He Mau Pilikia Mea Kaʻahele Ma Dillingham Ma Muli O Ke Kūkulu Alakau
Ua wāwahi nā limahana kūkulu i nā alanui a me nā alahele, a he ʻaʻe ʻia paha o kekahi mau kānāwai ADA.
Ka nota a ka luna hoʻoponopono: Unuhi ʻia na Kamalani Johnson. Click here to read this article in English.
Ma nā makahiki i hala iho nei, ua lilo ko Honolulu Dillingham Boulevard he alanui nona nā ʻano ālaina like ʻole ma muli o ko Skyline kūkulu alakau ʻana, ʻo ia hoʻi nā kone, hōʻailona ala kalaiwa pani, nā pā hao, a me nā pono hana nui e hoʻohana ʻia no ka ʻeli alanui ʻana.
Pēlā pū hoʻi i lilo ai he alanui nona nā ālaina like ʻole no nā mea kaʻahele o kahi kokoke e laʻa ʻo Lisa Jaso, he mea noho o Kalihi, e hele ana ma nā alahele o Dillingham i pani ʻole ʻia no ke kūkulu ʻana e hele ai ma ʻō a ma ʻō o ke kaiahome.
Wahi a Jaso, i ʻike ʻia he makapō ma ke kānāwai, ua kokoke nō e hāʻule he mau manawa iā ia e hoʻāʻo ana e hele ma nā alahele ma kahi kokoke i kona hale ma ke Alanui ʻo McNeil i ālai ʻia e nā hōʻailona ala kalaiwa pani nui, kone, a me nā wahi ʻālualua.
“E pono lākou e hana a palekana,” i ʻōlelo ai ʻo Jaso.
Ua ʻōlelo ʻo Jaso, ua hāpai ʻo ia i kēia manaʻo i nā ʻelele hoʻokō o ka Honolulu Authority for Rapid Transportation ma Kepakemapa ma kahi hālāwai kaiaulu no ka haku lau kahua “a e hoʻāʻo ana lākou e haʻi mai iaʻu e hoʻōki [i kaʻu]” no ka mea ʻaʻole i pili loa kāna e hāpai ana.
ʻAʻole i pane mai ʻo HART a pēlā nā ʻelele hoʻokō kūlanakauhale i ke noi o kēia pule no ke kūkā ʻana i nā nīnūnē mea kaʻahele Dillingham.
Ua hāpai pū ʻo Jaso i ka nīnūnē i ka Hawaiʻi Disability Rights Center, nāna e ʻimi ana i ka pono no ka poʻe nona nā kīnānā.
“Aia nō hoʻi mākou ke hoʻāʻo nei,” i ʻōlelo ai ʻo Louis Erteschik, ko ke kikowaena luna hoʻokō, iā Civil Beat i ka pule nei. “Ahuwale ka lapaʻau ʻole ʻia o ka pilikia.”
Ua hāpai ke kikowaena he mau nīnau, i ʻōlelo ai ʻo Erteschik, no ka hihia i ke kūlanakauhale a me ko ke keʻena Olakino o ka mokuʻāina Disability and Communication Access Board.
Ua ʻōlelo ia papa, wahi a Erteschik, iā ia ma ʻOkakopa, me he lā, aia he mau ʻaʻe kānāwai Americans with Disabilities Act ma ke ala Dillingham. Ua haʻi ko ke kūlanakauhale manakia papahana ADA iā ia ma ʻOkakopa 8, ua lapaʻau ke kūlanakauhale i kekahi o nā nīnūnē ma ka wehe ʻana i nā hōʻailona alanui e ālai ana i ke alahele a pēlā pū kahi pā ʻehu lepo ma ke Alanui ʻo Mokauea.
Ua hoʻomau ia manakia ma ka haʻi iā Erteschik no ko ke kūlanakauhale lapaʻau ʻana i nā nīnūnē no nā pā hao a lāʻau e waiho ana ma ke alahele.
Eia nō naʻe, mau ke ālai ʻia ʻana o ke alahele i nā pā, ālaina, a wahi ‘ālualua.
“Ke hana nei lākou he — ʻo wai kaʻu ʻōlelo e ʻimi nei? — ala hapalakī a hapalakā no ka poʻe e hele ai,” i ʻōlelo ai ʻo Jaso, a i kapa i nā hana lapaʻau “he wahī ʻeha.”
Ua ʻōlelo ʻo Erteschik no kona ʻimi ʻana iā Joey Manahan i kinohi o ʻOkakopa, ʻo ia ko HART luna hoʻokele pilina aupuni, ʻaʻohe nō naʻe pane. Ua ʻimi hou ʻo ia iā Manahan i ka Poʻakolu, a ʻo ka pane i loaʻa mai, ʻo ko Manahan lā hope ma ia wahi ka lā 21 o Nowemapa.
Ua ʻōlelo pū ʻo Erteschik no kona makemake e nihi ka hele i ʻole e pani kāʻokoʻa ke kūlanakauhale i nā alahele o laila he kiʻina e lapaʻau ʻia ai nā nīnūnē ADA e lewa nei.
No Wai Ke Kuleana?
Ko ka Honolulu Authority for Rapid Transportation’s helu kelepona: (808) 768-6159, a i ʻole ia, info@honolulutransit.org.
Ko ka Honolulu City Manakia Papahana ADA Yoko Tomita, (808) 768-8599, a i ʻole, City-HNL-ADA@honolulu.gov
