City Clerk: ʻAʻole E Helu ʻIa Nā Pāloka No Tommy Waters
Hōʻea mai kēia hoʻoholo ʻana ma hope o ka holo ʻana o ka manaʻo o ka ʻAha Hoʻokolokolo Kaʻapuni e ʻōlelo ana nō hoʻi, ʻaʻole e hiki i ka luna hoʻomalu ʻaha ke ʻimi he wā noho ʻekolu. E hōʻea mai paha he ʻāʻumeʻume kānāwai hou aku.
Ka nota a ka luna hoʻoponopono: Unuhi ʻia na Kamalani Johnson. Click here to read this article in English.
Ua aʻoaʻo ka Māhele Koho Pāloka o Honolulu iā Tommy Waters, ka luna hoʻomalu o ka ʻAha Kūlanakauhale o Honolulu, ʻaʻole hiki ke koho pāloka ʻia ʻo ia no kahi wā noho hou.
No ke paʻi ʻia o nā pāloka ma mua o ka holo ʻana o ka manaʻo o ka ʻAha Hoʻokolokolo Kaʻapuni i ka Poʻakahi, ʻo ia ʻike ʻia nō ia o ko Waters inoa ma nā pāloka i hoʻopuka ʻia no ka hoʻokūkū ʻAha Māhele 4.
Aia ke keʻehina mua o ka hoʻokūkū i kēia Poʻalima, a ua ʻōlelo ka māhele koho pāloka, “ʻaʻole hiki ke wehe wale ʻia aku” kona inoa mai nā pāloka i paʻi, hoʻopūʻulu, a hoʻolaha ʻē ʻia. ʻAʻole pū e hiki i nā kānaka i koho pāloka ʻē ke koho pāloka hou.
ʻO ia helu ʻia nō ia o nā pāloka i koho pāloka ʻē ʻia no Waters, i kāpae ʻia, no ka ʻike ʻana nō naʻe, inā ua loaʻa ka hapa nui o nā bāloka i kahi moho e kū ana i nā koina i helu ʻia ma ka wā koho pāloka kūikawā mua. ʻO Trevor Ozawa, Jason Liang, a me Tara Malia Gregory nā moho ʻē aʻe ma ka hoʻokūkū ākea.
No ka helu wale ʻana nō ka helu ʻia o nā pāloka no Waters, i wehewehe ai ka māhele koho pāloka, i mea e ʻike ai inā ua loaʻa ka hapa nui o nā pāloka i helu ʻia i kekahi moho e kū ana i nā koina.
Inā e loaʻa ka hapa nui o nā pāloka i kekahi o nā moho ʻē aʻe ʻekolu ma ka hoʻokūkū i ka Poʻaono — kapa ʻia he lula “50% a hui ʻia me ka hoʻokahi” — a e lilo ka lanakila i ia moho. Inā ʻaʻole, e holomua nā moho nui ʻelua i ka wā koho pāloka nui o ka lā 3 o Nowemapa.
(ʻAʻole helu ʻia nā pāloka i waiho ʻia a hakahaka, a i ʻole paha ia, ʻo nā wā e koho pālua ai kahi mea koho pāloka—ʻo ia hoʻi he koho pāloka pākela)
“ʻIke mākou he mea kēia hoʻoholo ʻana e uluhua ai nā mea koho pāloka he nui, keu hoʻi nā mea i hoʻouna ʻē i kā lākou pāloka,” i ʻōlelo ai ka Limahana Hoʻokō Kūlanakauhale Kūikawā Chadd Kadota ma kahi hoʻolaha nūhou. “ʻO ko mākou kuleana ka hoʻokō maʻemaʻe ʻana i nā wā koho pāloka ma ke kū i ke kānāwai a me nā manaʻo hoʻoholo o ka ʻaha hoʻokolokolo.”
Wahi a ka hoʻolaha nūhou, ua hana pū nā ʻelele hoʻokō māhele me nā Loio Kalana, ko ke kūlanakauhale kime loio, “e nānā pono ai i ka manaʻo hoʻoholo o ka ʻaha hoʻokolokolo, ke Kumukānāwai Kūlanakauhale, a me nā kānāwai koho pāloka mokuʻāina ma mua o ka hoʻolaha ʻana i ke ʻano e hoʻokō ʻia ai ka wā koho pāloka.”
“Mahalo mākou i ka hoʻomanawanui o ka lehulehu ākea i ka hoʻokō ʻia o ia noiʻi ʻana a eia ke kūpaʻa nei i ka hoʻokō i kēia wā koho pāloka me ke kaulike, maʻemaʻe, a no ka pono nui o nā mea koho pāloka a pau,” i ʻōlelo ai ʻo Kadota.
Na Ozawa, kahi lālā ʻaha kalana kūlanakauhale ma mua, i alakaʻi i ka papahana e ʻimi ana e kāpae iā Waters mai ka pāloka o ka makahiki 2026. Ua kākoʻo ka Luna Hoʻokolokolo ʻAha Kaʻapuni James Ashford i ko Ozawa manaʻo no ke kaupalena ʻana o ke kumukānāwai kūlanakauhale i ka wā holo moho o nā lālā ʻaha kalana i ka ʻelua wā holo moho moekahi o ka ʻehā makahiki.
Ma kona ʻaoʻao, ua manaʻo ʻo Waters ua hiki iā ia ke holo moho no ka manawa ʻekolu i kēia makahiki no ka hoʻomaka lohi ʻana o kona wā noho mua, a no laila, ʻaʻole i piha pono ka ʻehā makahiki piha.
Ua hoʻokomo ʻo Waters he palapala hoʻopiʻi kūʻē i ka Poʻalima. Ua hoʻouna ʻo ia i kēia manaʻo ona iā Civil Beat ma ka leka kelepona:
“ʻIke mākou i ka pane ʻana o ka Limahana Hoʻokō Kūlanakauhale i ka manaʻo hoʻoholoo ka ʻAha Hoʻokolokolo Kaʻapuni. Hopohopo au i nā mea koho pāloka ma nā kaukani i koho pāloka ʻē. He mea nui ka hāpai ʻia o ko lākou mau leo.”
“Kūʻē ikaika loa mākou i ka manaʻo hoʻoholo o ka ʻaha hoʻokolokolo a ke noiʻi nei no kā mākou palapala hoʻopiʻi kūʻē. ʻAʻole nō pili kēia kumuhana i ka hoʻokahi wale nō moho. Pili kēia i ke kaupale ʻana i ka hilinaʻi mea koho pāloka a me ka maʻemaʻe o ka ʻoihana koho pāloka kemokalaka. E ʻimi aʻe au i nā ala a pau e hōʻoia ʻia ai ka hoʻokō pono ʻia o ke Kumukānāwai Kūlanakauhale a me ka hoʻolohe ʻia o nā kānaka o ka Māhele 4.”
Ua ʻōlelo ʻo Rex Quidilla, ko ke kūlanakauhale luna hoʻokō koho pāloka, ʻaʻole e pane kona keʻena ma muli o “ka holo ʻana o ka hihia ma ka ʻaha hoʻokolokolo.”
E mole ana kēia hihia i ka hoʻokūkū ʻana o Ozawa a me Waters ma ka hoʻokūkū nui o ka makahiki 2018 i ka wā o lāua i hoʻokūkū ai no ka noho ʻAha Kalana Kūlanakauhale hoʻokahi. Ua hāiki loa ka hoʻokūkū, a ua hoʻopiʻi kūʻē ʻo Waters, i hāʻule, i ka hopena ma ka ʻaha hoʻokolokolo. Ua holo ka manaʻo o ka ʻAha Hoʻokolokolo Kiʻekiʻe o Hawaiʻi ma ke kākoʻo iā ia, a holo ai kahi wā koho pāloka kūikawā ma waena o nā hoa paio ma ʻApelila 2019, i eo ai ka lanakila iā Waters.
Aia ke holo nei ka wā koho pāloka ʻAha Kalana no ka Māhele 4, a ke paipai nei ka māhele koho pāloka i nā mea koho pāloka i koho pāloka ʻole e koho pāloka ma mua o ka palena pau.
E pono e loaʻa nā pāloka hoʻouna leka ʻia i ke Keʻena Limahana Hoʻokō Kūlanakauhale ma mua o ka hola 7 ahiahi i ka Poʻaono.
