Hoʻāpono Lua ʻIa Ko Hawaiʻi Pila Hoʻokuʻu Makika No Ka Hoʻopakele Manu
Ua luku ʻia ka nui manu ʻōiwi o ka pae ʻāina e ka malaria manu, ka mea hoʻi a ka mokuʻāina e hoʻoponopono aku ai ma o kahi lāʻau hoʻohāpai ʻole.
Ka nota a ka luna hoʻoponopono: Unuhi ʻia na Ākea Kahikina. Click here to read this article in English.
ʻO ka hoʻolālā a ka mokuʻāina no ka hoʻēmi ʻana i ka laha o ka malaria manu, ka mea e luku nei i ka nui mana ʻōiwi, ua hoʻāpono lua ʻia ua hoʻolālā nei e ko Hawaiʻi ʻAha Hoʻokolokolo Waena no ka Hoʻopiʻi Kūʻē.
ʻO ke Keʻena o ka ʻĀina me nā Kumu Waiwai Kūlohelohe me ka American Bird Conservancy, na lāua nō i hoʻokumu i ka hoʻolālā no ka hoʻokuʻu ʻana i nā makika hānau ʻole i kālailaiola ʻia ma Maui Hikina i ka makahiki 2023, ma o kahi hana e noho aku ai nā makika kāne hoʻohāpai ʻole i nā makika wahine kamaʻāina no ka hoʻopau ʻana i ka uluāhewa ʻana o ka nui makika.
ʻO nā makika e hāpai nei i ka malaria manu, ua hoʻāhewa ʻia lākou no ka hoʻopau ʻokoʻa ʻana i kekahi o nā lāhulu manu ʻōiwi, a ke hoʻopilikia ʻia nei kekahi ʻano manu mūkīkī a ʻane halapohe.
Akā, ua kūʻē ʻia nā hoʻolālā mokuʻāina no ʻelua makahiki e Hawaiʻi Unites, he hui hoʻopuka waiwai ʻole no Maui, ka mea hoʻi i hoʻopiʻi aku i ka mokuʻāina i ka makahiki 2023, me ka ʻōlelo ʻana aku penei, ʻaʻole i hahai pono ka mokuʻāina i ke kaʻina hana kūpono ma ka wānana ʻana i ka hopena o kāna hana ma luna o ka ʻāina. Ua kākoʻo ka ʻaha hoʻokolokolo i ka mokuʻāina i kēlā makahiki aku nei, ke koho hoʻi a ka hui no Maui i kūʻē aku ai.
“He pilikia walohia nō kēia no kānaka,” wahi a Dawn Chang i ʻōlelo mai ai ma kahi ʻaha hoʻolaha nūhou, ʻo ia hoʻi ke poʻo o DLNR. “ʻO kēia mau manu, he māhele ia o ko kākou hoʻoilina he moʻomeheu a he kaiaola, a i koʻu manaʻo, makemake nā kānaka a pau e ʻike i ko lākou kiaʻi pono ʻia ʻana.”
ʻO ka hana i kānalua ai kekahi mau kānaka, ua hana ʻia no ke kāohi ʻana i ka nui makika a puni ka honua, akā, wahi a Hawaiʻi Unites i kēlā makahiki aku nei, ua hoʻohana ʻia nā ana hoʻohālike kūpono ʻole.
“Na kēia koho e hōʻoia mai i ka mea a mākou e ʻike ʻē ai — Aia ʻo Hawaiʻi ma kahi kahua paʻa ma ka pae kānāwai me ka pae ʻepekema no ka hoʻopakele ʻana i nā manu nāhelehele ʻōiwi,” wahi a Maxx Phillips, kahi loio no American Bird Conservancy. “Ua hōʻike mōakāka hou ka ʻaha hoʻokolokolo, ʻaʻole kākou e noho wale ana i ka wā e pau ai kēia mau lāhulu luaʻole i ka malaria manu. He pono ko nā manu e hoʻopakele ʻia ana.”
Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.
