Kā ka luna hoʻoponopono nota: Unuhi ʻia na Ākea Kahikina. Click here to read this article in English.

E koho ana nā mea koho pāloka ma ke kalana o Maui i ka hopena o kahi noi kaulana e hoʻoholo ʻia ai kahi aupuni ʻōlelo pālua ma ka pae kamaʻāina. 

Ka Ulana Pilina Badge Olelo Hawaii

Koi ka papahana i ke kalana e hoʻolaha i nā ʻōlelo kūhelu ma ka ʻōlelo Haole a me ka ʻōlelo Hawaiʻi, ʻo ia ka ʻōlelo ʻane halapohe o ko Hawaiʻi poʻe ʻōiwi e hoʻōla ʻia aʻe nei ma hope o kekahi mau hanauna e emi iho ana ua ʻōlelo nei. 

ʻO ka nīnau pāloka ma ka lā 8 o Novemapa, ʻo ia ka mea e haku i keʻena kumu waiwai ʻōiwi no ka mālama ʻana i nā hana kalana i pili i ka ʻōlelo Hawaiʻi, nā inoa wahi, nā kumu waiwai, nā wahi pana, ka hana moʻomeheu, nā ilina kupuna a me nā iwi. E hana pū ke keʻena me ka luna hoʻolālā kalana ma ka hoʻoponopono ʻana i ka Maui County General Plan a me nā palapala hoʻolālā nui ʻē aʻe e mālama pono ʻia ai a e hoʻomau ʻia ai kēia mau kumu waiwai. 

ʻO kēia kekahi o 13 mau noi e hoʻololi i ko ke kalana o Maui hoʻāmana a nā mea koho pāloka e noʻonoʻo ai, ʻo ia ka mea nui o ke kaʻina hana ma kēlā me kēia kekeke e hāʻawi ʻia ai nā makaʻāinana no Maui, Molokaʻi, a me Lānaʻi i ka mana e hoʻoponopono ʻia ai ka ʻōnaehana politika ma luna o ko lākou nohona. E noʻonoʻo pū hoʻi nā kānaka i nā hana hoʻoponopono i pili i ka hoʻonui mōakāka ʻana ma ka hoʻokō kānāwai ʻana, e laʻa ka loina aupuni a me ka hoʻonui ʻana i ka hiki ke nānā i nā palapala lehulehu. 

Maui County Building, voter box
E koho ana nā mea koho pāloka no ke kalana o Maui i ka hopena o 13 mau pākuʻi hoʻololi hoʻāmana ma ka pāloka ma ke koho pāloka laulā ma ka lā 8 o Novemapa.  Bryan Berkowitz/Civil Beat/2020

ʻO ka pākuʻi hoʻololi hoʻāmana e noi ʻia, ʻo ia ke haku i Keʻena Kumuwaiwai ʻŌiwi e ʻauamo pono ʻia ai nā kuleana kumukānāwai o ke kalana ma ke kiaʻi ʻana i nā kumu waiwai kūlohelohe lehulehu a me nā loina kuʻuna Hawaiʻi, wahi a nā mea kākoʻo. 

Ua hai ʻē ke kalana i nā mea unuhi ʻōlelo Hawaiʻi, a ʻakahi nō a hai ʻia kahi kanaka hulikoehana ma Iune 2020 no ka mālama ʻana i nā kumu waiwai kūlohelohe a me nā wahi pana. 

Hiki i kēia mau kūlana ke ʻimi i home kohu ʻē aʻe ma lalo o kahi keʻena kumu waiwai ʻōiwi, wahi a Keani Rawlins-Fernandez, ʻo ia ka hope luna ma ka ʻaha kalana o Maui, a ʻōlelo hoʻi ʻo ia, moemoeā ʻo ia i ka noho ʻana o ke keʻena ma ke ʻano he kumu waiwai no nā mea kūkulu hale e ʻimi ana i kahi hoa kūkā no ka moʻomeheu a me kahi haʻina ma ka huʻe ʻia ʻana o nā iwi kupuna e ke kūkulu hale ʻana. 

Akā, wahi a nā mea loiloi, ʻaʻole mōakāka kahi e pae ai kēia papahana. 

E haku ana anei ke kalana i nā pāloka ʻōlelo Hawaiʻi a me nā hōʻailona alahele? A, inā pēlā, na kēia mau hoʻololi paha e hōʻoi i ka hoʻomau ʻana i ka moʻomeheu a me ka ʻōlelo Hawaiʻi? A i ʻole, he wahi hōʻailona pipiʻi kēia e hōʻihi wale aku i ka moʻomeheu hoʻokipa o ke kalana?

A he aha lā ke kumukūʻai?

ʻAʻohe noiʻi kālā lehulehu e hōʻike leʻa ʻia aku ai ke kumukūʻai inā ʻāpono nā mea koho pāloka i kēia hana. Wahi a ka luna nānā helu kalana ʻo Lance Taguchi, ke hana ʻia nei nō kahi noiʻi pēlā, akā ʻaʻole mākaukau ia a hiki i kinohi o ʻOkakopa. 

Eia hoʻi, e koi ana kahi pākuʻi hoʻololi hoʻāmana ma ka pāloka i kahi hōʻike hopena nui kālā no nā pākuʻi hoʻololi hoʻāmana a pau e hiki mai ana. 

I kēia manawa, e noʻonoʻo ana nō paha nā mea koho pāloka i ke kumukūʻai i pili i ke keʻena hou o ke kalana o Maui e nānā pono i ka ʻoihana mahiʻai, a ʻo ia ka i koho nui ʻia e nā mea koho pāloka ma ka makahiki 2020. 

ʻO ke keʻena i hoʻomaka ma ka lā 1 o Iulai, he hehi nui nō ia ma ka pani ʻana i ka hakahaka hoʻokele waiwai ma o ka nele ʻana i ke kōpaʻa ʻole a me ka hala kahiki ʻole. ʻĀnō, ʻelua ona limahana — he luna i hoʻokohu ʻia a he hope luna, a he $114,000 a he $102,600 ko lāua loaʻa makahiki ponoʻī. 

“Pipiʻi nui loa kahi keʻena hou,” wahi a Alice Lee, ʻo ia ka luna ma ka ʻaha kalana o Maui, ʻo ia ka i paipai i ke keʻena ʻoihana mahiʻai hou, akā ʻōlelo naʻe ʻo ia, nui ʻino nā nīnau e pane ʻole ʻia i pili i ke kumukūʻai a me ka pahuhopu o kahi keʻena ʻōiwi, no laila, ʻaʻole hiki iā ia ke kākoʻo i ua keʻena nei. 

“He koʻikoʻi nō naʻe kahi Keʻena Kumuwaiwai ʻŌiwi,” wahi āna, “akā, he pono nui anei kēia ma kēia manawa ma kahi o ka mālama olakino, ka palekana lehulehu, a me ka hoʻohuli aniau? No ka mea, he pono ka uku ʻana o kahi kanaka no kēia. Nui ʻino nā papahana e hoʻokūkū ana no kahi ʻāpana liʻiliʻi o ke kālā i hoʻokaʻawale ʻia.”

ʻO Keoni Kuoha, ʻo ia ke komikina hoʻāmana no Maui, a ʻo ia hoʻi kahi mea kākau i ka pākuʻi hoʻololi i noi ʻia, a noke nō ʻo ia, e liʻiliʻi ana nō ke keʻena ke hoʻomaka ʻia ua keʻena nei. ʻO ke kūlana mua o ia keʻena, ʻo ia nō paha ke aʻoaʻo wale ʻana. 

ʻO kekahi o nā kuleana o ke keʻena, wahi āna, ʻo ia “ke kōkua ʻana i ka hoʻolālā pono ʻana o ke keʻena hoʻolālā” i hiki ke hōʻalo pono ʻia nā hihia pipiʻi a ʻeha loa ma waena o ka pahuhopu no ka mālama kumu waiwai Hawaiʻi a me ka hoʻomohala a me ka hoʻolālā kalana. 

“Ma nā pōʻaiapili e nānā ʻole ʻia ai nā kumu waiwai moʻomeheu like ʻole e nā mea hoʻomohala a me nā mea hoʻolālā, ua hele nō a hihia loa kēlā mau mea, ua lilo i hihia kānāwai,” wahi a Kuoha. “ʻIke wau i kēia keʻena me he manawa kūpono lā e hoʻolālā pono aku ma mua loa o ka ʻōʻili hihia.”

A ʻo kahi keʻena kumu waiwai ʻōiwi, wahi āna, ʻaʻole ia he makepono i nā Hawaiʻi wale nō. 

“Inā ʻike ʻoe i nā hālau hula, nā hui hoe waʻa, a me nā hui ʻē aʻe e hoʻomau ana i ka moʻomeheu Hawaiʻi, ʻaʻole lākou a pau he Hawaiʻi,” wahi a Kuoha. “Ua neʻe mai nei kekahi o lākou i Hawaiʻi nei, ua aʻo maila lākou i kēia moʻomeheu nani, a ua hoʻokomo ʻia ua moʻomeheu nei e lākou ma ko lākou mau nohona ponoʻī.” 

Kuhi ʻia, e hoʻouna leka ʻia nā mea koho pāloka i kā lākou mau pāloka ma ka waena o ʻOkakopa no ke koho pāloka laulā.

Ua kākoʻo hapa ʻia kā Civil Beat kūkala nūhou ʻana i ke Kalana o Maui e nā haʻawina kālā na Nuestro Futuro Foundation a me Fred Baldwin Memorial Foundation.

An Important Note

If you consider nonprofit, independent news to be an essential service that helps keep our community informed, please include Civil Beat among your year-end contributions.

And for those who can, consider supporting us with a monthly gift, which helps keep our content free for those who need it most.

This year, we are making it our goal to raise $225,000 in reader support by December 31, to support our news coverage statewide and throughout the Pacific. Are you ready to help us continue this work?

About the Author