Ka nota a ka luna hoʻoponopono: Unuhi ʻia na Kamalani Johnson. Click here to read this article in English.

A hala he mau mahina ma hope o ka hōʻea nui ʻana o nā lālā kaiaulu e kūʻē i ka papahana a ka pūʻalikoa e kūkulu he ʻehiku paha ʻohe nānā ma kahi ʻāina hoʻomaluō mokuʻāina ma luna o Haleakalā, aia kahi mau mea noho ke noho pīhoihoi nei i ka ʻike i ke ʻano e pane ai nā ʻelele hoʻokō pekelala i ko lākou mau manaʻo.

“Aia mākou ke hoʻomanawanui nei,” i ʻōlelo ai ʻo Hina Kneubuhl, he mea hoʻālulike o Protect Haleakalā, he hui o nā kahu hana kuʻuna Hawaiʻi, nā kānaka mālama ʻāina, nā alakaʻi kaiaulu, a me nā mea ʻē aʻe e ʻimi nei i ka mālama i nā wahi koʻikoʻi i nā hana kuʻuna. “He kapu ke kuahiwi iā mākou, a luhi nā Hawaiʻi i ka paio me ka ʻimi ʻana o ka pūʻalikoa e nui aʻe kona wahi ma ko mākou home.”

ʻO Kneubuhl kekahi o nā mea noho he 100 a ʻoi i walaʻau pololei me nā ʻelele hoʻokō pekelala mai ka Pūʻali Kaua Lewa o ʻAmelika Hui Pū ʻIa a me ka Pūʻali Kaua Lewa Lilo Loa o ʻAmelika Hui Pū ʻIa ma ka wā o kekahi o nā hālāwai kaiaulu paʻahana loa a ʻelua ma mua aku nei i kēia makahiki, a e hōʻike ana ka hapa nui loa o ka poʻe no ka lawa ʻole o ka wehewehe ʻana o ke kāmua loiloi hopena ʻāina he 516 ʻaoʻao kona lōʻihi i hoʻolaha ʻia no ka papahana he $6 miliona kālā kona nui i Ianuali he papahana e lapaʻau ʻia ai ke ʻano e pā ai kekahi o nā wahi koʻikoʻi loa i nā hana kuʻuna a me ka ʻāina o ka mokupuni.

Wahi a kahi ʻelele Space Force, he 650 a ʻoi kānaka i hōʻike manaʻo ma ke kākau ma mua o ka pau ʻana o ka wā hāpai manaʻo o ka lehulehu ākea ma ʻApelila.

Aia ke ʻāwili ʻia nei ka manaʻo o ke kaiaulu i loko o kahi moʻolelo hopena pā ʻāina paʻa, a nā ʻelele hoʻokō pekelala e wānana nei e hoʻopaʻa pono a pēlā pū hoʻi he manaʻo hoʻoholo ma mua o ka pau ʻana o ka makahiki, i ʻōlelo ai ʻo Ashley George, ka ʻelele Space Force, ma kahi ʻōlelo kūhelu.

“Mahalo mākou i ke kaiaulu o Maui i ka hōʻike mai i ko lākou mau manaʻo ma o nā hālāwai hoʻolohe,” wahi āna ma kahi leka uila i ka Poʻahā he pane i kā Civil Beat noi i ka ʻike hou aku. “He kōkua kēia manaʻo koʻikoʻi ma ka ʻimi i ke kaulike ma waena o ka mālama ʻāina a kahukahu hana kuʻuna me nā holomua lewa lipo koʻikoʻi i ka palekana o ke aupuni a me ka palekana o nā ʻenehana poepoe honua a kākou e kaukaʻi nei.”

Ua paʻa ʻē he ʻeono ʻohe nānā kālaiʻike a he ʻehā ʻohe nānā kilo lewa lipo ma luna o ka piko o ka lua pele moe, ka piko kiʻekiʻe loa nō hoʻi o ka mokupuni ma luna iki o ka 10,000 kapuaʻi. Ua ʻōlelo nā ʻelele hoʻokō pūʻalikoa, he mea nui nā ʻohe nānā hou aku no ka hoʻokāʻoi i ka hiki i ko ʻAmelika Hui Pū ʻIa ke hoʻokolo a ʻike i nā mea hoʻoweliweli ma waena o nā ukali a ʻōpala lewa lipo e hoʻopuni ana i ka Poepoe Honua.

Ua kūʻē ka hapa nui loa o nā mea noho i hāpai manaʻo ma nā hālāwai hoʻolohe ākea ma Kīhei a me Pukalani ma mua aku nei i kēia makahiki — a pēlā hoʻi nā mea i hāpai manaʻo ma nā hālāwai hoʻolohe i ka makahiki 2024 — i nā ʻohe nānā hou no ka hopohopo no ke ʻano e pā ai nā hana kuʻuna i ka papahana, a e pā hewa ai ka ʻāina a lilo ai ʻo Maui he luaahi no nā pūʻalikoa o nā ʻāina ʻē. Ua kuhikuhi pū aku nā kānaka he nui no ka hoʻomaʻemaʻe ʻole ʻana o nā ʻelele hoʻokō pekelala he ʻaila diesel kulu he 720 kālani kona nui ma muli o kahi uila ʻōlapa ma ka Maui Space Surveillance Complex ma ke kuahiwi i ka makahiki 2023.

He wahi noho ‘o Haleakalā no nā mea ola ʻane halapohe a hoʻoweliweli ʻia e like me ka ʻōpeʻapeʻa, ʻakēʻakē, ʻuaʻu kani, nēnē, a me kahi ʻano ʻāhinahina i loaʻa ma Hawaiʻi wale nō.

Wānana ʻia he liʻiliʻi wale nō ka pā o ka ʻāina i ka papahana, wahi a ke kāmua moʻolelo pā ʻāina. Ua hōʻoia nā ʻelele hoʻokō pūʻalikoa i ka pā nui a hewa ʻana nō paha o nā hana kuʻuna Hawaiʻi, ma muli hoʻi o ke kapu o ka piko kuahiwi i nā Kānaka Hawaiʻi he nui a me nā kānaka hou aku, wahi a ka moʻolelo pā ʻāina.

Ua ʻōlelo ʻo Kneubuhl, ʻaʻole i lawa ko nā ʻelele hoʻokō pekelala hōʻoia ʻana i ke koʻikoʻi o ka piko no nā Kānaka Hawaiʻi he nui.

“ʻAʻole loa au e hōʻea i kahi wahi e like me St. Paul’s Cathedral a ʻōlelo aʻe, ‘E pono ana au e kūkulu i kekahi mea ma ʻaneʻi,’ a i ʻole paha ia, ma ka Sistene Chapel, a i ʻole paha, kekahi wahi kapu loa i nā kānaka ʻē aʻe,” wahi āna. “ʻAʻole loa au e komo i kēlā wahi a manaʻo aʻe, ua ʻoi loa aku koʻu pono e pono ai koʻu wāwahi ʻana he luakini a hale a wahi i kapu loa i ka poʻe ʻē aʻe, eia naʻe, hōʻea mai lākou i ʻaneʻi me ka manaʻo e hana mai iā mākou pēlā.”

Kākoʻo ka Space Force i ka manaʻo a pono o ka poʻe e hōʻike i ko lākou mau manaʻo me ka maluhia, wahi a George. “Hōʻihi nui mākou i ke koʻikoʻi o Haleakalā i nā hana kuʻuna a pili ʻuhane, a kūpaʻa mākou i ke kamaʻilio, hana pū, a me ka mālama ʻāina ma kēia ʻimi like ʻana,” wahi āna i ʻōlelo ai.

Ua ʻōlelo nā ʻelele hoʻokō, ua wānana ʻia ka hoʻomaka ʻana o ke kūkulu ʻana i ka Air Force Maui Optical and Supercomputing Site Small Telescope Advanced Research Facility, a i ʻole paha ia, AMOS STAR, ma hope mai i kēia makahiki, a i ʻole, i ka makahiki 2027. Wānana ʻia he ʻelua makahiki a kō ke kūkulu ʻana i nā ʻohe nānā pūʻoʻa — a pēlā hoʻi nā hoʻoponopono ʻē aʻe, ʻo ia hoʻi kahi alanui hou i hoʻomoe ʻia, nā wahi hoʻokū kaʻa, a me nā kiʻina hoʻoholo wai — ma luna o ka 1 ʻeka a emi mai ma kahi kokoke i kahi kilo lewa lipo e kū nei i kahi kokoke i ka piko.

He ʻOhe Nānā Hou?

Me ka hoʻolaha nui ʻole ʻia o ka ʻike hou aku no nā papahana e puka nei, ua māhuahua aʻe he pāonioni i ka lā hoʻomaka o ke kūkulu ʻana e hōʻea mai ana. Ma mua aku nei i kēia pule, ua pena ʻia ʻo “AMOS Out Protect Haleakalā!” ma ka ʻulaʻula a melemele pū ma ka ʻaoʻao o kahi hale kahiko e alo ana i ke Alanui Koa Kahiko o Maui ma Puʻunēnē.

Ma ka Poʻalua, ua ʻākoakoa ʻo Kneubuhl a me nā mea noho ʻē aʻe he nui ma waho o kahi komo i ka Hōkele Kai o Wailea, kahi e hōʻea ana nā akeakamai, kānaka kālaiʻike, a me nā mea ʻē aʻe no kahi ʻaha kūmakahiki no ka ʻike lewa lipo. Ua paʻa lākou i nā hōʻailona nona nā manaʻo “Kick AMOS off Maui,” “ʻAʻole AMOS” a me “AMOS OUT!”

“ʻAʻohe hōʻihi i ka pūʻalikoa,” i ʻōlelo ai ʻo Kneubuhl, e wehewehe ana i ka pihō o ka manaʻo o ka poʻe kūʻē i ka pūʻalikoa no ka ʻāwili maoli ʻia o ko lākou mau manaʻo i loko o nā papahana paʻa. “E paio ana nā Hawaiʻi a me nā kānaka hou aku i kēia mau mea no nā makahiki he nui wale.”

Ua hōʻike ʻo ia no ke ʻano i holomua ai nā ʻelele hoʻokō pekelala ma luna o nā papahana kūkulu pūʻalikoa ma luna o Haleakalā, Kahoʻolawe, Kahi Hoʻomākaukau o Pōhakuloa, a me Maunakea i loko nō o ke kūʻē o ke kaiaulu. Ua kū ka papahana ʻOhe Nānā He Kanakolukūmākolu Mika he $3 biliona kālā kona nui ma luna o Maunakea ma Hawaiʻi mokupuni ma hope o ke kūʻē nui ʻia i ka makahiki 2019.