Kā ka luna hoʻoponopono nota: Unuhi ʻia na N. Haʻalilio SolomonClick here to read this article in English. 

ʻO nā kaʻa uila, he hapa ʻuʻuku wale nō lākou o nā kaʻa holoholo alanui – ma kahi hoʻi o 1% o nā kaʻa kau ʻōhua a pau. Eia nō naʻe ka piʻi ʻāwīwī ʻana mai o ko lākou heluna, aia nō hoʻi kekahi o nā ʻahahui kāpili kaʻa o ia ʻoihana ke hoʻolālā nei i ka hoʻopuka koke aku i nā kaʻa uila hou he nui a puni ka ʻāina.

Ka Ulana Pilina Badge Olelo Hawaii

No ia mau loli ʻana, ke hōʻaʻano nei hoʻi kekahi mea kau kānāwai mokuʻāina no lākou iho, ʻo ia hoʻi ka mea e hikiwawe ai kēia huli kua ʻana i ke kaʻa wahie a huli alo i ke kaʻa uila.

Aia kekahi pila e holo ana ma ka Hale, ʻo House Bill 393, nāna e ʻimi nei i ala e kau ʻia ai he lā palane pau e pau loa ai ke kūʻai ʻia o nā kaʻa wahie ma ka mokuʻāina nei. Ma ‘ō aku o ia lā, ʻo nā kaʻa wale nō e kūʻai ʻia auaneʻi ma Hawaiʻi nei, he kaʻa hapa uila, e like me ka Toyota Prius, a i ʻole he kaʻa uila a kaʻa ʻē aʻe hoʻi e hoʻopua ʻole i ka mea ʻino.

ʻO ka mea nāna i lawe mua mai kēia pila, ʻo Rep. Takashi Ohno, ua kau mua ʻia hoʻi ka lā palena pau no ka lā mua o Ianuali, 2030. ʻO ke kā hou loa o ia pila, ʻaʻole naʻe i kau ʻia he lā palena pau, no ka mea, ke ana nei me ke kamaʻilio kūpono nā mea kau kānāwai mokuʻāina i ke ala maikaʻi loa e holo mua ai. Komo pū mai he “pahuhopu”, ʻo nā kaʻa “lawelawe hana māmā”, ʻo ia hoʻi nā kaʻa, ma ke ʻano laulā, ma lalo o nā paona he 8,500 ko lākou kaumaha, he pono ke hoʻoikehu ʻia lākou e ka ikehu hoʻomau hou ʻia ke hiki mai ka makahiki 2045.

EV electric vehicle chargers at Ala Moana Shopping Center.
E pono ana ke kūkulu ʻia nā wahi hoʻoikehu kaʻa uila e like me kēia ma ke Kikowaena Hale Kūʻai ʻo Ala Moana, ʻoiai nā mea kau kānāwai e manaʻo nei i ala e hikiwawe ai ka lawelawe ʻana i ke kaʻa uila me ka huli kua i ke kaʻa wahieCory Lum/Civil Beat/2021

I loko o ka makahiki i hala aʻe nei, ua pili ka ʻoihana kālepa kaʻa a me Wall Street “i nā pili i like mai kekahi me kekahi no nā ʻano e loli loa ana ka halihali ʻana ma kēia mua aku ke hoʻohālike ʻia me ko kēia lā,” wahi a Ohno i pane ai i ka Poʻakolu nei.

ʻO ka manaʻo ʻana i ka pāpā ʻia ʻana e ka mokuʻāina, he mea hoʻi e kūʻē loa ʻia e ka Hawaiʻi Automotive Dealers Association. Ua hōʻike mai kekahi o nā hoa hana o Ohno ma loko o ka Hale i ko lākou manaʻo, he mea hoʻi ka pila e lima ikaika ʻia ai ka poʻe kūʻai i ka hoʻolilo kālā he mau kaukani keu no ke kaʻa uila. 

Ke hāiki maila nō naʻe ka ʻokoʻa ma waena o kekahi kumu kūʻai mai a me kekahi kumu kūʻai aku, a ke manaʻo ʻia nei hoʻi e nalo ana nō ia ʻokoʻa ma loko o nā ʻoihana kālepa kaʻa he nui i loko o nā makahiki he ʻumi e hiki nei, wahi a nā mea ʻike loea. Ma Hawaiʻi nei, pono naʻe ke akahele nā mea kau kānāwai ʻaʻole e hoʻopau i ke kūʻai ʻia aku o ke kaʻa wahie ma mua o ka loli ʻana mai o ia kumu kūʻai, wahi a Ohno.

ʻĀnō, he mau kaukani kālā ko ke kumu kūʻai kaʻa uila ma mua o ko ke kaʻa wahie, wahi a nā mea kūʻai kaʻa ma Oʻahu.

Eia naʻe, ʻo ke pani ʻia ʻana o nā kaʻa wahie he miliona a ʻoi ka nui ma kēia mokuʻāina e nā kaʻa uila a kaʻa hoʻopua ʻole hoʻi, ʻo ia ka mea koʻikoʻi e hiki ai iā Hawaiʻi ke kū aku ma ke kūlana “carbon neutral” ma loko o nā makahiki e hiki nei he 25, i māhele hoʻi ia o kona kānāwai hoʻokahuli, wahi a nā luna i ʻōlelo ai. 

ʻO ko Hawaiʻi māhele ʻo ka halihali ʻana pili lepo, ʻo ia hoʻi nā kaʻa kau ʻōhua, nāna e hoʻopua i nā tona mekalika he 4 miliona o nā ea hoʻomehana honua e pulelo ana i kēlā me kēia makahiki ma ka paemoku nei, wahi a ko ka Mokuʻāina ʻo Hawaiʻi Keʻena Ikehu.

ʻO Ka Nui A Me Ka Makemake ʻIa Ma Kēia Hope Iho

I ka hopena o Ianuali, ua kuahaua mai nei ko Maleka pāʻoihana kālepa kaʻa nui loa, ʻo General Motors, i kona manaʻo e hoʻopau loa ʻia ka hoʻopua ʻia o nā ea mai loko aʻe o nā huelo kaʻa o kona mau kaʻa lawelawe hana māmā a pau ma ke hiki mai ka makahiki 2035.

A hala akula hoʻokahi paha pule, ua pane hou mai ia pāʻoihana me ka hoʻolako pū mai he hoʻolaha kūʻai Supa Pola e hōʻike ana iā Will Ferrell, ka hoʻomākeʻaka kanaka, i ka hoʻolaha ʻana i ka manaʻo e hoʻomāhuahua nui loa i ka haku a hoʻolako ʻana i mau kaʻa uila hou loa, he 30 ka nui, ke kaʻahope aʻe nā makahiki he ʻehā aʻe nei.

ʻO nā pāʻoihana kālepa kaʻa ʻē aʻe, e laʻa me Jaguar me Nissan, ua hōʻike pū mai lākou i ko lākou manaʻo e hahai pū ma ia ʻano like nō.

ʻOiai hoʻi ma Kaleponi, ua kau mai nei ʻo Kiaʻāina Gavin Newsom he kauoha hoʻokō nāna e koikoi ikaika mai ana e hoʻopua ʻole loa nā kaʻa a kalaka hou a pau loa e kūʻai ʻia ma laila ma mua o ka makahiki 2035. 

“ʻO kēia ke keʻehina e lawe ai ko kākou mokuʻāina i mea e hoʻohuli hope ʻia ai ka loli aniau ma ke ʻano makepono loa,” i pane ai ʻo Newsom ma kekahi palapala hoʻolaha. He hiki nō naʻe ke kahuli ʻia ia kauoha e kekahi kiaʻāina e noho auaneʻi ma hope aku ona.

I Hawaiʻi nei, he paʻakikī aʻe ke kahuli ʻia ʻana o HB 393, wahi a nā luna i mea mai ai.

Ua kū aku ʻo Dave Rolf, ʻo ia ka luna hoʻokō o ka Hawaiʻi Automotive Dealers Association, e hōʻike aku i kona manaʻo i kekahi ʻaha hoʻolohe kaiāulu i mālama ʻia iho nei, ʻo ka pāpā ʻana ʻaʻole e kūʻai ʻia ke kaʻa wahie, he mea ia e holo ai ka poʻe i ʻAmelika ʻāina nui e kūʻai ai i kaʻa me ka hoʻouna ʻana ma ʻaneʻi, pēlā nō e nui ai ka lilo ma ka ʻaoʻao ʻoihana kālepa a e emi ai hoʻi ka loaʻa ʻauhau.

Wahi a Rolf, kākoʻo ʻia nō e ia ʻahahui ka lawelawe piha ʻia o ka hoʻohana ʻana i ke kaʻa ikehu hoʻomau hou ʻia –– ʻo ka nīnau nui, ʻo ia ka “wā a me ke ʻano e hana ʻia ai pēlā.”

ʻO ke kūlia ʻana hoʻi he hoʻopua ʻole nā kaʻa kau ʻōhua a pau loa ke hiki mai ka makahiki 2045, he mea hōʻoiʻoi hoʻi no ka mea he kumu ia e koikoi ʻia ai nā pāʻoihana kūʻai kaʻa kūloko e hoʻomāhuahua ʻia aʻe ko lākou moʻolako kaʻa uila ma ke ʻano hikiwawe kūpono ʻole, i ʻōlelo ai ʻo Rolf i nā mea kau kānāwai. ʻAʻole hoʻi ʻo ia i wehewehe mai i kona manaʻo no kekahi ʻano wā i ʻoi aʻe paha o ke kūpono.

Ma ke ʻano kaʻawale aʻe, ua helu koho aʻela ʻo Hawaiian Electric, ma kahi o nā kaʻa uila he 450,000 ke holoholo ana ma nā alanui o Hawaiʻi ke hiki mai ka makahiki 2045, ʻo ia hoʻi ka hapalua o ko ka mokuʻāina mau kaʻa kau ʻōhua.

Ma lalo o HB 393, ʻae mau ʻia nō ke kūʻai ʻia aku o nā kaʻa wahie i hoʻohana mua ʻia, ʻo ka manaʻo nui, e pau ana nō ko lākou waiwai hoʻohana ma kahi o ka makahiki 2045, i ʻōlelo hou ai ʻo Ohno.

I kēia manawa, ma kahi o 14,000 nā kaʻa uila i kau inoa ʻia ma Hawaiʻi nei, ʻo ka pālua nō hoʻi ia ma mua o ka nui i helu ʻia he ʻekolu wale nō makahiki aku nei, wahi a nā ʻike pili o ka mokuʻāina. He māhele naʻe kēlā o ka heluna nui o nā kaʻa kau ʻōhua i kau inoa ʻia, he 1.1 miliona.

Kūpono Nō Ke Loaʻa Nā Wahi Hoʻoikehu Kaʻa Uila Hou Aku

ʻO kekahi ālaina nui e huli alo nei ʻo Hawaiʻi, ʻo ka lawa o ka ʻōnaepuni e kū ai nā wahi hoʻoikehu kaʻa uila. ʻO ka nui o nā wahi hoʻoikehu o ka mokuʻāina i noa i ka lehulehu i kēia manawa, he 728, mai ko ʻAmelika Huipūʻia Keʻena no ka Ikehu ia mau ʻike pili. He piʻi nō hoʻi kēlā ma luna o ka nui he 542 i helu ʻia e Hawaiian Electric i ka makahiki 2018.

Ua helu koho ʻia e ka pāʻoihana, he 2,200 ka nui o nā wahi hoʻoikehu i mea e hoʻolawa ʻia ai ka nui o ka māhuahua ʻana o nā kaʻa uila ma ka mokuʻāina nei ke hiki aku i ka makahiki 2045. 

Nona iho, ua kūkulu ihola ʻo Hawaiian Electric he 25 wahi “hoʻoikehu ʻāwīwī” a puni ka paeʻāina, pēlā e loaʻa ai ka ikehu i nā kaʻa he 45-mile ka lōʻihi ke hoʻoikehu ʻia he 15 minuke, wahi a Aki Marceau, ko Hawaiian Electric luna no ka ʻaoʻao hoʻoikehu uila i ka halihali ʻana.

He pahuhopu hoʻi ko ka pāʻoihana, ʻo ke kūkulu ʻana i ia ʻano wahi hoʻoikehu e like me ka pāhiku o ka nui ma mua o ko kēia manawa i ka hiki ʻana o nā makahiki o mua aʻe, a ʻo ka māhele kāʻokoʻa hoʻi, he pono nō ke hoʻolako mai lākou pēlā, ma ke ʻano nui ʻino hou aku naʻe, e pane hou ai ʻo Marceau.

Ke hahai nei ʻo Hawaiian Electric i nā pila he nui ma loko o ka ʻAhaʻōlelo, ma ia mau pila paha e hikiwawe ai ke kūkulu ʻia ʻana o ia mau wahi. “Nui hoʻi nā mea e ʻoniʻoni aʻe nei,” i ʻōlelo ai ʻo ia.

“He wā hoʻopīhoihoi maoli kēia,” i pane ai ʻo Scott Glenn, nāna e hoʻoponopono i ko ka Mokuʻāina ʻo Hawaiʻi Keʻena Ikehu. “Nui ke kaulona ʻana o mākou ma luna o kēia mau nīnau i kūpono ke hoʻoponopono ʻia, ʻoiai kākou e lawelawe nei i kēia ʻano hou.”

ʻOiai hoʻi, ua piʻi aʻela nō ke kumu kūʻai o ke kaʻa he Nissan Leaf, ma muli hoʻi, ma ke ʻano nui, o ka maikaʻi loa aʻe o ka ihoiho o ia ʻano kaʻa, wahi a nā luna. Ma Tony Nissan, kuhi ʻia ke kumu kūʻai o ia ʻano kaʻa makahiki 2020 he $29,000, kū like ʻole me ka $17,900 no kekahi kaʻa hatchback i ʻōlelo ʻia e nā mea kūʻai kaʻa ʻo ia ke ʻano kaʻa kūlike loa me ia, ʻo “the Kicks”.

ʻO ka hoʻihoʻi ʻia aku o ka ʻai ʻauhau pekelala he $7,500 i ka mea nāna e kūʻai ka Leaf, he mea hoʻi e kūlike loa aʻe ai nā kumu kūʻai. I ke kaʻahope lōʻihi ʻana o ka wā, na ka poʻe i hiki ke kūʻai aku i ka Leaf e mālama auaneʻi i ke kālā ma ka ʻaoʻao o ke kālepa kaʻa a me ka hoʻoikehu ʻana, wahi a Kristen Turner, he hope luna no ka ikehu ma ko ka Mokuʻāina ʻo Hawaiʻi Keʻena Ikehu (HSEO).

Ua like paha me ka mālama kālā ʻana ma muli o ke kūkulu ʻana i nā ʻūomo ikehu lā, i loko naʻe o ko lākou kumu kūʻai pipiʻi loa ma kinohi, ma ke kūkulu mua ʻana.

Ke kali ʻia nei ʻo ka hoʻolohe ʻia o HB 393 no ka manawa hope loa i loko o ka Hale, ma ke Kōmike Hoʻokele Waiwai. Inā holo nō ia, e kaʻa ana nō ma loko o ka ʻAha Senate.

“Ke hauʻoli nei au ua loaʻa maila nō kēia pila,” wahi a Ohno. “Inā hiki nō ke lawelawe ʻia kēia pila… ke manaʻo nei au he mea ana ia e pōmaikaʻi ai ʻo Hawaiʻi. Akā, ke hoʻohiki nei au, ke hala aʻe hoʻokahi mahina hou aʻe, ʻaʻole nō e kūlike ana ia pila.”

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

Support nonprofit, independent journalism.

During this election season, we hope that our coverage provides you with the information to make informed decisions on issues that you care deeply about.

Whether it’s affordable housing, education or the environment, these issues depend on your vote, and our ability to report on them depends on your support.

Every contribution, however big or small, allows us to continue keeping readers informed through election day and beyond. So, if you found value in our coverage, please take the next step by making a contribution to Civil Beat today.

About the Author