Kā ka luna hoʻoponopono nota: Unuhi ʻia na Ākea Kahikina. Click here to read this article in English.

Ma hope o ke kūkākūkā ʻana me nā alakaʻi kaiāulu, ua hoʻomaka ʻo Oprah Winfrey lāua ʻo Dwayne Johnson i kekahi waihona kālā no nā kānaka i koe ma hope o ke ahi ma ka lā 8 o ʻAukake ma Lāhainā a me Kula. 

ʻO ka People’s Fund of Maui, ka mea nāna i hoʻopuka ʻia ma ka Pōʻahā me kā lāua haʻawina kālā he $10 miliona, ua hoʻomaka ʻia no ka hāʻawi ʻana i $1,200 ma kēlā me kēia mahina i kēlā me kēia makua e noho nei ma nā wahi i hoʻopilikia ʻia a i loaʻa ʻole iā lākou nā home ma muli o ke ahi, wahi a kekahi hoʻolaha nūhou. 

“Ua hālāwai maila au me nā kānaka like ʻole ma ke kaiāulu nāna i hoʻopilikia ʻia e nā ahi ma kēlā mau pule i hala aku nei, me ka nīele ʻana aku hoʻi i ka mea ʻoi loa e pono ai lākou a me koʻu kākoʻo ʻana iā lākou,” wahi a Winfrey ma kekahi nūhou i hoʻolaha ʻia. “ʻO ka mea nui aʻu e lohe nei, ʻo ia nō ko lākou hopohopo i ka holomua ʻana i loko nō o ke kaumaha kālā he nui. Ua huliāmahi mai ke kaiāulu ma nā ʻano maikaʻi he nui, a ʻo koʻu makemake, ʻo ia nō koʻu kōkua ʻana i nā kānaka i hoʻopilikia ʻia ma ko lākou wā e hoʻopaʻa nei i ke ʻano a lākou e kūkulu hou aku ana no lākou iho.”

ʻO nā alakaʻi kaiāulu, e laʻa ʻo Hokulani Holt-Padilla, Kealiʻi Reichel, Archie Kalepa, Ekolu Lindsey, Kimo Falconer, Tiare Lawrence, Kaimana Brummel, Kaleikoa Kaʻeo, Brian Keaulana, Kaimi Kaneholani, Henohea Kane, Paele Kiakona, Ed Suwanjindar, Shep Gordon a me Jason Momoa, ʻo lākou nō nā kānaka i alakaʻi a hāpai manaʻo aku no ke ʻano kūpono e kōkua aku ai nā kōkoʻolua kaulana i ia kaiāulu. 

Wahi a Johnson ma kekahi hoʻolaha nūhou, ua ʻākoakoa maila nā alakaʻi kaiāulu no ka hōʻoia ʻana i “ka holo pololei ʻana o ke kālā i ka lima ponoʻi” o nā kānaka i hoʻopilikia ʻia. 

“Ma ka wā e ʻike maka ana ka honua i ka luku a me ka hoʻonalowale ʻia ʻana e ke ahi ʻāhiu ma Maui, ua ʻike maka pū ʻia hoʻi ke ʻano maikaʻi a me ke kūpaʻa o ko kākou moʻomeheu Polenekia a me ka ikaika lua ʻole o ko Maui poʻe,” wahi a Johnson ma kekahi hoʻolaha nūhou. “I loko nō o ka wā paʻakikī loa, huliāmahi nō ko Maui a ea — pēlā nō kākou e ikaika ai.”

Uluhua nō nā kamaʻāina no Maui i ka nele ʻana o ke kālā ʻole mai ke aupuni mai ma kēia papahana kūkulu hou, no laila, ua hoʻomaka nā kānaka he nui i nā ʻaoʻao GoFundMe a me nā mea ʻē aʻe no ka hoʻolako ʻana i ke kōkua he kālā i nā kānaka e pono ai ua kōkua nei. 

ʻO nā hui lehulehu ʻole, e laʻa ka Hawaiʻi Community Foundation, ua hana nui lākou e hoʻolako i ke kālā he nui. Ua hoʻolako mai ka Maui Strong Fund i $67.5 miliona ma ka Pōʻalima. 

Hiki ke kōkua ʻia nā luaahi ahi ma o nā uku kālā he $700 mai ka Federal Emergency Management Agency. Hiki ke loaʻa mai he $1,000 hou aku ma o Maui United Way. 

Ua hala nā kānaka he 115 i ke ahi ma Lāhainā, a ua nalowale nā kānaka he 388. ʻO nā ahi kūʻokoʻa ma Kula a me Olinda, na lākou i ʻai i nā home he 19. Ke hoʻohui ʻia nā mea a pau, ua ʻai ʻia nā kūkulu he mau kaukani e ke ahi, a kuhi nā luna, he $5 biliona ka nui o ka pōʻino.

Ua pau aku nei ka hana ʻimi a hoʻopakele ma hope o ka hala ʻana he ʻekolu pule, a ʻo ka hoʻomaʻemaʻe koena, me ke kōkua ʻia ʻana e ka Environmental Protection Agency, ua hoʻomaka ʻia ma Lāhainā. 

Inā makemake ʻoe e hāʻawi kālā, e kipa aku iā PeoplesFundofMaui.org. Hāʻawi pololei ʻia ke kālā a pau i nā kānaka i hoʻopilikia ʻia ma Maui, wahi a ka nūhou i hoʻolaha ʻia. 

ʻO kā Civil Beat kūkala nūhou ʻana i pili i ke Kalana o Maui, ke uku hapa ʻia nei e kekahi haʻawina kālā mai ka Nuestro Futuro Foundation.  

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.