E ʻAe Nā Kauka I Ka Lawelawe He 5 Makahiki I Kahi Kuaʻāina O Hawaiʻi No Ke Kula Kauka Manuahi?
‘Imi kahi papahana kōkua kālā pahuhopu nui e hoʻolawa i ka nele kauka ma nā wahi kuaʻāina a lawelawe nui ʻole ʻia o ka mokuʻāina.
Ka nota a ka luna hoʻoponopono: Unuhi ʻia na Kamalani Johnson. Click here to read this article in English.
Ua hoʻokō ʻo Misty Kahale, he kama o Molokaʻi, i kona makahiki mua o ke kula kauka lapaʻau ma ke Kulanui o Nevada, Las Vegas i ka Poʻalima. Ma kona wā e puka ai, wānana ʻo ia i ka piʻi o kona ʻaiʻē haumāna i ka $300,000.
ʻOiai ua hala nā hōʻike hope loa a he nui ka puʻu pila uku kula e waiho nei, ke hoʻolālā nei ʻo ia e noi i kahi papahana hāʻawi kālā hou o Hawaiʻi nāna e hoʻolako i ke kālā e koe nei e pono ai ke koena o kāna mau lilo kula kauka lapaʻau — he mea e mao honua ai kona hihia kālā, wahi āna.
Eia nō naʻe ka uku: e pono nā ʻōhua haʻawina kālā e hoʻohiki i ka hana manawa piha ma kahi kuaʻāina o Hawaiʻi no ka ʻelima makahiki ma hope o ka puka kula ʻana, he kiʻi ʻana nō hoʻi kēia i nā limahana lawelawe ola kino e noho ma nā wahi nele i nā kauka lapaʻau, kahu maʻi, a limahana like pū paha.
He ʻāʻumeʻume ka paipai ʻana i nā kauka e lawelawe ma nā wahi kuaʻāina. Aia nō naʻe nā alakaʻi mokuʻāina ke hoʻoholomua nei i ka hana ma ka hoʻokaʻawale he $28 miliona he kālā pekelala no kahi papahana kōkua kālā uku kula kauka lapaʻau.
E manuahi ka hele i ke kula kauka lapaʻau e hoʻomaka ana ma Kepakemapa no nā ʻōhua o ka papahana hoʻoulu limahana Hawaiʻi Outreach for Medical Education in Rural Under-resourced Neighborhoods (HOME RUN).
Noa kēia papahana, i kahua ma ka hapa nui mai kahi haʻawina kālā pekelala he $188.9 kālā ka nui, i manaʻo ʻia no ka hoʻomohala a kūkulu hou i ka lawelawe ola kino i kahi kuaʻāina o Hawaiʻi, i nā haumāna e ʻimi ana i kahi ʻoihana ma ka lawelawe ola kino a ʻenehana ʻike ola kino. Kaʻa ma lalo o kēia papahana ka uku hele kula a me nā uku no ka hoʻonui ʻike lawelawe ola kino ma kahi kulanui o ko ka haumāna makemake.
Ma ka hoʻonui i ke kōkua kālā no ka hoʻonui ʻike lawelawe lapaʻau, e hiki nō i ka papahana ke hoʻolawa nui i ko Hawaiʻi nele limahana i kahi kuaʻāina, i ʻōlelo ai ke Kauka Kelley Withy, he kauka lapaʻau ma ko ke Kulanui o Hawaiʻi Kula Lapaʻau ʻo John A. Burns, nāna e alakaʻi he papahana noiʻi e holo nei o ko ka mokuʻāina nele i nā limahana lawelawe lapaʻau.
Ua ʻōlelo nō naʻe ʻo ia, he “hoʻoholo paʻakikī” kahi hoʻohiki e noho a hana i kahi kuaʻāina no ka ʻelima makahiki i ka wā e hiki mai ana “no nā mea ma nā 20.” Noʻonoʻo ka papahana i kahi kuaʻāina o Hawaiʻi he wahi o nā mokupuni ma waho o Oʻahu a pēlā hoʻi ma Waiʻanae, Wahiawā, Waimānalo, Hauʻula, Lāʻie, Kahuku, Haleʻiwa a me Waialua ma Oʻahu.
No Kahale, he mea ʻole ke koina. E kūlia ana kēia wahine he 27 ona mau makahiki i ka lilo he kauka lapaʻau ʻohana ma Molokaʻi, kahi e pono ai ka ulu ʻana o ka nui kauka he 83% i lawa pono ai ka nui pono ʻōhua, wahi a kā Withy noiʻi.
ʻIke ʻo Kahale i ka hiki ke loaʻa he kālā hou aku iā ia i ka lawelawe lapaʻau i kahi ʻē. Ua ʻōlelo nō naʻe ʻo ia, he kuleana kona hoʻi ʻana i kona ʻāina hānau e hoʻolawa ʻia ai he nele kauka lōʻihi i ʻoi aʻe kona koʻikoʻi i nā ala e loaʻa ai kahi kālā keu iā ia.
“He ʻano kuleana ia no ka mea, ʻike leʻa au i nā mea e pono ai ka mokupuni,” i ʻōlelo ai ʻo Kahale. “ʻO koʻu home pū nō naʻe ia a he kuleana koʻu i ka hoʻi a kōkua i ka poʻe i hānai mai iaʻu.”
ʻAʻole no ka mokupuni nā kauka e lawelawe lapaʻau nei ma Molokaʻi. Ua ʻōlelo ʻo Kimberly Svetin, ka pelekikena o Molokaʻi Drugs, he pāʻoihana i hoʻokele ʻia na kahi ʻohana, ʻo kahi ala hoʻolawa i ka pilikia nele ka lapaʻau ʻana i kēia lauana e ʻike ʻia nei.
“Ma nā wahi kuaʻāina o Hawaiʻi, ke haʻalele nui nei ko kākou mau kauka,” i ʻōlelo ai ʻo Svetin. “Ua ʻike au i ka hoʻomaha ʻana o nā kauka. Ua ʻike au i ka noho wale ʻana nō o nā kauka no kekahi mau makahiki no ka nui aʻe o ke kālā i kahi ʻē a no ka luhi i ka nohona kuaʻāina. ʻO ia ke kumu e koʻikoʻi ai kēia papahana no ke kāpae ʻia o ke ālaina ʻo ka uku no ka hoʻonui ʻike lawelawe lapaʻau.”
‘E Pono E Pau Ka Hihia Ili Hanauna’
Ma kahi o ke $71,328 ka uku makahiki, a i ʻole ia, he $36,672 no nā mea noho o Hawaiʻi, no ka hele ʻana i JABSOM, ko Hawaiʻi kula kauka lapaʻau hoʻokahi. Ma kahi o ka $146,688 ka uku no kahi mea noho no ka ʻehā makahiki, me ka helu ʻole ʻia o nā puke, nā uku keu, a me nā lilo nohona.
ʻŌlelo ke Kiaʻāina Josh Green, nāna i kōkua ma ke kākau a hoʻomohala i ka Papahana Pekelala Rural Health Transformation, makemake ʻo ia e hoʻolawa pau loa i ka nele limahana lawelawe lapaʻau o ka mokuʻāina ma mua o ka 2030. He māhele koʻikoʻi loa ka papahana HOMERUN i ia hana.
“E pono ko kākou lapaʻau ʻana i ka hihia ili hanauna,” wahi a Green. “No ka pipiʻi loa o ka nohona, he paʻakikī loa ka loaʻa o kahi kēkelē kahu maʻi i kekahi a hoʻokaʻa i kahi ʻaiʻē hele kula he $200,000 ka nui a uku i ka uku hahau no ka molaki no kahi hale.”
No Green, he kumuhana kēia e pā nei kona naʻau. Ua hōʻea ʻo ia i Hawaiʻi i ka 2000 ma hope o ke komo ʻana i ka National Health Service Corps, i hoʻonoho ʻia ai ʻo ia he kauka lapaʻau ma kahi kuaʻāina o Kaʻū ma Hawaiʻi mokupuni. Ua kaʻa kekahi o kona ʻaiʻē hele kula kauka lapaʻau ma lalo o ka papahana lawelawe ola kino. He 53 ona mau makahiki — a ʻo ia ke kiaʻāina o ka mokuʻāina — i kona wā i hoʻokaʻa piha ai i ke koena, he ʻelua a ʻoi anahulu pā makahiki ma hope mai.
He 122 palapala noi HOMERUN mai ka wā mai i hoʻolaha ʻia ai ka papahana haʻawina kālā ma ʻApelila na ka Hawaiʻi/Pacific Basin Area Health Education Center. A i kēia, ua ʻāpono ʻia nā mea noi mua he 44. E hoʻomau ke kikowaena ma ka ʻae i nā haumāna e kū ana i nā koina wae ma luna o nā moho mikimiki i ke kū mai.
He $28 miliona kālā i ka papahana no ka makahiki kālā 2026 e pau ana ma Kepakemapa 30. Ua ʻōlelo nō naʻe ʻo Withy, he kiʻekiʻe ka papaha o ka hoʻomau ʻana o kekahi o ia kālā i kekahi makahiki kālā.
ʻO ka ʻōhua haʻawina kālā mua ʻo Katlyn An, he wahine he 27 ona mau makahiki e kūlia ana i ka lilo he kahu maʻi lawelawe lapaʻau ʻohana no Puʻuloa. Ua ʻōlelo ʻo An, e hoʻomaka ana i ke kula kahu maʻi i ka Hāʻulelau ma ke Kulanui o Hawaiʻi ma Mānoa, he maʻalahi ka hoʻohiki ʻana e noho i kinohi o kona ʻoihana ma kahi kuaʻāina no ka mea, ua lana ʻē kona manaʻo e lawelawe i kahi kaiaulu kūloko i nele i nā limahana lawelawe ola kino ma hope o ka puka kula.
“He pipiʻi loa ka noho ma Hawaiʻi, a iaʻu e holomua ana ma kēia papahana, ʻo au ka mea iā ia ke kālā no koʻu ʻohana, ʻo koʻu mau mākua a me nā lālā ʻohana,” wahi āna. “He hoʻoholo paʻakikī loa nō ia noʻu inā ʻaʻole i loaʻa kēia haʻawina kālā. Ma muli o kēia haʻawina kālā, e emi ke kaumaha, a e kōkua ma koʻu hoʻomakakoho ʻana i koʻu hoʻonaʻauao ʻia i ka wā e hiki ai ke hoʻomau i ka mālama i koʻu ʻohana.”
E kōkua ka haʻawina kālā iā ia ma ka hōʻalo ʻana i ka ʻaiʻē hoʻonaʻauao ma ka $100,000 a ʻoi kālā, wahi āna.
E neʻe kekahi ʻōhua haʻawina kālā, ʻo Jose Labrada, he 25 ona mau makahiki a he ʻAmelika Cuba hanauna mua, i Hawaiʻi mai Las Vegas i kēia kauwela no ka ʻimi i kāna kēkelē kauka ma ka lawelawe nohona ma Hawaiʻi Pacific University.
ʻAʻole nō i maʻalahi ka hoʻohiki mikiʻala ʻana i mea e kahua ai kona ʻoihana ma kahi wahi. He mau mākua ʻane ʻelemākule ko Labrada ma ʻAmelika e noʻonoʻo ai. Ua ʻōlelo nō naʻe ʻo ia, he uku kaulike ka hiki ke hele kula me ka loaʻa ʻole o nā hihia kālā.
“ʻO ka hiki ke hele kula me ka loaʻa ʻole o ke kaumaha nui loa ʻo nā ʻaiʻē hele kula, he mea nui loa ia iaʻu e hiki ʻole ai iaʻu ke wehewehe pono ʻoiai no kahi hale au nui ʻole o ke kālā e noho ana he 10 lālā ʻohana ma kahi keʻena hale liʻiliʻi he ʻelua ona lumi,” wahi āna.
E hoʻopili ana ka papahana haʻawina kālā hou i kahi ala e lawelawe ʻia nei na JABSOM mai ka 2022 mai no nā haumāna kula kauka lapaʻau e hoʻohiki ana i ka lawelawe lapaʻau ma Kauaʻi. Holo ia papahana i kahi haʻawina kālā he $10 miliona kālā ka nui a he ʻeono makahiki ka lōʻihi na ke Kauka Priscilla Chan a me Mark Zuckerberg, nāna e noho hapa manawa ma Kauaʻi.
Ua kaʻa kekahi māhele o ka ʻaiʻē hele kula o ka 900 a ʻoi kānaka ma ka mokuʻāina ma lalo o kahi papahana mokuʻāina kū kaʻawale no ka hoʻokaʻa ʻana i nā ʻaiʻē hele kula lapaʻau no nā limahana lawelawe ola kino hoʻohiki i ka hana ma Hawaiʻi.
ʻIke ʻia kēia ʻimi ʻana e emi kūpono mai ke ala e hele ai i ke kula kauka lapaʻau ma kahi wā e pilikia nei nā hui lawelawe lapaʻau o kahi kuaʻāina, e ʻāʻumeʻume ʻē ana i ka uku no ka mālama ʻōhua, i nā loli ma ke ʻano e hoʻihoʻi ʻia ai ke kālā i nā kauka lapaʻau na nā pāʻoihana ʻinikua.
ʻIke pū ʻia kēia ma kahi wā e piʻi nei ka nui nele kauka o ka mokuʻāina. Ua hoʻolawehala ka nele kūmau o Hawaiʻi i nā kauka lapaʻau ʻole i ka 2025. Ke kū nei ka nele kauka o ka mokuʻāina ma ke 833 kauka lapaʻau manawa piha ma ka helu pū i nā ʻāina o ka mokuʻāina.
He mau ālaina ka nui pipiʻi o ka noho ʻana ma Hawaiʻi a me ke kumu kūʻai hale pū, a ma luna nō hoʻi o kēlā ka uku emi, no nā kauka lapaʻau ma ka lawelawe ma ka mokuʻāina.
He māhele nā haʻawina kālā hele kula o ko ka mokuʻāina kiʻina e lapaʻau i ka pilikia, wahi a Withy, e pono nō naʻe nā uku ʻoihana lawelawe ola kino o Hawaiʻi e piʻi i mea e haʻalele ʻole ai nā limahana lawelawe lapaʻau no nā mokuʻāina i ʻoi loa aku ka nui o ke kālā e loaʻa mai ma ke kūlana hana a me ke emi o ka nohona.
Kākoʻo ʻia ko Civil Beat mau moʻolelo ola kino ma ka māhele na ka Atherton Family Foundation.
Kākoʻo ʻia ko Civil Beat’ mau moʻolelo kumuhana ola kino ma ke kalana o Maui ma ka māhele na ka Fred Baldwin Memorial Foundation.
