.

There is no better time to support our nonprofit newsroom.

About the Author