ʻO kekahi hui hoʻopuka waiwai ʻole hou i hoʻokumu ʻia e Archie Kalepa, he loea kai, makemake ia hui i nā kānaka e ʻike a hoʻomaopopo i ka mea i nalowale loa ma ka wā i ʻai ʻia ai ʻo Lahaina e ke ahi. 

Kā ka luna hoʻoponopono nota: Unuhi ʻia na Ākea Kahikina. Click here to read this article in English.

ʻO Lahaina, he kaiāulu ia o nā kupa a me nā kamaʻāina i pili loa kekahi i kekahi, a ua luku nui ʻia e ka ʻoi loa o ke ahi ʻāhiu ma ʻAmelika ma loko o kēia kenekulia ma kinohi o ʻAukake. 

Uā kālai hou ʻia ke kaona o Maui e ka nalowale, ke kaumaha, a me kekahi mea mana loa, ʻo ia nō ka mamao ma waena o nā hoa noho. 

  • Civil Beat stories ma ka ʻōlelo Hawaiʻi

ʻO nā ʻohana i nalowale ai ko lākou mau home, ua hoʻoneʻe ʻia lākou i ʻō a ʻō ma Maui a ma ʻō loa aku. Ke hoʻolimalima nei lākou i nā keʻena noho ma nā kaiāulu hou, ke noho nei me nā hoa ma nā ʻāina like ʻole, a i ʻole, ke noho nei lākou ma nā lumi i uku ʻia e FEMA. 

Ua haʻalele kekahi iā Maui no ka noho ʻana ma kahi e ʻuʻuku ai ke kumukūʻai noho. ʻO nā kānaka e noho paʻa nei ma nā māhele i hoʻopakele ʻia e ke ahi, na lākou nō e hoʻopilikia ʻia nei e ka nele ʻana i nā kānaka ʻole he mau kaukani nāna i hoʻoneʻe ʻia. 

ʻO Archie Kalepa, he lālā ʻo ia o ka Polynesian Voyaging Society, a ua hoʻākoakoa maila ʻo ia i nā hoʻokele waʻa no ke kōkua ʻana iā Lahaina. (Christie Wilson/Civil Beat/2023)

“ʻO nā kānaka a pau e noho nei ma kēia kāiaulu, nā kānaka hoʻi i loaʻa a loaʻa ʻole ai ka hale, he ʻīnea nō ko laila,” wahi a Archie Kalepa, he keiki noho papa he ʻeiwa hanauna ma Maui Komohana. “I loko nō o ka ʻaelike a me ka ʻaelike ʻole o kākou no ke alahele kūpono, he pono ko kākou lōkahi ma ka hoʻopaʻa ʻana i hoʻolālā kūkulu hou i kākoʻo ʻia e kākou a pau.”

He mau koho paʻakikī ko ke kaiāulu i pili i ke kūkulu hou ʻana. A, wahi a Kalepa, he loea kai a he alakaʻi kaiāulu, ʻaʻole hiki i nā kamaʻāina o ke kaona ke koho inā ʻaʻohe lōkahi o ke kaiāulu. 

No laila, ma o kekahi hui hoʻopuka waiwai ʻole ʻo Lele Aloha, ka mea hoʻi i hoʻokumu ʻia e Kalepa i kēlā mahina aku nei, ke hoʻonohonoho nei ʻo Kalepa i kahi hanana hoʻokuʻikahi no ka hoʻākoakoa ʻana mai i nā kupa, nā kamaʻāina, a me nā malihini mai ʻō a ʻō no ke kōkua ʻana iā Lahaina, a lana kona manaʻo, he hanana ia e hoʻōla a e hōʻaelike aku i nā kānaka. 

Hoʻonohonoho ʻia ka Hoʻūlu Lahaina Unity Gathering ma ka hola 8 o ke kakahiaka ma ka lā 20 o Ianuali me kekahi helena he 4.5 mile mai ke alanui ʻo Lahaina Bypass Road a i Launiupoko, kahi e hoʻoholo ʻia ana nā hana leʻaleʻa no nā ʻohana, nā haʻi ʻōlelo, ka mea ʻai a me nā hulahula a hiki i ka hola 4. 

E hele ʻia ana ke alanui ʻo Honoapiʻilani, a e pani ʻia ana hoʻi ia alanui, ʻaʻole hiki i nā kaʻa ke holo ma laila ma ka wā e holo nei ka hanana. Ma ka helena, e ʻike ana nā mea hele wāwae i nā koena o ka mea i ʻai ʻia e ke ahi, a me kekahi mea hoʻomanaʻo no nā luaahi ahi e kū ana ma haʻi o ka wahi hoʻomaka. 

“Ke kono aku nei mākou i nā kānaka a pau e hele mai ma kēia lā hoʻokahi, i hiki iā kākou a pau ke hui pū a ʻike leʻa i nā mea i nalowale loa.”

Archie Kalepa, he mea hoʻonohonoho kaiāulu

Ua manuahi lehulehu ka helena a me ka hoʻolauleʻa ma ka pāka kahakai. Paipai ʻia nā kānaka e kau inoa ma LeleAloha.org, i hiki iā lākou ke hāʻawi manawaleʻa i $5. 

Mahuʻi ʻo Kalepa, e hōʻea mai ana nā kānaka he mau kaukani no ka hanana, a ʻōlelo maila ʻo ia, he koʻikoʻi nō ke komo ʻana o nā kānaka like ʻole no Lahaina. 

Wahi āna, ua hōʻeuʻeu aku ʻo ia i nā alakaʻi kaiāulu like ʻole e kono aku i ko lākou mau hoa kaiāulu e komo mai. Paipai ʻia hoʻi nā kupa me nā kamaʻāina no Maui Nui e komo mai. 

No nā kānaka i hele ʻole i Lahaina no ka hōʻihi ʻana i nā kānaka i pilikia i ke ahi, ua ʻōlelo mai ʻo Kalepa, he kono kēia hanana no ke kipa ʻana mai i laila, ka ʻike maka ʻana i ka luku ʻana, a me ke kōkua ʻana i ke kūkulu hou ʻana. 

“ʻO ka ʻoiaʻio, pono mākou i ke kōkua ʻana mai o nā kānaka a pau, pono kākou e kōkua kekahi i kekahi,” wahi a Kalepa. “Ke kono aku nei mākou i nā kānaka a pau e hele mai ma kēia lā hoʻokahi, i hiki iā kākou a pau ke hui pū a ʻike leʻa i nā mea i nalowale loa. A laila, hiki paha iā ʻoe ke hoʻomapopo i ke kumu o kēia luku ʻana me ke ʻano a kākou e hōʻalo aku ai i ka luku hou ʻia ʻana.” 

The entrance to Front Street in Lahaina off of Honoapiilani Highway remains barricaded after the Aug. 8 fires. (Nathan Eagle/Civil Beat/2023)
Mau nō ka pani ʻia ʻana o ke alahele ʻo Front Street ma Lahaina ma ke alanui ʻo Honoapiʻilani. ʻO ka Hoʻūlu Lahaina Unity Gathering, e hoʻomaka ʻia ana ia hanana ma ka hola 8 o ke kakahiaka ma ka lā 20 o Ianuali, a hoʻomaka ʻia ia hanana me ka helena he 4.5 mile ma ke alanui kapakai i pili i nā kauhale i luku ʻia. (Nathan Eagle/Civil Beat/2023)

Penei ka mākia a Lele Aloha: e hoʻohanohano i ko Hawaiʻi moʻokūʻauhau a e kiaʻi i kona wai, kona ʻāina, a me kona mau kumuwaiwai moʻomeheu — a ʻo Lahaina ka hoʻomaka, ʻo ia hoʻi ke kapikala o ke Aupuni Hawaiʻi. ʻO ke kōkua ʻana i ko Lahaina kūkulu hou ʻia ʻana, ʻo ia nō ka wā e hōʻike aku ai ua hui hoʻopuka waiwai ʻole nei i kona mākaukau a me kona waiwai, wahi a Kalepa. 

ʻO ka hoʻoponopono ʻana i ka nele ʻana i nā hale ʻole a me ke kūkulu hou ʻana i nā hale pule he ʻehiku i ʻai ʻia e ke ahi, ʻo ia nō kekahi o nā pahuhopu nui o ka hui. 

Ke kau aku nei nō nā maka o ka hui i ka hoʻōla ʻana iā Mokuʻula, ka mokupuni he hoʻokahi ʻeka i puni i kekahi loko wai i noho ai ka hale aliʻi o Kamehameha III. Ua waiho wale ʻia ka mokupuni ma ka pau ʻana o ke kenekulia 18, a ua hoʻopiha kīmeki ʻia ia moku e ke aupuni hou ma ka makahiki 1914 no ka hoʻokumu ʻana i ka pāka ʻo Malu ʻUlu o Lele. 

ʻO kēia hanana hoʻokuʻikahi, ʻo ia nō ka hanana mua loa o ka hui. 

“ʻO ke kūkulu hou ʻana iā Lahaina ma o ka hana i piha me ka ʻoiaʻiʻo a me ke kūpono no ko kākou kaiāulu, ʻo ia nō ka mea e nui ai ka holomua ʻana,” wahi a Kalepa. “A laila, i ka wā e hiki mai ana, e kōkua aku ana mākou i nā kaiāulu ʻē aʻe ma ka honua i mea e mau ai ka moʻomeheu, ka manaʻolana, a me ke aloha ʻāina ma ko lākou mau kaiāulu.”

ʻO kā Civil Beat kūkala nūhou ʻana i pili i ke kalana o Maui, ke uku hapa ʻia nei e kekahi mau haʻawina kālā mai ka Nuestro Futuro Foundation. 

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

A good reason not to give

We know not everyone can afford to pay for news right now, which is why we keep our journalism free for everyone to read, listen, watch and share. 

But that promise wouldn’t be possible without support from loyal readers like you.

Make a gift to Civil Beat today and help keep our journalism free for all readers. And if you’re able, consider a sustaining monthly gift to support our work all year-round.

 

 

About the Author