Kā ka luna hoʻoponopono nota: Unuhi ʻia na Ākea Kahikina. Click here to read this article in English. 

Koi aku kahi hihia hou i nā mea hoʻoponopono pekelala e hoʻomaopopo leʻa i ka hoʻopilikia maoli ʻia ʻana o nā lālākea e nā ʻau moku lawaiʻa aho loloa e holo ana ma nā kai o Hawaiʻi a me Sāmoa ʻAmelika.

Ka Ulana Pilina Badge Olelo Hawaii

ʻO kēlā noiʻi no ka helu manō i hopu ʻino ʻia e kēlā mau moku lehulehu — a me ka hoʻēmi ʻia ʻana o ua helu manō nei a halapohe — ua pono kēlā hana ma ka hoʻokomo mua ʻia ʻana o ka lālākea ma ka papahelu holoholona ʻane halapohe ma ke ʻano he “hopo halapohe” ma ka makahiki 2018, wahi a ka hihia. 

Hiki i kēia noiʻi ke hōʻeuʻeu i kēlā mau ʻau moku lawaiʻa ʻAmelika ke hoʻoholo i nā hana ʻē aʻe ma luna o nā hoʻololi a lākou i hana ʻē aku ai i kā lākou mea pono lawaiʻa, i mea e hoʻēmi ʻia aku ai ka nui o nā manō i make loa i ka lou ʻia ʻana ma ke aho lawaiʻa. 

Eia naʻe, ke “hōʻapaʻapa” nei ka National Marine Fisheries Service no kēlā mau makahiki ʻehā aku nei, a ʻaʻole lākou i hoʻopau i kahi noiʻi hopena i koi ʻia ma lalo o ka Endangered Species Act, wahi a ka hui loio mālama ʻāina ʻo Earthjustice. 

Nakachi Shark Kahu Mano
Kiaʻi ʻia nā lālākea ma ke ʻano he holoholona ʻane halapohe.  Courtesy: Kaikea Nakachi

“ʻAʻohe o kākou manaʻo i ka hopena maoli o ka hana a kēia mau hui lawaiʻa i kēia mau manō,” wahi a Grace Bauer, he loio ma Earthjustice ma ka Pōʻalua. “He kiko nīnau nui loa kēlā.”

Ua hoʻouna hihia ʻo Earthjustice ma ka Pōʻalua ma ka ʻAha ʻĀpana ʻAmelika no ke Conservation Council for Hawaiʻi lāua ʻo Mike Nakachi, he hana moʻomeheu Hawaiʻi ma Kona. Ua hōʻike ʻē ʻo CCH lāua ʻo Nakachi iā National Marine Fisheries Service ma ka makahiki 2019 i ko lāua makemake e hoʻopiʻi ma muli o ko ke keʻena nele ʻana i kahi “kūkā ʻana” ʻole i ka lālākea. 

ʻAʻole mōakāka ke kumu o ko NMFS hoʻopau ʻole ʻana i kā lākou noiʻi. Ua hōʻike akula kahi wahaʻōlelo wahine ma ka Pōʻakolu, ʻaʻole hiki i ke keʻena pekelala ke hāpai manaʻo i nā hihia e holo nei. 

“He nīnau kēia e huikau ai kākou,” wahi a Moana Bjur, ʻo ia ka luna hoʻokō no CCH. “He holoholona kēia e halapohe ana…kainō, makemake kekahi hui aupuni e hoʻonui i kā lākou ʻikepili.”

ʻO ka mea i mōakāka, ʻo ia ka iho ʻana o nui lālākea i kēlā mau kekeke aku nei, a he lāhui holoholona i ola nui ma mua, ʻoiai, ua hopu hewa ʻia lākou e nā ʻupena ma o ka Pakipika. 

Kuhi ʻia, ua iho ka nui manō me he 95% lā mai ka waena o nā makahiki 1990, wahi a kahi hoʻolaha nūhou na Earthjustice. 

Hōʻike ka ʻikepili na ka International Western and Central Pacific Fisheries Commission, ua hopu hewa ʻia ka lālākea he 53,500 i kēlā me kēia makahiki e nā ʻau moku lawaiʻa o Western and Central Pacific mai nā makahiki 2013 a 2017. Hoʻokomo ʻia nā hopu he 1,700 i kēla me kēia makahiki e ko Hawaiʻi mau moku lawaiʻa kai hohonu. 

I kēia wā, ua hoʻolaha ka Western Pacific Regional Fishery Management Council, ua hopu ʻia ka lālākea he 2,125 e ko Hawaiʻi mau moku lawaiʻa kai hohonu ma ka makahiki 2019, wahi a ka hihia hou. ʻO kēlā ʻaha i kapa ʻia ʻo Wespac, nāna e mālāma i ko ʻAmelika mau hui lawaiʻa ma ka māhele ʻāina. 

Oceanic Whitetip Shark Mike Nakachi Hookupu
He mea hoʻopiʻi ka hana moʻomeheu Hawaiʻi ʻo Mike Nakachi ma kahi hihia hou e koi aku i nā mea hoʻoponopono pekelala e nānā pono i ka hopena a ka lawaiʻa kai hohonu i nā lālākea.  Kuʻu Kauanoe/Civil Beat/2020

Make nā manō “he helu nui” i hopu hewa ʻia ma muli o ka hoʻopilikia ʻia ʻana, wahi a ka hihia. 

Koi aku ka hihia i ka ʻikepili mōakāka no ka hopena o nā manō ma Hawaiʻi a me Sāmoa ʻAmelika mai nā mea nānā ma National Oceanic and Atmospheric Administration e ʻauamo pono ʻia ai ko lākou kuleana, wahi a Bjur ma ka Pōʻakolu. 

Ma ka makahiki 2020, ua hoʻolaha ka Hawaiʻi Longline Association, e kuapo kūikawā ʻia nā mea alakaʻi uea kila ma ka wēlau o nā aho lawaiʻa me nā mea naelona e kiaʻi pono ʻia ai nā manō. E hoʻoholo ʻia kahi pāpā maiā NOAA i nā mea alakaʻi uea ma ka hopena o kēia mahina. 

ʻIke nā mea mālama ʻāina a me nā lawaiʻa i kēia hoʻololi ma ke ʻano he hehi kūpono, akā kapa ʻo Bauer i kēia mea he “kī ma ka pō” ke hoʻomaopopo ʻole nā mea hoʻoponopono pekelala i ka hopena maoli a nā ʻau moku lawaiʻa kai hohonu i nā manō. 

“He kuleana kēlā e koi ʻia ai ka Endangered Species Act no ka hana ʻana pēlā,” wahi a Bauer. “Ua pono i ke keʻena ke hoʻokō i kēia mau mea ma mua o ka hoʻāpono ʻana i nā hui lawaiʻa e hana.”

ʻAʻole i pane akula nā ʻelele Wespac i kahi noi hāpai manaʻo ma ka Pōʻalua. Eia naʻe, ma ka makahiki 2019, ua hāpai ko ka hui luna hoʻokō ʻo Kitty Simonds i leo hopohopo nui e pili ana i ka hōʻailona no ka hōʻea ʻana mai o ka hihia, a ʻōlelo akula ʻo ia, hiki i ua hihia nei ke pani ʻokoʻa i nā hui lawaiʻa a hiki i ka hoʻonā pono ʻia ʻana o ka hihia, wahi a ka leka nūhou ʻo Environment Hawaiʻi. 

Wahāwahā akula ʻo Simonds iā National Marine Fisheries Service i ko lākou hoʻokō lolohi ʻana i nā kuleana, a ʻo kona paio kālaimanaʻo nui akula nō ia me kahi luna hoʻoponopono o NMFS ma kahi hālāwai Wespac, wahi a Environment Hawaiʻi. 

ʻĀnō, he ʻoiaʻio maoli ka hihia i hopohopo ai ʻo Simonds i kēlā mau makahiki ʻekolu aku nei. 

“Ua koho akula mākou e hoʻomau i ka paio ʻana no ka hōʻike ʻikepili helu,” wahi a Bjur. “E loaʻa ka ʻikepili helu.”

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

Support nonprofit, independent journalism.

During this election season, we hope that our coverage provides you with the information to make informed decisions on issues that you care deeply about.

Whether it’s affordable housing, education or the environment, these issues depend on your vote, and our ability to report on them depends on your support.

Every contribution, however big or small, allows us to continue keeping readers informed through election day and beyond. So, if you found value in our coverage, please take the next step by making a contribution to Civil Beat today.

About the Author