Kā ka luna hoʻoponopono nota: Unuhi ʻia na Ākea Kahikina. Click here to read this article in English.

ʻAʻole i ʻike mua ʻo Miki Cook i ke kulanui ma ke ʻano he alahele nona ma kona wā e nui aʻe ana ma Hāna. ʻAʻohe kēkelē kulanui a kona mau mākua, a ʻaʻole nui ka pilina moʻomeheu i ka hele kulanui ʻana ma o kona mau hoa a me nā kumu. 

Ka Ulana Pilina Badge Olelo Hawaii

Akā naʻe, i kona komo ʻana i kahi papa kālai ma ke Kulanui Kaiāulu o Koʻolau, a he 30 ona makahiki a ʻoi, ua ʻike leʻa ʻo Cook i kahi wahi nona e kū ai ma ka ʻimi noiʻi ʻana. Ua lawe maila ke kālai ʻana i nā nīnau e pili ana i ka ʻōlelo Hawaiʻi. A laila, hoʻokahi papa ʻōlelo Hawaiʻi. A laila, hoʻokahi papa hou aku. ʻAkahi nō ʻo ia i aʻo ʻia e nā kumu he hapanui kāne Kanaka Maoli. 

ʻĀnō, ke ʻimi aku nei ʻo Cook i kēkelē laeʻula ma ka hoʻonaʻauao ʻana ma ke Kulanui o Hawaiʻi ma Mānoa, a ke aʻo pū aku nei ʻo ia i nā haumāna kula kiʻekiʻe e komo ana i ko Koʻolau polokalamu kulanui mua, ʻo ia kahi hana paha e hoʻoponopono ana i kahi hihia maoli ma Hawaiʻi, ʻo ia ka helu e emi ana o nā kāne Kanaka Maoli e komo ana i ko ka mokuʻāina ʻōnaehana kulanui. 

“ʻIke wau ma ke ʻano he kumu kāne, he kuleana nui koʻu i kaʻu mau haumāna,” wahi a Cook. 

ʻO ka nui haumāna ma ka ʻōnaehana Kulanui o Hawaiʻi, ʻo nā wāhine he 60%.  Cory Lum/Civil Beat/2022

Ua emi ke komo papa ʻana he 20% ma ka mokuʻāina ma o kēlā kekeke aku nei, akā ua ʻoi aku ka nui o ka emi ʻana no nā kāne Kanaka Maoli, ua emi ihola ka nui o nā kāne he 30% mai kēlā kekeke aku nei i kēlā kau kupulau aku nei. 

Aia ka hoʻololi nui ma ka pae kulanui kaiāulu. Ma ke kau kupulau ma ka makahiki 2012, he 3,274 kāne Kanaka Maoli i komo i ko ka mokuʻāina mau kula kaiāulu ʻehiku. Ma kēlā kau kupulau aku nei i loaʻa ai nā kāne he 1,973 — ʻo ia ke emi he 40%. 

He hihia kēia, ʻaʻole pili wale nō i ka loaʻa ʻole o nā makepono hoʻokele waiwai o ke kēkelē kulanui, he wahi koʻikoʻi nō paha ke kulanui no ke aʻo ʻana i ka ʻōlelo Hawaiʻi a me ka moʻomeheu, wahi a Brian Keoki Faria, he kumu ‘ōlelo Hawaiʻi ʻo ia ma ke Kulanui Kaiāulu o Koʻolau. 

“Inā makemake ʻoe e hoʻonaʻauao ʻia i ka moʻolelo, ka ‘ōlelo, a me ka moʻomeheu Hawaiʻi, ʻo ka hele kulanui ka ʻoi o ke alahele e hoʻokō ʻia ai pēlā,” wahi a Faria. 

Pehea e hoʻonaʻauao ʻia ai nā ʻōpio Hawaiʻi inā hele ʻole lākou i ke kulanui? “He manaʻo hoʻoweliweli nui kēlā,” wahi āna. “He mea hoʻohopohopo nui nō ia.” 

He Hoʻololi Ma O Ke Aupuni

Ke ʻike aku nei nā kulanui ma o ke aupuni i ka hoʻololi ʻia ʻana o ke ʻano haumāna i kēia mau kekeke i hala aku nei, ʻo ia nō ka nui o nā wāhine a me ka liʻilʻi o nā kāne ma ke kahua kula. Ma Hawaiʻi naʻe, he hakahaka nui ko ʻoneʻi nei ma waena o nā keka no nā haumāna Kanaka Maoli ma waho o Honolulu. 

ʻO ka nui o nā haumāna, ʻo nā kāne he 38% ma ka ʻōnaehana Kulanui o Hawaiʻi. No nā Kānaka Maoli, he 33% ka nui — a he helu e paipai ʻia e ke komo nui ʻana o nā haumāna ma ke Kulanui o Hawaiʻi ma Mānoa. 

Akā naʻe, ma ke Kulanui o Hawaiʻi ma Oʻahu Komohana, he kāne ko laila no kēlā me kēia haumāna Kanaka Maoli he ʻehā. Pēlā pū me nā kula kaiāulu o Kona a me Koʻolau. 

ʻO ka hapanui o ka hoʻonui ʻana i ka hoʻokō kēkelē a me ke komo haumāna ʻana no nā Kānaka Maoli ma kēia mau kekeke i halu aku nei, ua pili ia i ka helu o nā haumāna wahine e komo ana. 

I loko nō o ka nui o nā papahana e hoʻonui i ka helu o nā haumāna kulanui Kanaka Maoli, ʻaʻole nui ka papahana e kālele ana i ka pono o nā kāne Kanaka Maoli ma ke kaiāulu ʻimi noiʻi. 

UH West Oahu Campus Center Building.
Ma UH Oʻahu Komohana, he ʻekolu wahine Kanaka Maoli ko laila no kēlā me kēia kāne Kanaka Maoli.  Cory Lum/Civil Beat/2019

ʻAno haiki ka noiʻi e pili ana i nā mea e pilikia ai nā kāne Kanaka Maoli ma ka hele kula ʻana. 

Like kēia mau pilikia no nā kānaka ʻilikea ʻole ma o ke aupuni ma ka ʻimi ʻana i kēkelē kulanui, wahi a Adrian Huerta, he hope polopeka ma ka University of Southern California e noiʻi ana i ke ʻano a ke kulanui e kākoʻo pono aku ai i nā haumāna kāne. 

“Aʻo ʻia nā kāne ʻilikea ʻole, mai noi i ke kākoʻo ʻia ʻana. E kūʻokoʻa. He mea ia e paʻa ai lākou,” wahi a Huerta, a ʻaʻole lākou e kākoʻo ʻia no ka hoʻokele pono ʻana i ka hele kula ʻana. 

Wahi a ka ʻike o nā haumāna a me nā kumu Kanaka Maoli, ʻo ka nele ʻana i nā kumu kāne ʻole no nā haumāna kula aupuni he nui, ʻo ka hilinaʻi ʻole ʻana i nā keʻena aupuni a me ka hopohopo i ka loaʻa koke ʻana o ke kālā ma hope o ka hemo kula kiʻekiʻe, ʻo ia nō paha nā ālaina e pilikia ai ke komo haumāna ʻana. 

He mea nui nō paha nā hihia hoʻokele waiwai, ʻo ia kai ʻike ʻia ma nā hoʻololi ʻana i ka hele kulanui ma ka wā maʻi ahulau ʻo Covid-19. Ma o ke aupuni, ua emi mai ka nui o nā kāne e hele i nā kulanui he 19% ma nā kula ʻelua makahiki ma waena o nā makahiki 2019 a me 2021, wahi a Huerta. He pilikia nui kēlā, no ka mea, ʻo ke kula kaiāulu ka ʻīpuka nui no nā kāne e komo ai no ka hoʻonaʻauao ʻia ʻana. 

“Ke walaʻau nei kākou e pili ana i hoʻokahi kāne no kēlā mē kēia kāne he ʻelima e haʻalele kula ana,” wahi a Huerta. “He minamina nō ia, no ka mea, hiki paha i kēlā ke lilo i mea hulihia no kekahi hoʻololi hanauna…Ua nalowale ka manawa e hoʻololi i kēlā ʻohana ma o nā ʻohana ʻelima ʻē aʻe a me ka hana ʻaleʻale e loaʻa ai kahi puka kulanui ma ka ʻohana.”

Pono Nā Alakaʻi Hou

Ua ʻike ʻo Loea Akiona i ka nele ʻana i nā kāne ʻole ma ke kula ma kona wā e hana ana me he limahana haumāna lā ma ke Kula Kaiāulu o Kona. Ua hoʻokomo ʻo ia i kona hopohopo i kāna noiʻi ma kāna palapala laeʻula ma ke Kulanui o Hawaiʻi ma Mānoa i mau makahiki aku ma hope. 

No Akiona, ʻo “Where Are the Brothers? Native Hawaiian Males and Higher Education” ka inoa o kāna palapala laeʻula, ʻaʻole ʻo ia i kālele i ke kumu o ka hele ʻole ʻana o nā kāne i ke kulanui, ua kālele ʻia nā mea e pili like ai nā kāne Kanaka Maoli ma ke kahua kula. 

ʻŌlelo ʻo Akiona, wahi a kāna mau haumāna i nīnauele aku ai, ʻo kekahi mea i pili pū ai lākou, ʻo ia ka hoʻomaopopo ʻokoʻa ʻana i ke ʻano o ke kāne ʻana a me loaʻa ʻana o kahi makuakāne i hōʻike leʻa i nā mea e pā ai ka naʻau me ka mōakāka. 

ʻO kekahi mea ʻē aʻe, wahi a Akiona, ʻo ia ka pono i nā polokalamu hoihoi i pili i ka moʻomeheu. A me ka loaʻa ʻana o nā alakaʻi ma ke kula. 

“ʻO ka loaʻa ʻana o nā kumu a me nā limahana i kohu like me nā kānaka a mākou e hānai pū ʻia ai ma o ka hiʻohiʻona, ka ʻōlelo, a me ka noʻonoʻo ʻana,” wahi a Akiona. 

ʻO Kaimana Cabebe, ʻo ia kahi luna hoʻonohonoho wahi no Hāna no ko Hāna kula kamaliʻi ʻo Pūnana Leo, a welina ʻo ia i nā haumāna ma ka polokalamu kaiapuni a DOE ma ke kula haʻahaʻa o Hāna. ʻO ka loaʻa ʻana o nā alakaʻi kāne ma ke kula, hiki ia ke hoʻololi i ke komo kulanui ʻana, wahi a kekahi mau kumu.  April Estrellon/Civil Beat/2020

ʻO ke aʻo ʻia ʻana e kahi kāne polopeka ʻike Hawaiʻi, ua hoʻololi nui ia iā Akiona ma ka lua o ke kau o kona wā e hele kulanui ana. 

“Ua hōʻike maila ʻo ia i ka hiki ʻana. He polopeka ʻo ia. He kēkelē laeoʻo kāna, a ʻano like kona ʻano me koʻu mau hoa hānau a pau,” wahi a Akiona. “No laila, ua hiki iaʻu ke ʻike iaʻu iho e hana like ana pēlā, ʻo ia hoʻi ka lanakila ʻana.” 

ʻŌlelo ʻo Faria ma ke Kulanui Kaiāulu o Koʻolau, makemake ʻo ia e ʻike i nā Kānaka Maoli he nui — ʻo nā kāne a me nā wāhine — e ʻimi naʻauao ma ke kulanui. Akā, ʻo kona hopohopo nui, ʻo ia ka nele i nā kumu kāne ʻole ma ke kula mai ka papa mālaaʻo a i ka papa ʻumikūmālua. 

He Kanaka Maoli ke poʻo kumu o ko Cook kula kiʻekiʻe, akā ʻaʻole ʻo ia i hoʻomanaʻo i ka nui ʻino o nā kumu kāne Kanaka Maoli ma ke kula. Hoʻomanaʻo ʻo ia i nā kāne Kanaka Maoli ma ke kula e hana ana ma ke ʻano he kahu mālama kula. 

“He mau kumu like ʻole koʻu, he poʻe lawaiʻa, he poʻe hahai holoholona, a akamai loa kēia ʻano poʻe,” wahi a Cook. “Akā, ʻaʻole nō loaʻa iā lākou kahi kēkelē laeʻula a laeoʻo, a ʻaʻole nō paha i hiki iā lākou ke walaʻau mai e pili ana i ka ʻimi noiʻi.” 

ʻO ka loaʻa ʻana o nā alakaʻi kāne ma nā papa ʻōpio, hiki i kēlā ke hoʻopili nui i nā hanauna hou o nā haumāna i ke kula, wahi a Faria. 

“Manaʻo wau, ua hala ʻē nō ka Puʻulena no mākou ma mua loa aku,” wahi āna. 

Kākoʻo ʻia kā Civil Beat kūkala nūhou hoʻonaʻauao ʻana e kahi haʻawina kālā na Chamberlin Family Philanthropy. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

Support nonprofit, independent journalism.

During this election season, we hope that our coverage provides you with the information to make informed decisions on issues that you care deeply about.

Whether it’s affordable housing, education or the environment, these issues depend on your vote, and our ability to report on them depends on your support.

Every contribution, however big or small, allows us to continue keeping readers informed through election day and beyond. So, if you found value in our coverage, please take the next step by making a contribution to Civil Beat today.

About the Author