Kā ka luna hoʻoponopono nota: Unuhi ʻia na Ākea Kahikina. Click here to read this article in English.

Ke noi mai nei nā kahu ola ma Waiʻanae i mau kumu waiwai hou aku no ka hoʻākea ʻana aʻe i kā lākou hana lawelawe no ke kaiāulu i pilikia i ka nui o ka hana weliweli a nā pū i kēlā mau makahiki aku nei. 

Civil Beat stories ma ka ʻōlelo Hawaiʻi

‘Ka Ulana Pilina’ is an ongoing collection of news articles and opinion pieces written in the Hawaiian language to better connect with our Indigenous readers, identify underreported stories and improve our engagement with an underserved community.

Read More

Kahe ʻole ke kālā mai ke aupuni mai no hoʻokahi kekeke, a ʻaʻole i hoʻihoʻi pono ʻia ke kālā no nā polokalamu i kāpae ʻia ma ke au emi o ka makahiki 2008, wahi a nā kahu. Eia naʻe, ke hoʻāʻo nei nā hui kaiāulu e pani hakahaka, e laʻa nā hale pule kamaʻāina. 

He ʻeiwa hoʻomake ʻana a ʻoi ma Waiʻanae i kēia makahiki, wahi a ka ʻikepili kalaima a ke Keʻena Mākaʻi o Honolulu. Ma kēlā kalaima aku nei i hana ʻia ma ka hopena pule no ka Lā Hana, ua kīpū kekahi kāne i ʻelima kānaka, a ʻo ka make ihola nō ia o ʻekolu mau kānaka o ia pūʻulu luaahi ma mua o kona kīpu ʻia ʻana e kekahi lālā ʻohana o nā luaahi. 

Ua hōʻeuʻeu kēia mau kalaima i nā luna ma ka Waiʻanae Coast Comprehensive Health Center e noi i ka mokuʻāina a me ke kūlanakauhale i ke kālā no ka hoʻākea ʻana aʻe i ka hana lawelawe i pili i ke olakino a me ke kūkākūkā ʻana. 

“ʻO ke kūpaʻa aku me ke kōkua ʻole ʻia ʻana mai, ʻaʻole hiki ke hana mau ʻia,” wahi a Alicia Higa, ʻo ia nō ke poʻo luna olakino kaulike o ke kikowaena, ma kekahi ʻaha kūkala nūhou ma ka Pōʻakolu. Ua hiki mai nā kaiāulu i kahi e paʻakikī loa ai ka lapaʻau ʻana.” 

Ua hoʻolaha aku nei ia kikowaena i kekahi polokalamu no ka ʻeha nui a me ke kūpaʻa no nā kamaʻāina e hoʻopilikia ʻia nei e ke kalaima weliweli, a mālama ʻia nā ʻaha kūkā a me nā hoa kūkā no kēlā me kēia kanaka a me nā hui kekahi. 

Ke noi mai nei ke kikowaena i $500,000 mai ka mokuʻāina me ke kūlanakauhale mai no ke kōkua ʻana mai i ua polokalamu nei, akā, e hoʻomau aku ana nō naʻe lākou i ka lawelawe ʻana ke hāʻawi ʻole ʻia ke kālā, wahi a Nicholas Hughey, ka hope pelekikena hoʻokō. 

Koi hoʻi ia kikowaena i ke kālā no kekahi keʻena mālama pōulia. 

‘Ōlelo maila ʻo Hughey, ua uku kākoʻo mai ka mokuʻāina i ke kikowaena he $1.4 miliona no ka mālama ʻana i kona keʻena mālama pōulia ma waena o ke aumoe a me ka hola 8. ʻAʻole i hoʻonui ʻia ia uku kākoʻo i loko o kēlā mau makahiki he 15 i hala, i loko nō o ka piʻi ʻana o ke kumukūʻai no ka mālama ʻana i ua keʻena mālama pōulia nei, wahi a Hughey i ʻōlelo mai ai. 

He Kanaka Maoli ka hapanui o ko ke kikowaena mau mea maʻi, a ʻo kona lumi mālama pōulia ka mea hoʻokahi nāna e lawelawe nei i ko Waiʻanae. 

“ʻO ka hoʻonui ʻole ʻia ʻana o ka uku kākoʻo i kekahi keʻena me kona koʻikoʻi lua ʻole no 15 mau makahiki, he hōʻailona mōakāka ia no ke kaulike ʻole ma ka pae ʻōnaehana,” wahi a Hughey. 

ʻO Hale Naʻau Pono, he kikowaena kaiāulu no ke olakino noʻonoʻo ma ke kumu o ka puʻu e noho ai kēlā kikowaena olakino ʻē aʻe i kuhi ʻia ma luna, a ua like nō kona pilikia kālā me ia kikowaena o mua. Ma mua, he laha nō ka nui o kāna hana lawelawe ma lalo o ko ka mokuʻāina polokalamu ʻo Assertive Community Treatment, he mea no nā kānaka me nā pilikia noʻonoʻo liʻiliʻi. 

Ua hoʻoneʻe ʻia kēlā mau hana lawelawe i nā polokalamu like ʻole ma lalo o kā Kiaʻāina Linda Lingle papa luna hoʻokele. A ʻo ke kāpae nui akula nō ia i nā polokalamu lapaʻau ma ka wā e nele ai ke kālā ma ke Au Emi Nui. 

“Ua lilo ka holomua, no ka mea, ua lilo ke kālā,” wahi a Poha Sonoda-Burgess, ka luna hoʻokō. 

Ke holo nei ʻo Hale Naʻau Pono me nā kumu waiwai liʻiliʻi i loaʻa. Mālama ia hui i nā hale hui i loaʻa ai nā hana lapaʻau pilikia noʻonoʻo a me ke kōkua ʻana i nā ʻōpio ma lalo o ka ʻōnaehana kōkua keiki nele, i mea e lako ai nā polokalamu kūkā a me ka mālama ʻana i nā keiki i hānai haole ʻia. 

Hoʻokumu ʻia kekahi polokalamu ʻē aʻe no nā ʻohana e komo ana paha i ka ʻōnaehana kōkua keiki nele. Hoʻohana ʻia hoʻi kēia mau keʻena no nā hanana ma ke kikowaena kaiāulu. Wahi a nā kamaʻāina, ʻaʻole lawa nā wahi ma Waiʻanae no nā ʻaha a me ka hoʻākoakoa ʻana. 

“Hoʻokohukohu ʻia ko mākou wahi e like me ka lumi ʻākoakoa o ka hōkele, akā, ua kohu kā mākou kumukūʻai i ke kaiāulu,” wahi a Sonoda-Burgess. 

Makemake hoʻi nā luna ma ia kikowaena e kōkua aku i nā ʻōpio ma nā kula. Hoʻolako ua kikowaena nei i nā kauka noʻonoʻo ma nā kula waena a me nā kula kiʻekiʻe ma Waiʻanae me Nānākuli, wahi a Stephen Bradley, ke poʻo luna lapaʻau o ke kikowaena, a manaʻolana ʻia, e hoʻākea ʻia ana ka polokalamu e hoʻokomo ʻia ai nā laekahi lawena. 

ʻO Richard Bertini, ka CEO o ia kikowaena olakino, ua ʻōlelo maila iā Civil Beat, he pono ka hoʻoponopono ʻana i nā pilikia noʻonoʻo ma mua o ka wā kula waena. 

“ʻAʻole mākou e hoʻoponopono nei i nā pilikia lawena nui e hōʻea ma ka wā keiki,” wahi a Bertini. “A, inā ʻaʻole e hoʻoponopono ʻia ma o ke kōkua a ka loea, e hoʻokino ʻia ana ia mau pilikia ma ka wā makua, a ʻo ka pilikia nui maila nō ia.” 

Ke hoʻāʻo nei ke kikowaena e hoʻolako i mau polokalamu moʻomeheu ma o kona māhele ʻo ʻElepaio Social Services, e laʻa ka mālama ʻana i nā hanana ma uka a ma kai ma kekahi hanana he ʻelua lā ma kēia hopena pule i kapa ʻia ʻo “Mauka to Makai” ma ka ʻāina mahi ʻo “Kaʻala Farms” ma ke awāwa o Waiʻanae me ke awa ʻo Pōkaʻī. 

“ʻO ka pahuhopu, ʻo ia nō ka hoʻopili hou ʻana o kākou i ko kākou ʻāina, i ko kākou kaiāulu,” wahi a Higa, ke alakaʻi o ka polokalamu. “Ua pau ka manaʻolana o nā lālā kaiāulu he nui. Kainō, e hiki mai ana nā mea maikaʻi ma hope o ka wā maʻi ahulau, eia kā, ke maikaʻi ʻole nei kēia.”

Ke hoʻāʻo nei nā alakaʻi haipule e hoʻolako i nā mea no nā kānaka e hoʻonā ai i nā mea e hihia ai ka naʻau.

Ua mālama ʻo Ark of Safety Christian Fellowship i nā ʻaha pule no nā luaahi o ke kalaima pū, a ua mālama ʻia hoʻi nā ahiahi no ka pule ʻana no ke kaiāulu. Ua ʻōlelo maila ʻo Jay Amina, ke poʻo o ia hale pule, he hopohopo ko ke anaina hale pule i ka nui ʻana aʻe o ke kalaima weliweli a me nā hui hana weliweli ma ia ʻāina. 

Hoʻolako ka hale pule i nā hoa kūkā, akā, maopopo iā Amina, ʻaʻole nō paha makemake kekahi mau kānaka e komo i ka hale pule no ia kūkā ʻana. ʻO ia nō ke kumu e hele ai nā limahana a me nā alakaʻi o ia hale pule no ka hālāwai ʻana me nā kānaka ma ko lākou hale ponoʻī a i ʻole ka pāka no ke kōkua ʻana. 

Ke hoʻolālā nei ka hale pule i ʻaha ʻākoakoa nui ma ʻOkakopa, i like me nā pāʻina Pākoa, i loaʻa ai ka mea ʻai, ka hoʻolauleʻa, a me nā pāʻani no nā keiki. He $80,000 a ʻoi ke kumukūʻai o kēia ʻano hanana, a uku ʻokoʻa ʻia e nā lālā o ka hale pule, wahi a Amina. 

Lana kona manaʻo, e kū ana kēia ʻano hanana me he puʻuhonua lā no nā ʻohana, i loko nō o kona kū ʻana he ahiahi hoʻokahi wale nō. Ua kaulana ia hanana ma mua, ua nui nā kānaka e kū laina i mau hola ma mua o ka hoʻomaka pāʻina ʻana. 

“Ke ʻike ʻia ko lākou minoʻaka ʻana — noʻu iho, ʻo ia nō kuʻu makana,” wahi a Amina. 

ʻO kā Civil Beat kūkala nūhou ʻana i pili i nā mea Hawaiʻi, ke ʻuku ʻia nei e kekahi haʻawina kālā mai ka Abigail Kawānanakoa Foundation. 

ʻO kā Civil Beat kūkala nūhou ʻana i pili i ke olakino kaiāulu, ke uku ʻia nei e ka Atherton Family Foundation, Swayne Family Fund of Hawaii Community Foundation, Cooke Foundation me Papa Ola Lōkahi.

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.