Kā ka luna hoʻoponopono nota: Unuhi ʻia na Ākea Kahikina. Click here to read this article in English.

Ke mālama ko Hawaiʻi Council for Native Hawaiian Advancement i kāna Native Hawaiian Convention ma kēia Pōʻalua, e hōʻike ana kēlā hanana i kahi manawa koʻikoʻi no ka hui — he pāʻina piha makahiki 21 no ka hui waiwai hoʻopuka ʻole i hoʻomaka me kekahi nuʻukia haʻahaʻa penei, e hui pū ʻia nā hui paipai no nā Kānaka Maoli. 

Ka Ulana Pilina Badge Olelo Hawaii

ʻĀnō, ma kahi hōʻike ʻana i kona ikaika e ulu ana, ke hoʻomākaukau nei ka ʻaha e mālama i kekahi o nā hanana politika kaulana o ke kau koho balota nei, ʻo ia nā paio kālaimanaʻo a nā moho nui no ke kūlana he kiaʻāina a he hope kiaʻāina, a e hoʻolele kīwī ʻia kēia ma ke ahiahi o ka Pōʻahā. 

Ma kahi lanakila ʻē aʻe, ʻaneʻane mākaukau ka ʻaha e hoʻolilo i ko Hawaiʻi palapala ʻaelike mākeke no ʻAmelika, ʻo ia ka ʻoi kelakela o ka hōʻumeʻume malihini ʻana no ka mokuʻāina, a he $34 miliona ka waiwai ma o ʻelua mau makahiki. Ua hoʻonohonoho ka ʻaha i hui me nā hui lima no ka hoʻomākeke, ka noiʻi, a me ka pāpaho, a ʻo ko lākou kāʻili akula nō ia i ka palapala ʻaelike mai ka hui kaulana ʻo Hawaiʻi Visitors and Convention Bureau, ʻo ia ka mea nāna i hoʻomākeke iā Hawaiʻi no hoʻokahi kenekulia a ʻoi. 

Kuhio Lewis, President and CEO of the Council for Native Hawaiian Advancement.
ʻO Kuhio Lewis, ʻo ia ka pelekikena a me ka CEO o ke Council for Native Hawaiian Advancement, a lana nō kona manaʻo, e hōʻeuʻeu ʻo ia i ka poʻe ma mua o nā koho wae moho ma o ka mālama ʻana i ka ʻaha hoʻokuʻikahi o ka hui ma Iulai.  Cory Lum/Civil Beat/2022

“Ma ke ʻano laulā, he manawa koʻikoʻi kēia, ʻaʻole no nā Kānaka Maoli wale nō, pēlā hoʻi no kahi hui waiwai hoʻopuka ʻole e hana nei no ko Oʻahu a me Hawaiʻi,” wahi a Esther Kiaʻāina, he lālā papa ʻaha ma mua e hana nei ma ka Honolulu City Council. 

He paʻakikī ka ʻike ʻole ʻana i ka hana a ka ʻaha, wahi a Colin Moore, he polopeka ʻike politika ma ke Kulanui o Hawaiʻi ma Mānoa a ʻo ia ke alakaʻi o ko UH Kikowaena Kulekele Lehulehu. 

“ʻO ka mālama ʻana i ka paio kālaimanaʻo, he hōʻailona ia i ko lākou hoʻāʻo ʻana e ʻike ʻia, ma kahi o ka noho ʻana me he hui lawelawe ma hope loa o nā mea e holo nei,” wahi a Moore. “Noʻu, ke hōʻoiʻoi nui nei lākou i ka hōʻoi ʻia ʻana o ko lākou kākoʻo ʻana i nā Kānaka Maoli, a ʻaʻole kēlā he mea ʻino.” 

ʻŌlelo akula ʻo Kuhio Lewis, ʻo ia ka luna hoʻokō o ka ʻaha, ma o ka hoʻoneʻe ʻia ʻana o ka ʻaha hoʻokuʻikahi mai kona lā kuʻuna ma ʻOkakopa i ke kauwela, lana ka manaʻo o ka ʻaha, e hōʻeuʻeu ʻia ka poʻe ma mua o ke koho wae moho. 

“ʻAʻohe kuhihewa ma ka noho ʻana o kā mākou ʻaha ma Iulai,” wahi a Lewis ma kahi nīnauele. “He koʻikoʻi ka hoʻopili sivila ʻana o mākou a me ka poʻe i nā wahi e koʻikoʻi ai nā mea.”

Ma kēlā ʻano, e mālama ʻia ana ka ʻaha ʻehā lā i nā kūkākūkā pānela i nā pilikia i pili i nā poʻe ma waho o nā Kānaka Maoli. Eia hoʻi, e mālama ʻia kahi kūkākūkā e pili i ka pilikia wai ma Kapūkakī me nā mea pānela mai ka Sierra Club, Board of Water Supply a me ka U.S. Navy. E hoʻohui pū kekahi pānela ʻē aʻe no ka hoʻokipa malihini i nā meia ʻelima a pau no kēlā me kēia mokupuni. 

ʻO nā mea kākoʻo, ʻo ia ka nui o ko Hawaiʻi mau hui ʻoihana a me nā hui waiwai hoʻopuka ʻole, e laʻa ʻo Hawaiian Airlines, First Hawaiian Bank, Bank of Hawaiʻi, Hawaiian Electric, The Queen’s Health System, a me ka Hawaiʻi Community Foundation, a komo pū nā hui ʻoihana aupuni ʻo AT&T lāua ʻo Amazon. 

Me ke kau ʻia o nā inoa he 1,500 no ka hele ʻaha ʻana, ʻo ko kēia makahiki ʻaha ka nui loa, wahi a Lewis. 

ʻO kekahi poʻomanaʻo hoʻokuʻikahi penei, “ʻo ke ʻano a ka Hawaiʻi e mālama aku ai iā Hawaiʻi,” wahi a Lewis. 

“ʻAʻole kēia i pili i nā Hawaiʻi wale nō, ua pili i ka hoʻōla ʻana iā Hawaiʻi,” wahi a Lewis.

ʻO Ka Hoʻōla ʻAna I Ka Hawaiʻi A Me Hawaiʻi

ʻO ka hoʻōla ʻana i nā Kānaka Maoli a me ke kaiāulu, ʻo ia mau nō ka nuʻukia o ka ʻaha, wahi a Robin Danner, ʻo ia ka hoʻokumu o ka ʻaha, a nāna e mālama i kahi hui hou ma Wakinekona, D.C. Ma ka hoʻomaka ʻia ʻana o ka ʻaha ma ka makahiki 2000, ua manaʻo ʻia, e lilo ia mea i māmalu no nā hui Hawaiʻi ʻē aʻe e hana ana i ka hoʻomohala kaiāulu ʻana, wahi a Danner.

Ua ʻauamo koke ka ʻaha i kahi kuleana paʻa ma ka hoʻomohala hoʻokele waiwai ma o ka loaʻa ʻana o kahi palapala hōʻoiaʻiʻo no ke kūlana pekelala he Community Development Financial Institution. Ma o ka mālama ʻia ʻana e ka Waihona Kālā ʻAmelika, hāʻawi kālā ka polokalamu mai ka wā a Clinton e pelekikena ana i nā hālau kālā kūikawā e lawelawe ana i nā kaiāulu i hiki ʻole ke hana pū me nā panakō maʻamau a me ke kumu waiwai. 

No ka ʻaha, ua pili kēia i nā kānaka hōʻaiʻē, e laʻa nā kānaka e makeʻe ana i ka hoʻolimalima hale me ka Department of Hawaiian Home Lands. ʻOiai, e hoʻokahu ʻia ka ʻāina o DHHL no ka poʻe Hawaiʻi, a hiki ke hoʻolimalima wale ʻia nō nā hale a ʻaʻole e ʻona ʻia e nā kānaka i loaʻa ka palapala hoʻolimalima hale iā lākou, ua kānalua nō nā panakō molaki i ka hāʻawi kālā ʻana i nā mea hoʻolimalima hale no ke kūkulu hale ʻana. Ua lilo ka ʻaha i mea hāʻawi kālā hope loa no nā mea i hoʻokahu ʻia ma lalo o DHHL me ka hāʻawi pū ʻana i ke aʻo uku pono me ka hōʻaiʻē ʻana. 

Ma ko Lewis lilo ʻana i luna no ka polokalamu ʻo CDFI ma ka makahi 2018, ua loaʻa i ka hui ka waihona kālā he $3.5 miliona. Ua ulu aʻe i $10 miliona, wahi āna. Ua hāʻawi kālā ʻia ka hui he $15 miliona o nā hōʻaiʻē mai ko CDFI kinohi. 

Ma o ka hana pū ʻana me nā mea hōʻaiʻē, e hoʻokō ʻia ka uku hoʻi pono ʻana o lākou i kā lākou lako ʻaiʻē ponoʻī, wahi a Lewis. He 2% ko ka polokalamu helu lawehala, wahi āna. Ua kūkulu nā mea hōʻaiʻē he nui i kā lākou helu kumu ʻāiʻē i kahi e hiki ai i ka ʻaha ke hoʻolilo i nā hōʻaiʻē ma CNHA i nā panakō kuʻuna, a ʻo ia ka mea e nui aʻe ai ke kālā a CNHA a hiki ke hāʻāwi ʻia i nā kānaka hōʻaiʻē ʻē aʻe. 

Ua kūkulu hoʻi ka hui i nā mea ʻē aʻe, e laʻa nā polokalamu no ka hoʻomohala limahana a me ka hōʻaiʻē no nā hui ʻoihana liʻiliʻi. 

Council for Native Hawaiian Advancement entrance located in Kapolei.
ʻO ke Council for Native Hawaiian Advancement, ua hoʻonui ʻia ka waiwai o nā hāʻawi kālā mai $1 miliona a i $70 miliona i ka makahiki 2021.  Cory Lum/Civil Beat/2022

Ua hoʻomākaukau kēia mau mea a pau i ka hui no kahi kūlana ulu nui ma ka wā i pā mai ai ka wā maʻi ahulau. 

Ma kahi laʻana ʻē aʻe no ke ʻano hana wikiwiki o CNHA, ua kōkua ka hui i nā hui ʻoihana kamaʻāina me nā ukana i kūʻai ʻole ʻia aku ma hope o ke kāpae ʻia ʻana o Mele Manaka ma ka makahiki 2020 ma muli o ka wā maʻi ahulau. 

ʻO kā CNHA “Pop-Up Mākeke,” ʻo ia kai mālama akula i mākeke no nā hui kūʻai i kūʻai ʻole ma o ka pūnaewele ma mua. ʻĀnō, mai Iune o ka makahiki 2020, ua kūʻai akula ka hui i nā mea kūʻai he 300,000 a ʻoi ma o ka pūnaewele, wahi a Lewis. 

He keu ka lanakila o ka mākele, wahi āna, no laila, ke kūʻai nui mai nei ka ʻaha i nā mea mai nā hui kūʻai Kanaka Maoli a kūʻai hou aku lākou ma ke kumukūʻai liʻiliʻi. 

Akā, ʻaʻole ka mākeke wale nō kekahi mea i hiki maila ma ka wā maʻi ahulau. 

Hōʻike pono maila ko CNHA mau palapala kālā i kahi mea kupahana ma o nā makahiki i hala, ʻo ia ka ulu ʻana aʻe o nā haʻawina kālā mai ka nui he $1 miliona i kēlā me kēia makahiki ma ka makahiki 2018 i $70 miliona i ka makahiki 2021. 

Eia hoʻi, ʻo ka palapala hoʻi ʻauhau pekelala no ka makahiki i hoʻopau ʻia i Kepakemapa 2019, hōʻike ua palapala nei i ko ka hui hāʻawi ʻia ʻana mai i $1.9 miliona i kēlā makahiki, a he $1.1 miliona ka nui ma ka makahiki ma mua. 

Ma ka makahiki ma hope aku — ma ka wā e pā ana ka maʻi ahulau a e kōkua ana hoʻi ʻo CNHA i ka mālama ʻana i nā kālā hoʻēmi pilikia — ua hoʻonui ʻia nā haʻawina kālā i $10.9 miliona. Ma ka makahiki 2021, ua hōʻike ka ʻaha, he $70.4 miliona a lākou kālā ma o nā haʻawina kālā aupuni a me nā palapala ʻaelike. 

ʻAʻole kēia ke kālā no CDFI wale nō, ua hoʻokomo ʻia ke kālā maʻi kolona no ke kōkua uku noho hale, a ʻo ia ka mea a ka ʻaha i mālama aku ai me ka hana pū ʻana me Catholic Charities Hawaiʻi.

Wehewehe ʻo Lewis, he mea hoʻohaʻahaʻa ka hana a CNHA i hana aku ai ma ka wā maʻi ahulau. ʻO CNHA kekahi o nā hui like ʻole ma Hawaiʻi a me ʻAmelika i hāʻawi kālā kōkua i ka poʻe i hoʻopilikia ʻia e ka wā maʻi ahulau. He minamina nō naʻe ko laila, no ka mea, ʻaʻohe palapala ʻāina no ke kūkulu koke ʻana i kēlā ʻano mau polokalamu. I mea e kūkulu ʻia ai nā ʻōnaehana ʻenehana ʻikepili, ua ʻōlelo akula ʻo Lewis, ua huli ʻo CNHA i nā wilikī pūnaewele i hana me nā hui e like me Queen’s Health Systems lāua ʻo Hawaiian Electric. 

“ʻO ka ʻoiaʻiʻo, ua kūkulu akula mākou mai lalo lilo aʻe,” wahi āna. A hana lākou ma ka wā i paʻa ʻino loa ai ko Hawaiʻi hoʻokele waiwai, ʻoiai, ua hopohopo a pilikia loa nā home a me nā hui ʻoihana. 

“Pēlā me lākou, pēlā pū hoʻi me mākou, he wā hulihia nō ia,” wahi āna. 

ʻIke ʻo Lewis i nā pilikia kekahi. Ma ke ʻano he luna ʻo ia o ka hui, ua lohe akula ʻo ia i nā moʻolelo kaumaha mai nā kamaʻāina hopohopo loa mai, ua hoʻomakaʻu ʻia kekahi e ka hakuʻāina, a makemake lākou e hoʻoponopono i nā pilikia kālā me ka wikiwiki loa. 

Eia naʻe, ua ʻōlelo akula ʻo Lewis, ua hāʻawi ʻo CNHA i ke kālā kōkua i nā hale he 15,000. 

Robin Danner Farrington HS forum. 11 nov 2016
ʻO ka mea hoʻokumu o CNHA ʻo Robin Danner, ʻōlelo akula ʻo ia, he keu ka lōʻihi o ko HTA kālele ʻana i ke “kūʻai ʻana aku iā Hawaiʻi me he ʻea lā” no ka hoʻokipa ʻana i nā malihini ma o ka uku ʻana o nā kamaʻāina. “Ua nānā ʻole ʻia nā kamaʻāina,” wahi āna.  Cory Lum/Civil Beat/2016

A ʻo ka piʻi aʻela nō ia o CNHA i pae hou aʻe. Ua hāʻawi ka hui i ka nui haʻawina kālā ma ka wā maʻi ahulau i kohu like me ka nui e hāʻawi ʻia i ʻekolu a ʻeha mau makahi. 

Ke hoʻohui ʻia nā mea a pau, ua loaʻa mai i ka hui ka nui kālā he $150 miliona ma o nā palapala ʻaelike, a ua hāʻawi ʻia akula he $110 miliona i kēia manawa. 

ʻĀnō, ke kū mākaukau nei ʻo CNHA e hana i kekahi mea nui aʻe. ʻO kā Hawaiʻi Tourism Authority palapala hoʻomākeke hou, hiki maila ua palapala nei i kahi wā hulihia no ka hoʻokipa malihini ma Hawaiʻi. Ma ka hoʻoponopono ʻia ʻana o ka ʻoihana mai nā lā ʻino o ka wā maʻi ahulau, ʻo ia ka wā i kāpae ʻia ai ka hoʻokipa malihini, ke hoʻāʻo aku nei ʻo HTA e hoʻoponopono pū i nā pilikia ma o nā kamaʻāina e ʻōlelo ana, he keu ka nui malihini ma ka mokuʻāina. 

Ua hōʻike kahi noiʻi ma ka makahi 2021 na ka hui kuleana hoʻokipa malihini, manaʻo nā kamaʻāina he 67%, “ke hoʻohana ʻia nei ka mokupuni no nā malihini ma o ka uku ʻana o nā kamaʻāina,” a pēlā pū hoʻi ka nui ma ka makahiki ma mua, a ua hoʻonui ʻia mai ka helu he 50% ma ka makahiki 2010. 

Me kēlā manaʻo, ke hoʻāʻo nei ka hui kuleana hoʻokipa malihini e hoʻololi hou iā lākou iho ma ke ʻano he hui lākou e hoʻomākeke wale ʻole iā Hawaiʻi a e mālama ana nō lākou i nā hopena maikaʻi ʻole o ka hoʻokipa malihini. Eia hoʻi, ʻōlelo akula ʻo HTA, makemake lākou i kā lākou moho palapala ʻaelike a hoʻomākeke a e mālama iā Hawaiʻi. 

ʻŌlelo akula ʻo Danner, ua lohi loa kēia hoʻololi nuʻukia, he keu ka lōʻihi o ko HTA kālele ʻana i ke “kūʻai ʻana aku iā Hawaiʻi me he ʻea lā” no ka hoʻokipa malihini ma o ka uku ʻana o nā kamaʻāina. 

“Ua nānā ʻole ʻia nā kāmaʻāina,” wahi āna. 

Hawaii Tourism Authority CEO John De Fries speaks during the arrival of ANA's A380 aircraft at Daniel K. Inouye International Airport.
ʻO John De Fries, ʻo ia luna hoʻokō o Hawaiʻi Tourism Authority, a ke huli aku nei ʻo ia iā CNHA no ka hoʻomākeke ʻana a me ka mālama pono ʻana iā Hawaiʻi ma ke ʻano he wahi hoʻokipa malihini no nā ʻAmelika.  Cory Lum/Civil Beat/2022

I loko nō o ka nuʻukia hou, ʻo kā HTA noi ʻana i nā papahana hoʻolale ma ʻApelila, kālele nui ia i ka hoʻomākeke ʻana a me ka hoʻolaha ʻana. ʻO ka hapanui o nā loiloi hana i kākau ʻia ma ka palapala i pili i kā HTA hana maʻamau penei, ʻo ka hoʻolaha ʻoe, ʻo ka hoʻomākeke ʻoe, a me ka pilina lehulehu. Ua kālele kekahi o nā hana i nā mea i pili i ka mālama wahi ʻana, akā he 50 ka nui o nā mea e nānā ana i ka helu o nā mea hahai ma ka pāpaho pili kanaka, ka ʻōnohi maka no ka hoʻolaha e paʻi ʻia a e hōʻike kīwī ʻia a me ka helu o ka ʻatikala e kākau ʻia e nā mea kākau e kipa mai ana i Hawaiʻi ma o nā huakaʻi hoʻomākaʻikaʻi e uku ʻia e HTA. 

Malihini loa ʻo Council for Native Hawaiian Advancement i ka hoʻomākeke hoʻokipa malihini ʻana, akā, ua lanakila lākou i ka palapala ʻaelike ma hope o ka hoʻākoakoa ʻana mai i kahi hui ʻo “Kilohana Collective.” ʻO nā lālā nui ʻo Core Group One, he hui ʻoihana no ka hoʻomākeke, ka hoʻolaha inoa a me nā hana pāpaho i hana ma lalo o nā hui hōkele e like me Aston, ʻo Wondros, ʻo ia kahi keʻena kaʻaʻike e hoʻomākeke a e hoʻolaha me nā limahana he 200 ma Los Angeles, San Diego, Pittsburgh a me Wakinekona, D.C., ʻo Pae ʻĀina Communications LLC/Island Agency, he keʻena pilina no ka lehulehu a me ka pāpaho a he keʻena kaʻaʻike pikineki, a me Ward Research, he hui ʻoihana noiʻi ʻikepili. 

ʻŌlelo akula ʻo Lewis, ʻo ka mea i ulu aʻe ai ka hoihoi o ka ʻaha i ka palapala ʻaelike, ʻo ia ko HTA nānā ʻana ma waho o ka hoʻomākeke ʻana.

“He koʻikoʻi ke kuhi ʻana, he wehewehe kuleana ʻoihana hou kēia,” wahi a Lewis e pili i kā HTA palapala ʻaelike me ka ʻōlelo ʻana, ʻaʻole nō pili wale i ka hoʻomākeke ʻia ʻana o ka mokuʻāina i nā malihini. 

ʻO kā ka ʻaha papahana hoʻolale i lanakila, ua kūlia ia ma luna o ka hōʻumeʻume ʻana i nā ʻōnohi maka. Ua hoʻokomo kāna papahana mālama wahi i nā manaʻo e like me ka hoʻohana ʻana i kā ka ʻaha mau polokalamu hoʻomohala limahana e kākoʻo i nā kānaka i hoihoi i ka hana ʻana ma ka hoʻokipa malihini ʻana. 

ʻO kekahi manaʻo ʻē aʻe, ʻo ia ka paipai ʻana i ka loina alakaʻi i hoʻokumu ʻia e kekahi hui hou e ulu ana ʻo ʻĀina Aloha Economic Futures, ʻo ia nā loina a HTA i hoʻokomo ai ma kāna nuʻukia ponoʻī. Pili kēia i ke kākoʻo ʻana i nā mahi e hoʻohana ana i nā hana he ʻokanika a he mālama ʻāina a me nā polokalamu hoʻomaʻamaʻa e lilo ai nā huʻeaʻo i limahana no nā lālā kaiāulu. 

He ālaina hope loa ko ka ʻaha, ke hoʻāʻo nei ke keʻena no nā mea kipa a me ka ʻaha ʻana e ʻauʻa i ka palapala ʻaelike hoʻomākeke ma o ke kūʻē ʻana i ko ka HTA hāʻawi ʻana aku i ka ʻaha. 

Akā, inā lanakila ka ʻaha, he mea nui ana ia i nā hui hana Hawaiʻi, wahi a Nāʻālehu Anthony, he hana kiʻiʻoniʻoni Kanaka Maoli ʻo ia, a ʻo ia kekahi o nā mea hoʻokumu o ʻĀina Aloha Economic Futures. 

No nā makahiki he 100 i hala aku nei, ua hoʻohana ka HVCB i kāna palapala ʻaelike e kūkulu i kaiaola o nā hui ʻoihana. Inā loaʻa ka palapala ʻaelike i ka ʻaha, hiki iā lākou ke hana like pēlā, wahi a Anthony.

“He kupanaha nō hoʻi kēia,” wahi āna e pili i ka ulu ʻana aʻe o CNHA. “A ua pili nō ia i ke alakaʻi ʻana o Kuhio Lewis.”

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

What sets us apart.

Regardless of who or what you voted for, we hope we’ve distinguished ourselves from other news media through our election coverage as well as our commitment to strengthening the civic health of Hawaii.

Now, we’re asking you to consider becoming part of something larger than yourself by joining as a Civil Beat member.

Help kick-start Civil Beat’s summer fundraising campaign with a gift of $5+/month or one-time donation of $60+ and receive a limited edition “Truth Maze” beach towel.

About the Author