Kā ka luna hoʻoponopono nota: Unuhi ʻia na Ākea Kahikina. Click here to read this article in English.

Ma ke kakahiaka nui, ua ua iho nei ma Hāna. ʻĀnō, ke kolo nei ka lā ma hope o nā ao, a ikiiki loa ke ea ma ko Hauʻoli Kahaleuahi holoholo ʻana mai ka piko o Hāna School i ka māla — ua ʻeli ʻia nō ia ma ka pā mauʻu ma waena o nā lumi papa he ʻelua lālani. 

Ka Ulana Pilina Badge Olelo Hawaii

“ʻO ka ʻuala ʻoe, ka lakika ʻoe, ʻo ka pakila ʻoe,” wahi a Kahaleuahi me ka helu ʻana i kēlā me kēia lauʻai e ulu ana ma laila.

“ʻO ke kaikona ʻoe,” āna e hoʻomau aku ai me ka hele wāwae ʻana ma ka ʻaoʻao o ka lepo. “ʻO ka lekuke ʻoe, a me ka ʻakaʻakai.”

Ma kēia lā e maluhia ai ka māla. Aia nā keiki ma loko o nā lumi papa; e hoʻi ana lākou i ka hana ma ka lepo ma hope. ʻO ka lālani i kokoke i ka hele ʻana o Kahaleuahi, he mau lumi papa kona lōʻihi, a ʻo ia kekahi o ʻelima lālani ma kēia pā mauʻu liʻiliʻi o ke kula kahua. He mau lālani ʻē aʻe ko ke kahua kula i mālama ʻia e nā papa like ʻole, a he mau ʻōnaehana mahiiʻa hoʻi ko laila e mahi ʻia ana ka lekuke, ke kāpiki, a me ka ʻōhiʻa haole e nā haumāna ma kēia makahiki aku. 

Ma mua o ke kanu ʻana ma nā mālama ma Hāna School, ua noiʻi nui ʻia ka lepo a me ka wai o ke kula. Marina Riker/Civil Beat/2022

ʻAʻole kākaʻikahi ka loaʻa ʻana o nā māla i nā kula, akā he pae ʻokoʻa loa ko ka mea e holo nei ma Hāna School. Ua mahi aku nei nā haumāna i ka ʻuala he 200 paona. He ulu lāʻau hoʻi ko laila me 90 mau lāʻau hua, e laʻa ka mīkana, ka pea, ka maiʻa, ka manakō, ka soursop, a me ka ʻulu. 

ʻO Hauʻoli Kahaleuahi, ma ka ʻaoʻao hema, a me Lipoa Kahaleuahi, ma ka ʻaoʻao ʻākau, he kaikaina a he kaikuaʻana lāua, a he pukana hoʻi lāua maiā Hāna School mai. Hana ʻo Hauʻoli ma ke ʻano he luna hoʻonohonoho pilina kaiāulu no Ma Ka Hana Ka ʻIke; ʻo Lipoa ka luna hoʻokō. Marina Riker/Civil Beat/2022

Ke kūkulu aʻe nei hoʻi ke kula i kahi hale hoʻoulu mea kanu, no ka mea, ua pili loa ia i ka hui a Kahaleuahi e hana aku ai ma ke ʻano he luna hoʻonohonoho pilina kaiāulu, ʻo ia hoʻi ʻo Ma Ka Hana Ka ʻIke. Ua hoʻomaka ʻia ka hui hoʻopuka waiwai ʻole i ʻelua mau kekeke aku nei me ka nuʻukia e aʻo ʻia ai nā keiki ma Hāna School i ka ʻoihana kūkulu, a ma muli o kēia, na nā haumāna i kūkulu i 13 kūkulu ma ke kahua kula, e laʻa ke keʻena o ke poʻo kula a me ke kula kamaliʻi. 

Mai kēlā wā aku, mau nō ka hoʻākea ʻia ʻana o Ma Ka Hana Ka ʻIke, e laʻa ke kōkua ʻana i nā mahiʻai kamaʻāina a me ke alakaʻi ʻana i nā haumāna e lilo i kahu ʻāina o ka hanauna hou. Ua hoʻolaha aku nei kona mau limahana i hōʻike  — ʻekolu makahiki ka lōʻihi o ka hana noiʻi ʻana – a ʻo ia ke nānā i ka hōʻoi ʻana i ka lako mea ʻai ma Maui Hikina a me ka hiki ʻana o nā ʻohana ke loaʻa iā lākou ka ʻai pono no kēia ʻāina nei. Ua hihia loa kēia pilikia, akā holomua naʻe ka hui me kekahi mau haʻina. 

Eia kekahi o nā haʻina maʻalahi: E hoʻomaka ma ke kula e mahi ʻia ai ka meaʻai ma ke kula me ke aʻo ʻia ʻana o nā haumāna i ka hoʻoulu, ka mahi, a me ka hoʻomākaukau mea ʻai ʻana. 

“Ua hoʻomaka ʻia me ka ʻiʻini o kekahi e lawelawe aku ai i nā keiki, a ua lilo ia, he kula ma loko o kahi kula,” wahi a Chris Sanita, ʻo ia ke poʻo kula ma Hāna School. 

Lawelawe ʻo Hāna School i nā keiki mai ke kula kamaliʻi a i nā pukana i hemo kula aku nei. Marina Riker/Civil Beat/2022

Lawelawe aku ʻo Hāna School i nā keiki he 400, mai ke kula kamaliʻi a i ka papa ʻumikūmālua, a me nā mākua ʻōpiopio i hemo kula aku nei a hana lākou ma ke kula ma o nā polokalamu aʻo ʻoihana a ka hui hoʻopuka waiwai ʻole. Ma o nā makahiki i hala, ua ulu ʻo Ma Ka Hana Ka ʻIke i ka pakanā hoʻopuka waiwai ʻole o ke kula aupuni, a ke pani ʻia nei nā hakahaka e hōʻalo ʻia ai nā ālaina pākulekele ma ka hana pū ʻana me nā keʻena hoʻonaʻauao he pae mokuʻāina a he pae pekelala. 

Me ka hana pū ʻana me ke kula, ʻo ko Ma Ka Hana Ka ʻIke pahuhopu, ʻo ia ka hāʻawi ʻia ʻana o ka mākaukau ʻoihana i nā alakaʻi hou o ke kaiāulu ma Maui Hikina i hiki iā lākou ke mālama iā lākou iho, a me ka paipai ʻana iā lākou me ka ʻike e mālama ʻia ai nā hoa noho a me ka ʻāina a puni. 

Eia ka hale hoʻoulu mea kanu e kūkulu ʻia mai nei ma Hāna School, a na nā haumāna e kūkulu nei i ua hale nei.  Marina Riker/Civil Beat/2022

He alahele ia no ka hui hoʻopuka waiwai ʻole e hoʻoponopono i nā pilikia laulā ma ka pae pilikanaka a me ka pae hoʻokele waiwai ma Maui — e laʻa ka hoʻokele waiwai lahilahi a me ka ʻōnaehana meaʻai e kaukaʻi ana i nā waiwai hoʻopae mai — ma o kēlā me kēia keiki pākahi. Ma mua o ka hiki ʻana o ka maʻi ahulau, ʻo ia ka mea i pōpilika ai ʻo Maui ma ka pae hoʻokele waiwai, ua hoʻopaʻa ʻē ʻo Ma Ka Hana Ka ʻIke i haʻawina kālā mai ke aupuni pekelala no ka noiʻi ʻana i ka ʻōnaehana mea ʻai ma Maui Hikina a me ka hoʻēmi ʻana i ke kaukaʻi ʻana o ka māhele ʻāina i nā waiwai hoʻopae mai no waho, a he ʻelua hola ka mamao kalaiwa ma waena o ua māhele ʻāina a me kahi pā pikineki. 

Ua hōʻike maila ka noiʻi i hoʻolaha ʻia ma kēia kauwela, ke hoʻohālikelike ʻia me ke koena o Hawaiʻi e hoʻopae ʻia mai ai ka mea ʻai he 90%, ʻo ka meaʻai maka kamaʻāina, he hoʻokahi hapahā ia o ka uku meaʻai no nā ʻohana ma Hāna. Ma o nā ana manaʻo he mau kākini i nīele aku i nā ʻohana a me nā keiki hele kula, ua hōʻoia nā mea noiʻi, makemake nā kamaʻāina no Hāna i ka meaʻai Hawaiʻi — kapa ʻia he “ʻāina-based foods” e lākou, e laʻa ke kalo, ka ʻuala, ka ʻulu, a me ka maiʻa. ʻO nā meaʻai, e laʻa ka lasagna ʻulu, ka poi, ka laulau, a me ka puaʻa kālua, ʻo ia kekahi o nā koho ʻaina awakea punahele i koho ʻia e nā keiki no Hāna. 

Ma kēia pūkaʻina, e noiʻi nui ana ʻo Civil Beat i ka mea e pono ai ko Hawaiʻi hoʻēmi ʻana i ke kaukaʻi ʻana i ka mea ʻai i hoʻopae ʻia mai a me ka hoʻonui ʻana i kona hiki ʻana ke ulu i kāna meaʻai ponoʻī. 

ʻAʻole nō ia he pūʻiwa, wahi a ka noiʻi, no ka mea, he Kanaka Maoli ka nui o nā kamaʻāina he 70% a ʻoi. ʻO ka pilikia naʻe, ʻo ia nā ālaina ma ka loaʻa ʻana o ka meaʻai i mahi ʻia e nā mahiʻai ma Maui Hikina i ka pā ʻai o nā ʻohana a me nā hale ʻaina kula. He mau mea like ʻole nā hihia, mai ke kumukūʻai a i ka nele ʻana o nā limahana ʻole, a ua pili kēlā hihia i ka uku ʻuʻuku no ka hana mahiʻai, ka nele ʻana i ke kālā hoʻomaka ʻole e hoʻopuka i ko ka māhele ʻāina mau mahiʻai, a me ka hiki ʻole ke hele a hoʻohana i ka ʻāina mahiʻai a me nā mīkini mahiʻai, wahi a ka noiʻi. 

“He pono ka hōʻoia ʻia ʻana o kēia mau mea i ʻike ʻia akula e nā kānaka he nui,” wahi a Lipoa Kahaleuahi, ʻo ia ka luna hoʻokō o ka hui, a he pukana ʻo ia maiā Hana School mai. Ma mua o kona ʻauamo ʻana i kēlā kuleana, ua hana ʻo Lipoa ma ke ʻano he luna hoʻonohonoho pilina kaiāulu no ka hui, a ʻo ia ke kūlana a kona kaikaina ʻo Hauʻoli e noho nei. 

ʻĀnō, me ka loaʻa ʻana o ka ʻikepili, ke kālele ana ʻo Ma Ka Hana Ka ʻIke i ka hōʻoi ʻana i kahi māhele o ko Maui Hikina ʻōnaehana meaʻai penei, ʻo ia ka hāʻawi ʻia ʻana o ka mea ʻai kamaʻāina i nā keiki ma ke kula. Ma mua o ka wā maʻi ahulau, e hāʻawi aku ana ke kula i 450 ʻaina ma waena o ka ʻaina kakahiaka a me ka ʻaina awakea i kēlā me kēia lā, wahi āna. 

He ʻuala i hākui ʻia e ka papa kuke ma Hāna School.  Marina Riker/Civil Beat/2022

Akā, ʻaʻole ia he maʻalahi i ka hale ʻaina kula e hoʻomaka i ke kūʻai ʻana mai i ka meaʻai mai nā mahiʻai no Hāna. I loko nō o ka pahuhopu o ka mokuʻāina e kūʻai ʻia ai nā meaʻai kamaʻāina, ua hihia loa ka moʻohelu kālā a me ka nui limahana, no laila, no ʻAmelika nō ka hapanui o ka meaʻai e hāʻawi ʻia e nā kepa DOE. No laila, ma kahi o ka manaʻo he “mahiʻai-i-kula,” ke hoʻāʻo nei ʻo Hāna School e hoʻoholo i ka manaʻo he “māla-i-hale ʻāina kula.” 

“He wahi kohu loa kēia i ka hoʻololi nui ʻia ʻana,” wahi a Kahaleuahi, ʻoiai, hāʻawi ka hale ʻaina kula i nā ʻaina he mau haneli i nā keiki no Keʻanae a i Kaupō. 

Ma kēia makahiki, ua hai ʻo Ma Ka Hana Ka ʻIke i luna hoʻonohonoho māla, ʻo ia ke haku i nā papa haʻawina a alakaʻi ʻo ia i nā keiki ma ka hoʻoulu ʻana i nā hua a me nā lauʻai e lako ai nā papa kuke o Hāna School, ma luna aʻe o nā mea i hāʻawi manawaleʻa ʻia mai ka waihona meaʻai. Ma kahi kakahiaka mōlaʻelaʻe i kēlā pule aku nei, ua moani ke ʻala o ke kinamona a me nā ʻāpala mehana ma o ka lumi kuke ʻoihana o ke kula, ʻo ia kahi i kuke ʻia ai ke kai ʻāpala e kahi papa kula waena. 

Eia mai ʻo Joshua Lopez, he haumāna ʻoihana, lāua ʻo Nalani Tukuafu, ʻo ia ka luna hoʻonohonoho māla no ke kula. Marina Riker/Civil Beat/2022

ʻO Babette Lopez, ʻo ia ke nānā i ka polokalamu kuke, ua hoʻomākaukau ʻo ia i nā pākaukau ma waho o ka lumi papa ma ka ʻauinalā. Inā kuke kāna mau papa i nā ʻaina he nui loa, e lilo kēlā mau ʻaina i ʻai māmā no ka nui haumāna ma hope o ke kula. Ma ka papa kuhikuhi meaʻai ma kēlā lā, eia nō ka meaʻai: ke kai ʻāpala, ka ʻuala i hākui ʻia, ka maiʻa i hoʻomaloʻo ʻia, a me ka palaoa pāpaʻa me ka maiʻa, ka pīneki pāka, ka ʻanoʻano chia a me ka meli — a na nā haumāna nō i hana. 

Ua kōkua pū hoʻi nā keiki iā Lopez ma ka hoʻomākaukau ʻana i ke kimchi he mau kālani. ʻAʻole nō ia e ʻai ʻia e lākou iho, e hoʻokomo ʻia naʻe ia i mau pahu e hoʻouna ʻia ana e Ma Ka Hana Ka ʻIke i nā kūpuna he mau kākini i kēlā me kēia pule. 

“Ua maikaʻi nō ia i nā keiki,” wahi a Lopez. 

Ma ka polokalamu kūkulu a Ma Ka Hana Ka ʻIke, kauoha pinepine ʻia nā haumāna e hoʻoponopono i nā hale o nā kūpuna ma ke kaiāulu. He alahele ia e hānai ʻia ai ka hanauna hou o nā kahu kaiāulu, wahi a Hauʻoli Kahaleuahi, a he alahele hoʻi ia no nā kūpuna e hō aku ai i ko lākou ʻike i ko Hāna ʻōpio. 

“Hiki iā mākou ke hoʻololi nui ma ʻaneʻi ma ko mākou kaiāulu,” wahi a Kahaleuahi. “He wahi kupanaha loa ko mākou kaiāulu, ʻo ia kahi e ola ai ka ʻike ʻāina a me ka ʻike ma ka hana.” 

Ua kākoʻo hapa ʻia kā Civil Beat kūkala nūhou ʻana i ke Kalana o Maui e nā haʻawina kālā na ka Nuestro Futuro Foundation a me ka Fred Baldwin Memorial Foundation. 

Ua uku hapa ʻia ʻo “Hawaii Grown” e nā makana kālā maiā Stupski Foundation, Ulupono Fund ma ka Hawaii Community Foundation a me ka Frost Family Foundation.

Ua kākoʻo ʻia kēia papahana e ka ʻOhana o Harry Nathaniel, Levani Lipton, ka ʻOhana Mar, a me Lisa Kleissner.

An Important Note

If you consider nonprofit, independent news to be an essential service that helps keep our community informed, please include Civil Beat among your year-end contributions.

And for those who can, consider supporting us with a monthly gift, which helps keep our content free for those who need it most.

This year, we are making it our goal to raise $225,000 in reader support by December 31, to support our news coverage statewide and throughout the Pacific. Are you ready to help us continue this work?

About the Author